Zoom ពឹងអតីតប្រធានសន្តិសុខរបស់ Facebook ឲ្យជួយ

2020-04-09 08:15:18
ចំនួនមតិ 0 | ចំនួនចែករំលែក 0

ចន្លោះមិនឃើញ

Alex Stamos ដែលធ្លាប់កាន់តួនាទីជាប្រធានផ្នែកសន្តិសុខនៅ Facebook បានប្រកាសថាខ្លួននឹងធ្វើការជាមួយ Zoom ក្នុងនាមជាអ្នកផ្ដល់យោបល់ពីក្រៅ ដើម្បីជួយដល់កម្មវិធីដែលកំពុងរីកលូតលាស់នេះ ពង្រឹងសន្តិសុខ ភាពជាឯកជន និងសុវត្ថិភាពរបស់ខ្លួន។

សកម្មភាពនេះគឺក្រោយពី Zoom ជួបប្រទះរឿងរ៉ាវក្រពុលជាច្រើនទាក់ទងនឹងចន្លោះប្រហោងផ្នែកសុវត្ថិភាព និងភាពជាឯកជនរបស់អ្នកប្រើប្រាស់ ស្របពេលដែលចំនួនប្រើប្រាស់ Zoom មានការកើនឡើងជាខ្លាំងក្នុងពេលផ្ទុះជំងឺកូវីដ១៩។

Stamos និយាយថានាយកប្រតិបត្តិ Zoom លោក Eric Yuan បានទៅជួបលោកកាលពីសប្ដាហ៍មុន បន្ទាប់ពីរូបគេបានបង្ហោះសារលើ Twitter រៀបរាប់អំពីជំហានដែល Zoom ត្រូវដើរដើម្បីដោះស្រាយបញ្ហាសន្តិសុខរបស់ខ្លួន។

ដោយសារការធ្វេសប្រហែសផ្នែកឯកជនភាព (Privacy)និង សន្តិសុខ (Security) នេះ ធ្វើឲ្យក្រុមអ្នកវិនិយោគបានដាក់ពាក្យបណ្ដឹង ប្ដឹងក្រុមហ៊ុន Zoom ដោយចោទប្រកាន់ថា ក្រុមហ៊ុនបានលាក់បាំងនូវកំហុសបច្ចេកទេសទាក់ទងទៅនឹងផ្នែកសន្តិសុខ (Security) របស់កម្មវិធីដែលកត្តានេះបានធ្វើឱ្យភាគហ៊ុនរបស់ក្រុមហ៊ុននេះបានធ្លាក់ចុះជាគំហុក នៅពេលដែលមានស្ថាប័នកាន់តែច្រើនឡើងបានបញ្ឈប់ការប្រើកម្មវិធីនេះរួមមាន កោះតៃវ៉ាន់ ក្រុមហ៊ុន SpaceX, Tesla, NASA, ថែមទាំងសាលារៀន (School District) ជាច្រើនទៀត។

ក្រៅពីបញ្ហាដែលបានផ្សព្វផ្សាយខ្លះៗរួចមកហើយ ក្រុមហ៊ុនក៏មានបញ្ហាជាច្រើនទៀតដូចជា ក្រុមហ៊ុនក៏ធ្លាប់បានបញ្ជូនទិន្នន័យឆ្លងកាត់ប្រទេសចិន ដែលធ្វើឱ្យមានការព្រួយបារម្ភទាក់ទងនឹងការរក្សារការសម្ងាត់ ព្រមទាំងបញ្ហា Zoombombing ផងដែរ៕

ប្រភព៖ Businessinsider ប្រែសម្រួល៖ សុខហេង