ល្បិចពិសេសមួយ អាចសម្អាតរន្ធសាក iPhone បានស្អាត មិនជឿសាកបាន!

2019-09-12 09:27:25
ចំនួនមតិ 0 | ចំនួនចែករំលែក 0

ចន្លោះមិនឃើញ

រន្ធក្រោម iPhone ជាតំបន់ឧស្សាហ៍ប្រើជាងគេ ទាំងការសាកថ្ម ឬបញ្ជូនទិន្នន័យចេញ ឬចូលជាមួយឧបករណ៍ពាក់ព័ន្ធ។ យូរៗទៅ រន្ធនេះ អាចស្ទះ មិនដំណើរការប្រក្រតី ដោយសារករណីនានា។ ការសម្អាតគួរធ្វើ ពេលសម្គាល់ឃើញថា ដោតខ្សែសាកមិនដិត ឬលែងដំណើរការ ឬពេលឃើញធូលីដីច្រើនពេកក្នុងនោះ។

ជម្រើសទី១៖ ប្រើឧបករណ៍ផ្លុំខ្យល់

បើអាចទៅរួច គួរសម្អាតរន្ធសាកនេះ ដោយមិនប៉ះសមាសធាតុខាងក្នុង (ជើង Pin ចម្លងចរន្ត)។ បើផ្នែកខាងក្នុងនោះ ខូចទ្រង់ទ្រាយ ការសាកថ្មនឹងមិនដំណើរការឡើយ ទោះប្រឹងសម្អាតយ៉ាងណាក៏ដោយ។ដំណោះស្រាយគឺមានតែប្តូរជើងសាក។

គួរប្រើឧបករណ៍ផ្លុំខ្យល់ ដើម្បីរុញច្រានធូលីដីចេញ ប៉ុន្តែកុំដាក់បំពង់ផ្លុំកៀកពេក ឬដាក់អឹបនឹងរន្ធ។ ការផ្លុំគួរបាញ់ខ្យល់ក្នុងល្បឿនលឿន។ គួរដឹងថា ការផ្លុំប្រើមាត់ មិនជួយអ្វីបានដល់ការសម្អាតឡើយ។

ជម្រើសទី២៖ ប្រើឈើចាក់ធ្មេញ

សំពាធខ្យល់ ពេលខ្លះជួយសម្អាតបានតែធូលីដីប៉ុណ្ណោះ ខណៈសំនឹក ក្អែលនៅជាប់នោះប្រហែលជាមិនជ្រះឡើយ។ គួរប្រើឈើចាក់ធ្មេញ លូកអូសសម្អាត ដោយសារឈើទន់ និងងាយបត់បែនជាងប្លាស្ទិក ឬខ្សែ។

បិទ iPhone កាន់ឈើចាក់ធ្មេញ ស្វែងរកចំណុចសម្អាតក្រោមពន្លឺចង្កៀង។ ការសម្អាត គួរដាក់សំពាធស្រាលៗ ជាពិសេសចំណុចមានពណ៌មាស ហើយបើឃើញថាឈើអូសចេញមកមានសំនឹក ក្អែល គួរបញ្ឈប់ ហើយប្រើសំពាធខ្យល់ផ្លុំចេញបន្ថែម។

ជម្រើសទី៣៖ សុំជំនួយពីអ្នកជំនាញ

បើអ្នកគ្មានទំនុកចិត្ត ក្នុងការសម្អាត ខ្វះឧបករណ៍គ្រប់គ្រាន់ អាចរកជាងសុំជំនួយបាន ប៉ុន្តែប្រហែលត្រូវចំណាយថវិកា។ ករណីមិនដំណើរការ អាចផ្លាស់ប្ដូរជើងសាកតែម្តងក៏មាន ៕

អានអត្ថបទ

ប្រភព៖ DigitalTrends អត្ថបទ៖ ប៊ុនធឿន