YouTuber ម្នាក់ប្ដូរយុទ្ធសាស្ត្រផលិតវីដេអូ អាចរកលុយបានច្រើនជាងមុន ២ដងពី YouTube

2020-01-21 06:41:57
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្រោយពីបានជជែកជាមួយមិត្តភក្ដិជាអ្នកផលិតវីដេអូបង្ហោះលើ YouTube ដូចគ្នានោះ តារា YouTube ឈ្មោះ Shelby Church (មាន Subscriber ១,៤លាននាក់) បានដឹងថាខ្លួនអាចរកចំណូលពីវីដេអូរបស់ខ្លួនច្រើនលើសមុន។

នៅពាក់កណ្ដាលឆ្នាំ ២០១៩ នាងបានដឹងថា តាមរយៈការធ្វើឲ្យវីដេអូមានរយៈពេលជាង ១០ នាទី នាងអាចបង្កើនចំណូលដែលរកពីការដាក់ផ្ទាំងពាណិជ្ជកម្មរបស់ Google បានទ្វេដង។ ចំណូលមួយផ្នែកធំដែល Church អាចរកបានគឺបានពីតាមវិធីនេះ និងតាមរយៈការផ្សាយផលិតលើ Channel និងលើ Instagram។

គួរដឹងថា YouTube អនុញ្ញាតឲ្យគណនីដែលមាន Subscriber ១ពាន់នាក់ និងមានរយៈពេលទស្សនា ៤ ០០០ ម៉ោង អាចរកចំណូលបានជាមួយផ្ទាំងពាណិជ្ជកម្មដែលដាក់ដោយ Google។ ចំណូលដែលរកបានអាស្រ័យលើរយៈពេលទស្សនា (Watch Time), ប្រវែងនៃវីដេអូ, ប្រភេទនៃវីដេអូ និងទីតាំងអ្នកទស្សនាវីដេអូជាដើម។

វិធីសាស្ត្រពេញនិយមមួយដែល YouTuber ប្រើដើម្បីអាចរកចំណូលពីវីដេអូរបស់ខ្លួនបានកាន់តែច្រើននោះ គឺធ្វើឲ្យវីដេអូមានរយៈពេលកាន់តែវែង ដើម្បីអាចបង្ហាញពាណិជ្ជកម្មច្រើន។

ជាក់ស្ដែងនៅឆ្នាំ ២០១៨ វីដេអូភាគច្រើនរបស់ Church គឺមានប្រវែងមិនដល់ ១០នាទី។ ដល់ពាក់កណ្ដាលឆ្នាំ ២០១៩ នាងចាប់ផ្ដើមធ្វើវីដេអូឲ្យវែង ហើយត្រឹមដំណាច់ឆ្នាំគឺអាចរកចំណូលច្រើនជាងឆ្នាំ ២០១៨ ដល់ទៅ ២ដងឯណោះ។

គណនី YouTube ផ្សេងទៀតដូចជា Kevin David (មាន Subscriber ៨៣៨ ០០០ នាក់) និង Marina Mogilko (មាន Subscriber ១,៧ លាននាក់) ក៏បានប្រើវិធីសាស្ត្រនេះដែរ។

Church អះអាងថាវីដេអូរយៈពេល ១០ នាទីរបស់ខ្លួនអាចរកបានប្រមាណ ៥ ដុល្លារ សម្រាប់ចំនួនទស្សនា ១ពាន់ដង ចំណែកវីដេអូក្រោម ១០ នាទីអាចរកបានប្រមាណ ២ដុល្លារប៉ុណ្ណោះ សម្រាប់ចំនួនទស្សនា ១ពាន់ដង៕

ប្រភព៖ Businessinsider ប្រែសម្រួល៖ សុខហេង