ជួយគ្នា! ទូតអាមេរិក និងមេ WHO អរគុណទឹកចិត្តកម្ពុជា ដែលឱ្យនាវា Westerdam បានចត

2020-02-13 02:01:34
ចំនួនមតិ 0 | ចំនួនចែករំលែក 0

ចន្លោះមិនឃើញ

ប្រទេសកម្ពុជា បានសម្រេចឱ្យនាវា Westerdam របស់អាមេរិកផ្ទុកមនុស្សជាង២ពាន់នាក់ចូលចតនៅព្រឹកមិញនេះ ក្រោយពីប្រទេសជាច្រើនបដិសេធមិនព្រមឱ្យចូលចតនោះទេ ព្រោះខ្លាច Corona ។

នាវាខ្នាតយក្ស Westerdam ដែលបានសុំចតនៅកំពង់ផែ ក្រុងព្រះសីហនុ

ការឱ្យចូលចតរបស់កម្ពុជានេះគឺធ្វើតាមសម្ដេចតេជោ ហ៊ុន សែន ដែលបានផ្ដល់កន្លែងនិងជួយសង្គ្រោះដល់អ្នកដែលស្ថិតនៅលើនាវានោះ ខណៈដែលពួកគេអស់ស្បៀងអាហារទៅហើយ។ ទឹកចិត្តដ៏ល្អប្រពៃនេះ ត្រូវបានទូតអាមេរិក ប្រចាំនៅកម្ពុជា ថ្លែងអំណរគុណជាខ្លាំង ត្បិតអីប្រទេសជាច្រើនមិនព្រមឱ្យនាវានេះបានចូលចតនោះទេ មានតែកម្ពុជាប៉ុណ្ណោះ។

ដោយឡែកលោក Tedros Adhanom Ghebreyesus ប្រធានអង្គការសុខភាពពិភពលោក WHO វិញ ក៏បានសរសេរសារអរគុណដល់កម្ពុជា ដែលបានផ្ដល់កន្លែងចតឱ្យនាវាផ្ទុកមនុស្សជាង២ពាន់នាក់នេះដែរ។ លោកបានបញ្ជាក់ថានេះជាសន្ដានចិត្តមួយ បង្ហាញពីការសាមគ្គីគ្នា ដើម្បីបំបាក់ជំងឺ Corona ។

រំលឹកថា នាវា Westerdam នេះត្រូវបានប្រទេសជាច្រើន ដូចជាហ្វីលីពីន ជប៉ុន តៃវ៉ាន់ និងថៃជាដើម បានបដិសេធមិនព្រមឱ្យចូលចតនោះទេ ដោយសង្ស័យថាមានអ្នកផ្ទុកមេរោគ Corona លើនោះ។ យ៉ាងណាមិញ បើតាមការបញ្ជាក់របស់មេបញ្ជាការលើនាវា គឺមនុស្សទាំងជាង២ពាននាក់ គ្មានរោគសញ្ញាឬផ្ទុកមេរោគ Corona នោះទេ។ ពួកគេមានសុខភាពល្អធម្មតា៕

អត្ថបទ៖ ប្រុស យុទ្ធ