Apple ប្រកែកមិនព្រមជួយ FBI ពេលនេះលោក ត្រាំ ចេញមុខស្នើសុំដោយផ្ទាល់
- 2020-01-15 01:58:13
- ចំនួនមតិ 0 | ចំនួនចែករំលែក 0
Apple ប្រកែកមិនព្រមជួយ FBI ពេលនេះលោក ត្រាំ ចេញមុខស្នើសុំដោយផ្ទាល់
ចន្លោះមិនឃើញ
ប្រធានាធិបតីអាមេរិកលោក ដូណាល់ ត្រាំ បានចេញមុខសុំឲ្យ Apple ជួយក្នុងការដោះលេខកូដ iPhone របស់ឧក្រិដ្ឋជនដែលបានធ្វើការបាញ់ប្រហារក្នុងរដ្ឋ Florida កាលពីដើមខែធ្នូកន្លងទៅ។
ក្នុងសារដែលបង្ហោះតាម Twitter លោក ត្រាំ បាននិយាយថា ៖ "យើងបានជួយ Apple រហូតមកក្នុងការជួញដូរ និងបញ្ហាដទៃទៀតជាច្រើន ហើយពួកគេនៅតែមិនព្រមជួយដោះលេខកូដលើ iPhone ដែលឃាតករ អ្នកជួញដូរថ្នាំ និងឧក្រិដ្ឋជនដទៃទៀតប្រើប្រាស់។ ពួកគេត្រូវតែធ្វើការចូលរួម និងជួយដល់ប្រទេសដ៏ល្អប្រពៃរបស់យើង ឥឡូវនេះ! ធ្វើឲ្យអាមេរិកល្អប្រពៃម្ដងទៀត។”
ការបញ្ចេញសារទៅកាន់ Apple នាពេលនេះ ក្រោយពី Apple ប្រកែកមិនព្រមជួយភ្នាក់ងារ FBI ក្នុងការដោះលេខកូដរបស់ឧក្រិដ្ឋជន។ Apple បានប្រាប់ថាកន្លងមកខ្លួនបានផ្ដល់ជូននូវព័ត៌មានទាំងអស់ដែលខ្លួនមានរក្សាទុក (រួមមាន iCloud backup) ទៅដល់ភ្នាក់ងារ FBI កាលពីដើមខែ ក្រោយពី FBI សុំឲ្យជួយក្នុងការយកព័ត៌មានរបស់ឧក្រិដ្ឋជន។ យ៉ាងណាក្ដីមន្ត្រីអនុវត្តន៍ច្បាប់មិនពេញចិត្តនឹងព័ត៌មានមានក្នុង iCloud ដែលខ្លួនទទួលបាន ហើយចង់ឲ្យ Apple ផ្ដល់នូវវិធីមួយដើម្បីដោះលេខកូដ iPhone របស់ឧក្រិដ្ឋជន ដែលវាមិនអាចកើតមាននោះទេប្រសិនបើគ្មាន Backdoor ចូលទៅក្នុង Software iOS។
ក្រោយពីមានសំណើនេះ Apple បានបញ្ចេញសេចក្ដីថ្លែងការណ៍មួយទៀត និងបានផ្ដល់ព័ត៌មានលម្អិតបន្ថែមអំពីទិន្នន័យដែលខ្លួនបានផ្ដល់ ហើយបានលើកឡើងម្ដងទៀតថា "វាគ្មាននូវ Backdoor ដែលបង្កើតឡើងសម្រាប់តែមនុស្សល្អនោះទេ”។
ភាពតានតឹងរវាង Apple និងរដ្ឋាភិបាលអាមេរិកបច្ចុប្បន្ន គឺស្រដៀងនឹងរឿងហេតុដែលបានកើតឡើងនៅឆ្នាំ ២០១៦ ដែរ។ ពេលនោះ Apple ត្រូវបានតុលាការបញ្ជាឲ្យដោះលេខកូដ iPhone ដែលជារបស់ឧក្រិដ្ឋជនមានសកម្មភាពបាញ់បោះនៅ San Bernardino។ Apple បានប្រកែកនឹងបញ្ជានេះ ដោយបានបកស្រាយថា ការធ្វើឲ្យប្រព័ន្ធសុវត្ថិភាពចុះខ្សោយគឺមិនសមហេតុផលនោះឡើយ ហើយវាអាចបង្កើតនូវចំណុចខ្សោយថ្មីមួយទៀតហើយគ្រោះថ្នាក់។ ពេលនោះ នៅចុងក្រោយ Apple ជាអ្នកឈ្នះ ដោយរដ្ឋាភិបាលអាចរកវិធីផ្សេងក្នុងការចូលទៅកាន់ iPhone របស់ឧក្រិដ្ឋជន ដែលវាក៏អាចជាជម្រើសសម្រាប់ភាពតានតឹងនាពេលនេះផងដែរ៕