រឿងរាវ១១យ៉ាងដែលត្រូវប្រឈមមុខ បើចង់ទៅរស់នៅលើភពអង្គារ
- 2019-11-20 09:35:24
- ចំនួនមតិ 0 | ចំនួនចែករំលែក 0
រឿងរាវ១១យ៉ាងដែលត្រូវប្រឈមមុខ បើចង់ទៅរស់នៅលើភពអង្គារ
ចន្លោះមិនឃើញ
អ្នកវិទ្យាសាស្រ្តមួយចំនួនមានការគិតដូចគ្នាថា នៅថ្ងៃខាងមុខមនុស្សនឹងអាចធ្វើដំណើរទៅរស់នៅលើភពអង្គារនេះបាន។ ប៉ុន្តែដើម្បីអាចទៅរស់នៅលើភពពណ៌ក្រហមនោះបាន គេត្រូវប្រឈមមុខនឹងកត្តាមួយចំនួនដូចខាងក្រោមនេះ៖
១. ការធ្វើដំណើរ៖
ដើម្បីអាចធ្វើដំណើរទៅដល់ភពអង្គារគឺត្រូវចំណាយប្រាក់អស់ច្រើន។ បើយោងតាមបេសកកម្មភពអង្គាររបស់អង្គការណាសានាពេលបច្ចុប្បន្ននេះគឺគេត្រូវចំណាយទឹកប្រាក់ប្រមាណ៥០ពាន់លានដុល្លារដើម្បីធ្វើដំណើរទៅកាន់ភពអង្គារ។ ប៉ុន្តែការធ្វើដំណើរនេះអាចបន្ថយមកតម្លៃទាបបានត្រឹម ៥ពាន់លាន ទៅ ២០ពាន់លានដុល្លារ។
២. ភាពប្រថុយប្រថានពេលធ្វើដំណើរ៖
ទោះបីជាដំណើរការចុះចត និងការបង្ហោះយានអវកាសមិនមានបញ្ហាអ្វីក្ដី ប៉ុន្តែប្រព័ន្ធទ្រទ្រង់ជីវិតអាចនឹងមានការខូចខាតដោយប្រការណាមួយ នៅកំឡុងពេលនៃការធ្វើដំណើររយៈពេល៩ខែទៅកាន់ភពក្រហមនេះ។
៣. គ្រោះថ្នាក់ពេលចុះចត៖
ទោះបីជាមានលទ្ធភាពធ្វើដំណើរ និងអាចធ្វើដំណើរមកដល់ភពអង្គារដោយសុវត្ថិភាពក្ដី ប៉ុន្តែការចុះចតលើភពនេះមិនមែនជាការងាយស្រួលឡើយ។ បច្ចុប្បន្ននេះមិនទាន់មានបច្ចេកវិទ្យាណាអាចឲ្យមនុស្សចុះចតលើភពអង្គារដោយសុវត្ថិភាពនោះទេ។
៤. សីតុណ្ហាភាពត្រជាក់ខ្លាំង៖
សីតុណ្ហភាពជាមធ្យមលើភពអង្គារគឺ -២៧អង្សា។ សម្រាប់រដូវក្ដៅវិញតំបន់ដែលស្ថិតនៅជិតខ្សែអេក្វាទ័រមានសីតុណ្ហភាពដល់ទៅ-២១អង្សា ចំណែកឯរដូវរងានៅតំបន់ប៉ូលមានសីតុណ្ហភាពដល់ទៅ -៩៣អង្សាឯណោះ។
៥. បញ្ហាបរិយាកាស៖
ស្រទាប់បរិយាកាសនៅលើភពអង្គារមានផ្ទុកអុកស៊ីហ្សែនតែ ០,១៥ភាគរយប៉ុណ្ណោះ ប្រៀបនឹងផែនដីមាន ២១ភាគរយ ដែលនេះស្ទើរតែមិនគ្រប់គ្រាន់សម្រាប់ការដង្ហើមឡើយ។ ៩៦ភាគរយនៃបរិយាកាសគឺពោរពេញទៅដោយកាបូនឌីអុកស៊ីត។
៦. ស្រទាប់បរិយាកាសស្ដើង៖
ស្រទាប់បរិយាកាសស្ដើងពេកមិនអាចទប់ទល់នឹងសារធាតុវិទ្យុសកម្មមួយចំនួនដូចជា កាំរស្មីយូវីរបស់ព្រះអាទិត្យជាដើម។ សារធាតុវិទ្យុសកម្មនេះអាចធ្វើឲ្យរុក្ខជាតិ ព្រមទាំងកោសិការបស់សត្វរងការខូចខាត។
៧. ការដាំដំណាំ៖
ការដាំដំណាំអាចជួបបញ្ហាប្រសិនបើដីនៅលើភពអង្គារមិនមែនជាដីដែលមានជីជាតិដូចជាផែនដីទេនោះ។ អ្នកវិទ្យាសាស្ត្រធ្លាប់បង្ហាញនាពេលកន្លងមកថា មិនមានជីវិតរស់នៅក្នុងដីរបស់ភពអង្គារឡើយ សូម្បីតែបាក់តេរី។
៨. ពន្លឺ៖
ភពអង្គារទទួលបានពន្លឺត្រឹមតែមួយភាគបីនៃពន្លឺព្រះអាទិត្យតែប៉ុណ្ណោះ ដូចនេះអាចចំណាយពេលយូរសម្រាប់ឧបករណ៍ដែលប្រើប្រាស់ផ្ទាំងសូឡាដើម្បីបញ្ចូលថាមពល រួមទាំងការដាំដំណាំផងដែរ។
៩. ព្យុះធូលីដី៖
ព្យុះធូលីដីបានកើតមានលើភពមួយនេះជាញឹកញាប់ដោយមានរយៈពេលប្រមាណពីរទៅបីថ្ងៃ និងមានល្បឿន៥៣ទៅ១០៦គ.ម/ម៉។ ពេលខ្លះព្យុះនេះអាចមានទំហំធំដែលអាចគ្រប់ដណ្ដប់ភពនេះទាំងមូលបានក្នុងរយៈពេលរាប់សប្ដាហ៍ឯណោះ។
១០. ទំនាក់ទំនង៖
ភពអង្គារមានចម្ងាយ១២,៥ពន្លឺនាទីពីភពផែនដី នេះមានន័យថាត្រូវចំណាយពេលយ៉ាងហោចណាស់២៥នាទីទើបសម្ដីរបស់អ្នកអាចទៅដល់ផែនដីបាន។
១១. ទឹក៖
ទោះបីជាណាសាបានប្រកាសថា រកឃើញទឹកនៅលើភពអង្គារក៏ពិតមែន ប៉ុន្តែគេមិនបានបញ្ជាក់ថា ទឹកនោះកើតមានឡើងដោយថិតថេរ និង អាចប្រើប្រាស់បានឬយ៉ាងណា៕
© រក្សាសិទ្ធិគ្រប់យ៉ាងដោយ Sabay ឆ្នាំ២០២៤
គោលការណ៍ភាពឯកជន | Privacy Policy
អាសយដ្ឋាន
អគារលេខ ៣០៨ មហាវិថីព្រះមុន្នីវង្ស
សង្កាត់បឹងរាំង ខណ្ឌដូនពេញ
Sabay Digital Corporation ជាក្រុមហ៊ុនព័ត៌មានឌីជីថល និងកម្សាន្តឈានមុខគេនៅកម្ពុជា។ ព័ត៌មានបន្ថែម
ផលិតផល និង សេវាកម្ម របស់ Sabay
