Apple ចេញមុខសុំទោស ដែលលួចស្ដាប់អ្នកប្រើនិយាយជាមួយ Siri

2019-08-29 09:00:14
ចំនួនមតិ 0 | ចំនួនចែករំលែក 0

ចន្លោះមិនឃើញ

Apple បានចេញមុខសុំទោសចំពោះកម្មវិធី "បង្កើនសមត្ថភាព Siri” របស់ខ្លួន ដែលអនុញ្ញាតឲ្យដៃគូរបស់ខ្លួនបានឃើញអំពីការសន្ទនាមួយផ្នែកតូច រវាងអ្នកប្រើប្រាស់ជាមួយជំនួយការសិប្បនិម្មិត Siri។

ក្រុមហ៊ុនយក្សអាមេរិកនេះនិយាយថានឹងធ្វើការផ្លាស់ប្ដូរមួយចំនួន ដែលឲ្យអ្នកប្រើប្រាស់មានសិទ្ធច្រើនមុនជុំវិញការប្រើប្រាស់ Siri។ គួរដឹងថាកម្មវិធីខាងលើ ត្រូវបានផ្អាកដំណើរការកាលពីដើមខែ បន្ទាប់ពី The Guardian បានចេញផ្សាយនៅថ្ងៃទី ២៦ កក្កដាថាបុគ្គលិកនៃដៃគូរបស់ Apple មួយចំនួន បានឮនូវការសន្ទនាស៊ីជម្រៅផ្ទាល់ខ្លួន រវាង Siri និងអ្នកប្រើប្រាស់ទាក់ទងនឹងការជួញដូរថ្នាំ និងរឿងស៊ីជម្រៅផ្សេងទៀត។

ក្នុងការបង្ហោះលើវិបសាយរបស់ខ្លួន Apple និយាយថាខ្លួននឹងលែងរក្សាទុកការសន្ទនារវាង Siri និងអ្នកប្រើប្រាស់តទៀតហើយ ជំនួសមកវិញគេនឹងប្រើប្រាស់សំឡេងបង្កើតដោយកុំព្យូទ័រដើម្បីជួយធ្វើឲ្យ Siri កាន់តែប្រសើរ។ អ្នកប្រើប្រាស់ក៏នឹងអាចសម្រេចចូលរួមជួយធ្វើឲ្យ Siri កាន់តែប្រសើរឡើង ហើយអាចចាកចេញវិញបានគ្រប់ពេលដែលពួកគេចង់ផងដែរ។

Apple ក៏បាននិយាយថា មានតែបុគ្គលិកខ្លួនប៉ុណ្ណោះនឹងត្រូវអនុញ្ញាតឲ្យស្ដាប់សំឡេងនៃការទំនាក់ទំនងជាមួយ Siri ដោយមិនផ្ដល់សិទ្ធឲ្យដៃគូរបស់ខ្លួនដូចមុននោះទេ។ ហើយក្រុមការងារនឹងលុបការថតសំឡេងណា ដែលចាត់ទុកថាមិនបានផ្ដល់ផលប្រយោជន៍សម្រាប់ Siri។

កម្មវិធី "បង្កើនសមត្ថភាព Siri” គឺធ្វើឡើងក្នុងគោលបំណង វាស់អំពីសមត្ថភាពឆ្លើយតបនឹងការបញ្ជារបស់ Siri និងដើម្បីបង្កើនសមត្ថភាពឆ្លើយតបឲ្យបានកាន់តែប្រសើរជាងមុន។ Apple បកស្រាយថាកន្លងមកខ្លួនប្រើប្រាស់ការទំនាក់ទំនងរបស់អ្នកប្រើប្រាស់ជាមួយនឹង Siri មិនដល់ ០,២% នោះទេ៕

ចុចអាន ៖ iOS 13.1 មានបង្ហើបលក្ខណៈពិសេសនៃកាមេរ៉ា iPhone 11

ប្រភព៖ CNBC ប្រែសម្រួល៖ សុខហេង