ពាន ISF Lan Thompson ឆ្នាំនេះ មានក្មេងៗចូលរួមដល់៥៤០នាក់មកពី១០ខេត្តក្រុង

2020-02-24 06:43:48
ចំនួនមតិ 0 | ចំនួនចែករំលែក 0

ចន្លោះមិនឃើញ

អង្គការផ្កាយសមុទ្រ បានបង្កើតពានរង្វាន់ ISF Lan Thompson កាលពីថ្ងៃទី២២ខែកុម្ភៈឆ្នាំ២០២០កន្លងទៅនេះ ដើម្បីរំលឹកដល់លោក Lan Thompson បុគ្គលដែលស្រលាញ់បាល់ទាត់បំផុត។

ពានរង្វាន់ខាងលើនេះដែរ មានក្រុមចូលរួមយ៉ាងច្រើន និងក្មេងៗសរុបដល់ទៅ៥៤០នាក់ ដោយក្នុងនោះមកពីបណ្ដាខេត្តរហូតដល់១០ឯណោះ។ ក្រុមក្មេងៗទាំងអស់នេះ បានបែងចែកជាក្រុម U10 U14 និង U16 ប្រកួតគ្នាពេញ១ថ្ងៃ ស្វែងរកជើងខ្លាំង នៅទីលានរបស់អង្គការផ្កាយសមុទ្រ។ វាជាការប្រកួតមួយដែលធ្វើឡើង៧ឆ្នាំមកហើយ ក្នុង១ឆ្នាំធ្វើម្ដង ដើម្បីរំលឹកដល់លោក Lan Thompson ដែលបានទទួលមរណភាពកាលពីឆ្នាំ២០០១។

លោក យិន សាមឌី អ្នកគ្រប់គ្រងកម្មវិធីបាល់ទាត់ខាងលើបានបញ្ជាក់ថាកម្មវិធីប្រកួតខាងលើ មិនត្រឹមតែបានរំលឹកដល់លោក Lan Thompson នោះទេ។ វាក៏ជាឱកាសសម្រាប់ក្មេងៗតាមបណ្ដាខេត្ត មានឱកាសបានជួបគ្នា ប្រកួតប្រជែង និងបង្កើតភាពស្និទ្ធស្នាល ស្គាល់គ្នាឱ្យកាន់តែច្រើនផងដែរ។

សូមរំលឹកថាលោក Lan Thompson មិនមែនជាកីឡាករបាល់ទាត់ល្បីឈ្មោះអ្វីនោះទេ ប៉ុន្តែលោកជាអ្នកចូលចិត្តវិស័យកីឡាបាល់ទាត់ខ្លាំងណាស់។ លោក តែងតែបង្កើតជាការប្រកួតពានរង្វាន់បាល់ទាត់នានា នៅពេលលោកនៅមានជីវិត។ ដូច្នេះហើយ ទើបបានជាគេបង្កើតពានរង្វាន់ខាងលើឡើង ដើម្បីរំលឹកដល់អ្វីដែលលោកធ្លាប់ធ្វើកន្លងមក៕

អត្ថបទ៖ វ៉ាន់ សក្ដិ