ម្ចាស់បទសិល្បៈគុនខ្មែរ MC BULL ស្វាគមន៍ដៃពីរអ្នកចង់ឧបត្ថម្ភដើម្បីបង្កើតបទចម្រៀងគុនខ្មែរថ្មីៗទៀត

2020-01-08 04:49:31
ចំនួនមតិ 0 | ចំនួនចែករំលែក 0

ចន្លោះមិនឃើញ

តារាចម្រៀង RAP ល្បីឈ្មោះ MC BULL ស្វាគមន៍ជានិច្ចចំពោះសប្បុរសជន ណាដែលចង់ចូលរួមជួយជាថវិកាក្នុងការផលិតបទចម្រៀងគុនខ្មែរថ្មីៗ ព្រោះថាបច្ចុប្បន្ននេះមិនសូវមានអ្នកចាប់អារម្មណ៍ជួយនោះទេ។

MC BULL

ម្ចាស់បទសិល្បៈគុនខ្មែរដែលគេតែងចាក់ស្ទើរគ្រប់កម្មវិធីប្រដាល់ ឬគ្រប់សង្វៀនប្រដាល់ខាងលើនេះបានឲ្យដឹងថា សម្រាប់ឆ្នាំថ្មី ២០២០ នេះមិនទាន់មានគម្រោងថានឹងផលិតបទគុនខ្មែរថ្មីៗបន្ថែមទៀតនោះទេ ដោយសារតែមិនមានថវិកាក្នុងការធ្វើវា។

MC BULL

MC BULL ប្រាប់ទៀតថា បើសិនមានអ្នកជួយជាថវិកា លោកមិនគិតយូរទេដឹងតែធ្វើបទថ្មីៗទាក់ទងនិងគុនខ្មែរបន្ថែមទៀតហើយ ណាមួយបទដែលផលិតរួចនោះក៏យូរដែរមកហើយ។ តារាចម្រៀងបែប RAP បន្តថា ខ្លួនមានគំនិតផលិតបទចម្រៀងច្រើនទាក់ទង និងខាងប្រដាល់នេះ ហើយអ្វីទាំងអស់ដែលធ្វើនេះគឺចិត្តស្រឡាញ់គាំទ្រវិស័យប្រដាល់ចង់ឲ្យវិស័យប្រដាល់នេះល្បី បើទោះជាខ្លួនស្រឡាញ់ហើយមិនអាចឡើងប្រកួតក៏ដោយ តែអាចសរសេរជាបទចម្រៀងលើកស្ទួយក៏ដូចជាបម្រើអារម្មណ៍ក្នុងវិស័យកីឡានេះបាន ។

MC BULL

រំលឹកដែរថា MC BULL ជាតារាចម្រៀង RAP របស់កម្ពុជាដែលតែងតែផលិតបទ Original Song ដែលទាក់ទងនិងវិស័យប្រដាល់។ បទចម្រៀងដែល MC BULL ធ្វើរួចហើយកន្លងទៅ និងល្បីខ្លាំងនោះរួមមាន សិល្បៈគុនខ្មែរ ព្រលឹងគុនខ្មែរ(សហការជាមួយ CNC) និងបទហនុមាន ជាដើម៕

វីដេអូ៖

អត្ថបទ៖ នួន ស៊ីណា