Apple ទិញបានក្រុមហ៊ុនមួយ នឹងជួយឲ្យ iPhone ថតរូបបានកាន់តែខ្លាំង

2019-12-16 01:53:52
ចំនួនមតិ 0 | ចំនួនចែករំលែក 0

ចន្លោះមិនឃើញ

Apple បានទិញយកនូវក្រុមហ៊ុនទើបបង្កើតថ្មីថ្មោងមួយនៅចក្រភពអង់គ្លេស ដែលបង្កើតនូវបច្ចេកវិទ្យាឌីហ្សាញឡើងសម្រាប់ធ្វើឲ្យការថតរូបលើស្មាតហ្វូនកាន់តែល្អប្រសើរ។ ការចុះផ្សាយរបស់ Bloomberg បានឲ្យដឹងថា Apple បានទិញយកក្រុមហ៊ុន Spectral Edge ដោយមិនបង្ហាញខ្ទង់ចំណាយនោះទេ។

Spectral Edge ប្រើប្រាស់ Machine Learning ដើម្បីធ្វើឲ្យរូបភាពផលិតលើស្មាតហ្វូនកាន់តែមានភាពច្បាស់ និងឲ្យពណ៌ត្រូវ។ វាដំណើរការដោយពឹងផ្អែកលើការថតយករូបភាព Infrared រួចបញ្ចូលវាជាមួយរូបភាពស្តង់ដារ។

Apple អាចយកបច្ចេកវិទ្យា Spectral Edge មកប្រើប្រាស់ជាមួយកម្មវិធីថតរូបលើ iPhone បានដោយងាយ ដោយក្រុមហ៊ុននេះបានប្រើប្រាស់នូវបច្ចេកវិទ្យាឆ្លាតវៃបែបនេះរួចមកហើយ មានដូចជា Smart HDR និង Deep Fusion ជាដើម។

Apple មិនបានបញ្ជាក់ពីការទិញយកនេះនៅឡើយទេ ប៉ុន្តែ Bloomberg អះអាងថា ឯកសារ និងការចុះបញ្ជីមួយចំនួន បានបង្ហាញថា Apple គឺជាអ្នកគ្រប់គ្រង Spectral Edge។ ជាញឹកញាប់ Apple តែងធ្វើការទិញយកក្រុមហ៊ុនតូចៗដែលស្ថិតក្នុងក្រសែភ្នែករបស់ខ្លួន។ នៅខែឧសភា លោក Tim Cook បានប្រាប់ថា Apple ទិញយកក្រុមហ៊ុនពី ២០ ទៅ ២៥ ក្នុងរយៈពេល ៦ ខែមុន៕

ចុចអាន ៖ ២-៣ សប្ដាហ៍ម្ដង Apple ទិញចូលក្រុមហ៊ុនមួយ

ប្រភព៖ 9to5Mac ប្រែសម្រួល៖ សុខហេង