ស្ងាត់ៗ Apple ប្រកាសចេញ iPad Pro ថ្មីប្រើកាមេរ៉ាភ្លោះ តម្លៃចាប់ពី ៧៩៩ដុល្លារ

2020-03-18 13:01:15
ចំនួនមតិ 0 | ចំនួនចែករំលែក 0

ចន្លោះមិនឃើញ

Apple បានប្រកាសចេញ iPad Pro ស៊េរីថ្មី ដែលមានជម្រើសទំហំអេក្រង់ចំនួនពីរ មានតម្លៃចាប់ពី ៧៩៩ដុល្លារ និងចាប់ពី ៩៩៩ដុល្លារ សម្រាប់ប្រភេទប្រើ Wi-Fi ហើយមានតម្លៃចាប់ពី ៩៤៩ដុល្លារ និង ១១៤៩ដុល្លារ សម្រាប់ប្រភេទប្រើស៊ីមបូក Wi-Fi។ iPad ទាំងពីរមានទទួលការកុម្ម៉ង់ទិញលើអនឡាញចាប់ពីពេលនេះ ដែលនឹងដឹកជញ្ជូនឲ្យអតិថិជនចាប់ពីថ្ងៃទី ២៥ ខែមីនា។

iPad Pro ទាំងពីរដែលមានអេក្រង់ទំហំ ១១ អ៊ីញ និង ១២,៩ អ៊ីញ មានរូបរាងដូច iPad Pro ចេញកាលពីឆ្នាំមុនដែរ ប៉ុន្តែមានប្រើបន្ទះឈីបថ្មី និងប្រព័ន្ធកាមេរ៉ាថ្មី។ អ្វីដែល Apple អួតជាមួយ iPad Pro ថ្មី គឺមាននូវ Sensor សម្រាប់ស្កេនឈ្មោះ LIDAR ដែលដំណើរការជាមួយកាមេរ៉ាសម្រាប់ការវាស់ជម្រៅនៃវត្ថុបានកាន់តែប្រសើរ ជាពិសេសជាមួយបច្ចេកវិទ្យា AR។

មួយទៀតដែលគេចាប់អារម្មណ៍ខ្លាំងគឺក្ដារចុចថ្មី ដែលវាអាចធ្វើឲ្យ iPad អណ្ដែតនៅទីតាំងមួយដែលកាន់តែងាយស្រួលសម្រាប់ការប្រើប្រាស់។ បន្ថែមពីនេះវានូវបន្ទះ Trackpad សម្រាប់បញ្ជាទៀតផង។ សម្រាប់ក្ដារចុចថ្មីនេះត្រូវចំណាយលុយបន្ថែម ២៩៩ដុល្លារ ប្រសិនបើចង់បាន។

បន្ទះឈីបដែលបំពាក់លើ iPad គឺ A12Z Bionic ដែលមាន Apple និយាយថាមានសមត្ថភាពខ្លាំងជាង Laptop ប្រើប្រព័ន្ធប្រតិបត្តិការ Windows មួយចំនួនធំ។ ថាមពលថ្មគឺប៉ាន់ស្មានថាអាចប្រើបាន ១០ ម៉ោង។

និយាយដល់ផ្នែកកាមេរ៉ា មើលមួយភ្លែតអាចស្មានថាមានកាមេរ៉ា ៣ គ្រាប់ ដូចជា iPhone 11 Pro ប៉ុន្តែមានត្រឹមពីរគ្រាប់ប៉ុណ្ណោះ ដែលមានកាមេរ៉ាធម្មតាទំហំ ១២MP និងកាមេរ៉ា Ultra-Wide ទំហំ ១០MP ឯទីបីគឺ Sensor LIDAR ដូចបានបញ្ជាក់ខាងលើ។

គួរដឹងថា iPad Pro ទាំងពីរមានជម្រើសពណ៌ប្រាក់ និងពណ៌ប្រផេះ ដែលមានជម្រើសអង្គផ្ទុក ១២៨GB, ២៥៦GB, ៥១២GB និង ១TB៕

ប្រភព៖ The Verge ប្រែសម្រួល៖ សុខហេង