Toyota ចេញលក់ RAV4 2021 មួយប្រភេទ កម្លាំងខ្លាំងហើយស៊ីសាំងតិចជាង RAV4 នានាទាំងអស់

2019-11-20 08:55:32
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្នុងកម្មវិធី Los Angeles Auto Show ក្រុមហ៊ុន Toyota បានបង្ហាញចេញរថយន្ត RAV4 Prime ស៊េរីឆ្នាំ ២០២១ ដែលវាជាប្រភេទរថយន្ត Plug-in Hybrid។

រថយន្តដែលគ្រោងនឹងចេញលក់អំឡុងពាក់កណ្ដាលឆ្នាំក្រោយនេះ គឺជារថយន្តម៉ូដែល RAV4 ដែលមានកម្លាំងខ្លាំងបំផុត ស៊ីប្រេងឥន្ធនៈតិចបំផុត និងជា RAV4 មានសន្ទុះលឿនបំផុត ដែល Toyota ធ្លាប់បានបង្កើត។

ដើម្បីទទួលបានលទ្ធផលទាំងនេះ Toyota បានបំពាក់ម៉ូទ័រអគ្គិសនីដែលមានកម្លាំងខ្លាំងជាងមុន ហើយអាគុយរបស់វាអាចផ្ទុកថាមពលបានច្រើនជាងមុន បើធៀបនឹងប្រភេទ Hybrid ធម្មតា។ ម៉ាស៊ីន ២,៥ លីត្រ ៤ ស៊ីឡាំងរបស់វាក៏មានកម្លាំងខ្លាំងជាងធម្មតា ដែលបង្កើតកម្លាំងបាន ១៧៦ សេះ។

គួបផ្សំចូលគ្នាទៅម៉ាស៊ីន និងម៉ូទ័រអាចបង្កើតកម្លាំងបានសរុប ៣០២ សេះ ដែលខ្លាំងលើសប្រភេទ Hybrid ចំនួន ៨៣ សេះ។ ជាមួយកម្លាំងនេះអាចឲ្យ RAV4 Prime បង្កើនសន្ទុះពី ០-៩៦ គ.ម/ម៉ ក្នុងពេលត្រឹមតែ ៥,៨ វិនាទី។

មិនទាន់ចប់នោះទេគឺ RAV4 Prime អាចបើកបរដោយប្រើប្រាស់ថាមពលអគ្គិសនីសុទ្ធបានចម្ងាយ ៦៣ គីឡូម៉ែត្រ។ Toyota និយាយថាវាជារយៈចម្ងាយដែលឆ្ងាយដាច់គេមួយបើមើលលើរថយន្ត SUV ប្រភេទ PHEV។ បន្ថែមពីនេះការប៉ាន់ស្មានលើកម្រិតស៊ីប្រេងគឺ ១០០ គ.ម ស៊ីប្រេងប្រមាណ ២,៦ លីត្រ។

រថយន្ត RAV4 Prime ឆ្នាំ ២០២១ នឹងមានលក់ក្នុងពីរជម្រើសគឺ SE និង XSE ដែលមានការលេងគ្រឿងខុសគ្នាបន្តិចបន្តួច។ នៅផ្នែកខាងក្នុងមានចង្កូតស្រោបដោយស្បែក, កៅអីជួរមុខមានមុខងារកម្ដៅ, អេក្រង់បង្ហាញ ៨ អ៊ីញ និងមាន Amazon Alexa, Android Auto និង Apple CarPlay ផងដែរ។ បញ្ជាក់ថាតម្លៃលក់នៅមិនទាន់បង្ហាញចេញនៅឡើយទេ៕

ចុចអាន ៖ ក្រុមហ៊ុនឡានអេស្ប៉ាញ បង្ហាញរាងម៉ូតូអគ្គិសនីដំបូង ជិះបានចម្ងាយ ១១៥ គ.ម

ប្រភព៖ carscoops ប្រែសម្រួល៖ សុខហេង