មកស្គាល់ប្រវត្តិប្រុសស្អាត Felix គ្រូបង្ហាត់កម្ពុជាឱ្យខ្លាំងដូចបច្ចុប្បន្ន

2019-09-12 02:30:53
ចំនួនមតិ 0 | ចំនួនចែករំលែក 0

ចន្លោះមិនឃើញ

ប្រិយមិត្តស្គាល់ច្រើននិងចាប់អារម្មណ៍ពី Honda អ្នកចាត់ការកម្ពុជាច្បាស់ ប៉ុន្តែមួយចំនួនអាចនឹងភ្លេចបុរសម្នាក់នេះ Felix ដែលជាអ្នកបង្ហាត់ផ្ទាល់ដល់ក្រុមជម្រើសជាតិកម្ពុជា និងនាំក្រុមឱ្យលេងបានយ៉ាងល្អដូចសព្វថ្ងៃ។

នៅថ្ងៃនេះ Sabay នឹងបង្ហាញត្រួសៗពីប្រវត្តិរបស់លោក Felix ដែលជាមនុស្សនៅពីក្រោយភាពជោគជ័យរបស់ជម្រើសជាតិកម្ពុជា៖

លោក Felix Agustin Gonzalez Dalmas ដែលកំពុងកាន់ការងារជាគ្រូបង្វឹកក្រុមជម្រើសជាតិកម្ពុជា ក្រោមការដឹកនាំរបស់ Keisuke Honda នោះគឺជាអតីតកីឡាកររបស់ក្លឹប Plaza Colonia ដែលលេងនៅលីគទី២របស់អ៊ុយរុយហ្គាយចន្លោះឆ្នាំ២០១៣-២០១៤។

រដូវកាលដែលលោកធ្លាប់លេងនៅក្លឹបខាងលើគឺបង្ហាញខ្លួនបានចំនួន ៤ ប្រកួតតែប៉ុណ្ណោះ។ លើសពីនេះ មុនពេលលោកផ្លាស់មកលេងនៅក្លឹបខាងលើក៏ធ្លាប់ជាកីឡាកររបស់ក្លឹប AS.Laranja Kyoto កាលឆ្នាំ២០១០-២០១១ រួចផ្លាស់ទៅលេងនៅក្លឹប Sagawa Printing ដែលជាក្លឹបទី៤របស់ជប៉ុន ក្នុងថ្ងៃទី១ ខែមេសា ឆ្នាំ២០១១។ ដល់ថ្ងៃទី១ ខែមករា ឆ្នាំ២០១៣ ក៏ផ្លាស់ទៅកាន់ក្លឹបចាស់ AS.Laranja Kyoto វិញ។ ដល់ថ្ងៃទី១ ខែកញ្ញា ឆ្នាំ២០១៣ ក៏ផ្លាស់ទៅកាន់ក្លឹប Plaza Colonia ដោយបង្ហាញខ្លួនលេងលើទីលានបានចំនួន ៤ប្រកួតរួចក៏បញ្ចប់អាជីពជាកីឡាករបាល់ទាត់។

បច្ចុប្បន្នគ្រូបង្វឹករូបនេះមានវ័យទើបតែ ៣១ ឆ្នាំប៉ុណ្ណោះ មានកម្ពស់១,៨០ម៉ែត្រកើតនៅប្រទេសអាហ្សង់ទីន (អ្នកគាំទ្រ Messi ) ហើយលេងក្នុងតួនាទីជាខ្សែបម្រើ។ លោកចាប់ផ្ដើមចាប់អាជីពជាគ្រូបង្វឹកនេះ ជាមួយ Honda តែម្ដងកាលពីឆ្នាំមុន ហើយបច្ចុប្បន្នកាន់ A Licence៕

អត្ថបទ៖ ប្រុស យុទ្ធ