ព្រឹត្តិការណ៍ "ជំនោរ Art” ក្រោយជោគជ័យនៅបាត់ដំបង សម្លឹងឃើញការសាបព្រួសនៅតំបន់អាស៊ី
- 2019-12-25 02:29:15
- ចំនួនមតិ 0 | ចំនួនចែករំលែក 0
ព្រឹត្តិការណ៍ "ជំនោរ Art” ក្រោយជោគជ័យនៅបាត់ដំបង សម្លឹងឃើញការសាបព្រួសនៅតំបន់អាស៊ី
ចន្លោះមិនឃើញ
ព្រឹត្តិការណ៍ "ជំនោរ Art” បានប្រារព្ធធ្វើកណ្ដាលក្រុងបាត់ដំបង តាមបណ្ដោយផ្លូវ ២.៥ ដោយបានប្រមូលផ្តុំក្រុមវិចិត្រករ សិល្បករសហសម័យ ជាច្រើនមកតាំងបង្ហាញផ្ទាំងគំនូរ គូរគំនូរ ព្រមទាំងបង្ហាញស្នាដៃសិល្បៈរបស់ខ្លួនជាសាធារណៈ បង្កើតបានជាទិដ្ឋភាពអ៊ូរអរ ភ្ញាក់ផ្អើលដល់បរទេសនានាមកទស្សនា។
ការរៀបចំស្នាដៃបង្ហាញនេះរៀបចំឡើងដោយវិចិត្រករ និងជាសិល្បករ ផលិតករគំនូរជីវចល លោក ប៉ោយ ឈុនលី ជាមួយ សិល្បករ វិចិត្រករជាច្រើនផ្សេងទៀតក្នុងខេត្តបាត់ដំបង ដែលមានកេរ្តិ៍ឈ្មោះ និងមានសមត្ថភាពប្លែកៗពីគ្នា។ លោក ប៉ោយ ឈុនលី អ្នកផ្ដួចផ្ដើមគំនិត បានលើកឡើងថា អ្វីដែលលោកបានធ្វើ គឺដើម្បីតបស្នងដល់ខេត្តដែលបានផ្ដល់កំណើតឲ្យលោក តាមរយៈសិល្បៈ ដើម្បីភាពរីកចម្រើនជាមួយគ្នា។ "ខ្ញុំតែងតែមានគោលបំណងផ្តល់អ្វីម្យ៉ាងមកដល់ខេត្តរបស់ខ្ញុំវិញ ជាការពិតណាស់នេះជាការបង្ហាញសមត្ថភាពរបស់វិចិត្រករ ហើយយើងក៏ចង់ឱ្យអ្នកសិល្បៈចេះធ្វើការរួមគ្នាដើម្បីរីកចម្រើនជាមួយគ្នា”។
ការរៀបចំ កម្មវិធីពិព័រណ៍សិល្ប:ចម្រុះរបស់ "ជំនោរ ART" លើដងផ្លូវលេខ ២.៥ ក្នុងក្រុងបាត់ដំបង បានប្រព្រឹត្តិទៅនៅថ្ងៃទី ២១-២២ ខែធ្នូ ឆ្នាំ ២០១៩ ប្រកបដោយភាពជោគជ័យ ដោយក្នុងកម្មវិធីមានការចូលរួមពីសិល្បករ ៧០ រូប ជាមួយស្នាដៃជាង ៤០០ ដាក់តាំង ថែមទាំងមានការបង្ហាញសិល្បៈសម្ដែងប្លែក ទាក់ទាញគួរឱ្យភ្ញាក់ផ្អើលតាំងពីម៉ោង ៣ រសៀលរហូតដល់ម៉ោង ៩យប់។ ទទឹមនឹងភាពជោគជ័យ ដោយមានការគាំទ្រ ចូលរួមទស្សនាពីមហាជនជាង ២០០០ នាក់ក្នុងរយៈពេល ២ ថ្ងៃនេះ លោក ប៉ោយ ឈុនលី ប្រាប់ថាគម្រោងនេះ គិតទុករយៈពេល ៥ ឆ្នាំ ហើយរៀបគម្រោង ៣ ខែចុងក្រោយនេះទើបសម្រេចចេញជារូបរៀង ដោយឥតមានម្ចាស់ឧបត្ថម្ភទេ តែនេះជាការចូលរួមគ្នាពីសិល្បករទាំងអស់រួមគ្នា។
លោក ឈុនលី បន្តថា កម្មវិធីពិព័រណ៍សិល្ប:ចម្រុះរបស់ "ជំនោរ ART" នឹងត្រៀមខ្លួនបង្ហាញវត្តមានកាន់តែធំ និងពិសេសជាងឆ្នាំនេះទៀតនៅឆ្នាំក្រោយ។ ដោយសារការសង្កេតឃើញថា មានការពេញនិយម ពិសេសទទួលបានការគាំទ្រគ្រប់មជ្ឈដ្ឋានបែបនេះ ទើបលោកយល់ថា កម្មវិធីពិព័រណ៍សិល្ប:ចម្រុះរបស់ "ជំនោរ ART" នឹងមានឥទ្ធិពលក្នុងតំបន់អាស៊ីនៅថ្ងៃខាងមុន ឱ្យតែមានការរួបរួមគ្នាពីសិល្បករខ្មែរ ទាំងក្មេងចាស់ គ្រប់សម័យ ដើម្បីប្រយោជន៍ និងកេរ្តិ៍ឈ្មោះជាតិជាធំ៕