ម៉ាកឡានប្រណីតកូរ៉េ Genesis យកឈ្នះ Lexus ក្នុងការសិក្សាមួយ

2020-02-14 02:49:17
ចំនួនមតិ 0 | ចំនួនចែករំលែក 0

ចន្លោះមិនឃើញ

ម៉ាករថយន្តប្រណីតរបស់កូរ៉េខាងត្បូង Genesis បានឈរនៅលើតំណែងកំពូលក្នុងការសិក្សាផ្នែកVehicle Dependability Studyជាការសិក្សាប្រចាំឆ្នាំរបស់ J.D. Power នៅអាមេរិក។

Vehicle Dependability Study គឺជាការវាស់វែងលើចំនួននៃបញ្ហាក្នុងចំណោមរថយន្ត ១០០ គ្រឿង ដែលម្ចាស់រថយន្តជួបប្រទះផ្ទាល់ក្នុងរយៈពេល ១២ ខែចុងក្រោយ សម្រាប់រថយន្តដែលមានអាយុកាល ៣ ឆ្នាំ។ សម្រាប់ឆ្នាំ ២០២០ ការសិក្សាគឺផ្ដោតលើរថយន្តម៉ូដែលឆ្នាំ ២០១៧ ដោយរថយន្តបានពិន្ទុទាបគឺមានន័យថាមានគុណភាពខ្ពស់។

ក្នុងការសិក្សា Genesis ស្ថិតនៅតំណែងខ្ពស់ជាងគេ ក្នុងចំណោមម៉ាករថយន្តដទៃទៀត ដោយមាន ៨៩ បញ្ហាក្នុងរថយន្ត ១០០ គ្រឿង អាចយកឈ្នះ Lexus ដែលមាន ១០០ បញ្ហាក្នុងរថយន្ត ១០០ គ្រឿង។ អ្វីដែលភ្ញាក់ផ្អើលគឺ នេះជាលើកដំបូងដែល Genesis ត្រូវបានបញ្ចូលក្នុងការសិក្សាដែលមានរយៈពេល ៣១ ឆ្នាំនេះ។

មានក្រុមហ៊ុនរថយន្តមួយចំនួនឃើញថាទទួលបានពិន្ទុល្អប្រសើរជាងមុនធៀបនឹងឆ្នាំ ២០១៩។ ឧទាហរណ៍ដូចជាម៉ាករថយន្ត Cadillac ដែលថយចុះបញ្ហាចំនួន ៣៣ ក្នុងរថយន្ត ១០០ គ្រឿង ចំណែក Mazda ថយចុះបញ្ហាចំនួន ២៩, Lincoln ថយចុះបញ្ហា ២៨, Ford ថយចុះបញ្ហា ២០, Buick ថយចុះបញ្ហា ១៥ ផងដែរ។

បើគិតតែលើម៉ូដែលនីមួយៗវិញ Lexus ES ជាម៉ូដែលដែលមានបញ្ហាតិចជាងគេគឺ មាន ៥២ បញ្ហាក្នុងចំណោមរថយន្ត ១០០ គ្រឿង ជាពិន្ទុខ្ពស់បំផុតមួយក្នុងប្រវត្តិសាស្ត្រនៃការសិក្សានេះ៕

ប្រភព៖ carscoops ប្រែសម្រួល៖ សុខហេង