ប្រភពថ្មីមួយទៀតនិយាយថា iPhone ស៊េរីថ្មី តម្លៃចាប់ពី ៣៩៩ដុល្លារ

2020-02-10 03:47:30
ចំនួនមតិ 0 | ចំនួនចែករំលែក 0

ចន្លោះមិនឃើញ

ការចេញផ្សាយថ្មីមួយរបស់ទស្សនាវដ្ដី Fast Company បាននិយាយអំពីផែនការប្រកាសចេញ iPhone ស៊េរីថ្មីរបស់ Apple នាអំឡុងខែមីនាខាងមុខ ដែលវាមានតម្លៃចាប់ពី ៣៩៩ ដុល្លារ។

ទស្សនាវដ្ដីខាងលើអះអាងថាប្រភពរបស់ខ្លួន បានប្រាប់អំពីតម្លៃនេះ ដែលវាដូចគ្នានឹងរបាយការណ៍របស់អ្នកវិភាគល្បីឈ្មោះ Ming-Chi Kuo បាននិយាយកាលពីខែតុលា ឆ្នាំ ២០១៩ កន្លងទៅ។

iPhone SE និង iPhone 8

ជាមួយតម្លៃ ៣៩៩ ដុល្លារ iPhone ថ្មី នឹងមានតម្លៃដូចនឹង iPhone SE ចេញឆ្នាំ ២០១៦ ដែលនេះជាមូលហេតុដែលមនុស្សមួយចំនួនហៅវាថា iPhone SE 2។ អ្នកដទៃទៀតបានហៅវាថា "iPhone 9” ប៉ុន្តែគេមិនទាន់ច្បាស់ថា Apple នឹងឲ្យឈ្មោះវាបែបម៉េចនោះទេ។

រូបភាព Render នៃ iPhone តម្លៃធូរស៊េរីថ្មី

ទោះយ៉ាងណាគេបានដឹងអំពីលក្ខណៈសម្បត្តិមួយចំនួនរបស់វា តាមរយៈដំណឹងលេចធ្លាយជាច្រើន។ iPhone ស៊េរីធូរជំនាន់ថ្មី នឹងមានការឌីហ្សាញស្រដៀងនឹង iPhone 8 និងមានប៊ូតុង Home បង្កប់ដោយ Touch ID។ វានឹងមានប្រើឈីប A13 ដែលអាចមាន RAM ទំហំ ៣GB ជាមួយជម្រើសអង្គផ្ទុក ៦៤GB និង ១២៨GB។ ដើម្បីរក្សាតម្លៃឲ្យទាប វានឹងប្រើប្រាស់កាមេរ៉ាតែមួយគ្រាប់នៅផ្នែកខាងក្រោយ។

ការផលិត iPhone ថ្មីនេះ គ្រោងថាចាប់ផ្ដើមនាខែកុម្ភៈ ប៉ុន្តែរោងចក្រផ្គត់ផ្គង់របស់ Apple ត្រូវបានបិទដំណើរការនាពេលបច្ចុប្បន្ននេះ ដោយសារការផ្ទុះវីរុសកូរ៉ូណានៅប្រទេសចិន។ គេមិនច្បាស់ថាវានឹងប៉ះពាល់ដល់ផែនការផលិត ឬកាលបរិច្ឆេទចេញលក់អាចមានការពន្យារពេលយ៉ាងណានោះទេ៕

អត្ថបទ៖ សុខហេង