កំពូលមហាសេដ្ឋីអាហ្វ្រិកទាំង១០ ប្រចាំឆ្នាំ២០១៤

2014-09-13 19:01:39
ចំនួនមតិ 0 | ចំនួនចែករំលែក 0

ចន្លោះមិនឃើញ

បើមើលទៅលើចំណាត់ថ្នាក់មហាសេដ្ឋីពិភពលោក គេកម្រឃើញមានមហាសេដ្ឋីដែលមានមានប្រភពមកពីទ្វីបអាហ្រ្វិកណាស់។ កន្លងមកប្រិយមិត្តធ្លាប់បានដឹងជាច្រើនមកហើយដែរ ពីមហាសេដ្ឋីលំដាប់ពិភពលោក ក៏ដូចជាអាស៊ី ឥលូវនេះសាកទៅមើលនៅអាហ្វ្រិកវិញម្ដងមើល៍ ថាតើមានមហាសេដ្ឋីណាខ្លះ?

ខាងក្រោមនេះ ជាកំពូលមហាសេដ្ឋីទាំង១០របស់អាហ្រ្វិក ក្នុងឆ្នាំ២០១៤៖ ១០. លោក Mohamed Mansour (ទ្រព្យសម្បត្តិសរុប ២,២ ពាន់លានដុល្លារ)

លោក Mohamed Mansour គឺជាអ្នកជំនួញជនជាតិអេហ្ស៊ីបម្នាក់ ដែលជាម្ចាស់ក្រុមហ៊ុន Mansour Group។ ក្រុមហ៊ុននេះ បានដាក់ទុនលើអាជីវកម្មច្រើនប្រភេទដូចជា ឧស្សាហកម្មផលិតរថយន្ត និងលក់ចែកចាយផលិតផលជាច្រើនទៀត។ ក្រៅពីនេះ លោក Mansour មានភាគហ៊ុននៅក្នុងក្រុមហ៊ុនផ្សេងៗជាច្រើន ដែលធ្វើឲ្យលោកក្លាយជាមហាសេដ្ឋីលំដាប់ទី១០ នៅតំបន់អាហ្វ្រិក។

៩. លោក Naguib Sawiris (ទ្រព្យសម្បត្តិសរុប ២,៥ ពាន់លានដុល្លារ)

មហាសេដ្ឋីទី៩ របស់អាហ្វ្រិក លោក Naguib Sawiris ក៏ជាជនជាតិអេហ្សីបដែរ។ លោកគឺជាស្ថាបនិកនៃ Orascom Group ដែលជាក្រុមហ៊ុនពាណិជ្ជកម្មធំជាងគេបំផុតក្នុងសាជីវកម្មភាគហ៊ុននៅអេហ្ស៊ីប។

៨. លោក Patrice Motsepe (ទ្រព្យសម្បត្តិសរុប ២,៩ ពាន់លានដុល្លារ)

លោក Patrice Motsepe គឺជាមហាសេដ្ឋីជនជាតិស្បែកខ្មៅតែម្នាក់គត់នៅក្នុងប្រទេសអាហ្វ្រិកខាងត្បូង។ ទ្រព្យសម្បត្តិដ៏ច្រើនក្រាស់ក្រែលរបស់លោក ទទួលបានមកពីក្រុមហ៊ុន African Rainbow Minerals ដែលជាក្រុមហ៊ុនរុករករ៉ែដ៏ធំមួយ។

៧. លោក Othman Benjelloun (ទ្រព្យសម្បត្តិសរុប ៣,១ ពាន់លានដុល្លារ)

លោក Othman Benjelloun គឺជាជនជាតិម៉ារ៉ុក។ ប្រភពទ្រព្យសម្បត្តិរបស់លោក បានមកពីការស្នងក្រុមហ៊ុនធានារ៉ាប់រងរបស់ឪពុក និងការធ្វើជំនួញលើវិស័យធនាគារ។ ក្រៅពីនេះ លោកនៅមានភាគហ៊ុនក្នុងក្រុមហ៊ុនជាច្រើនទៀត ដូចជាក្រុមហ៊ុនអាកាសចរណ៍ ទូរគមនាគមន៍ និងបច្ចេកវិទ្យាជាដើម។

៦. លោក Christoffel Wiese (ទ្រព្យសម្បត្តិសរុប ៣,៥ ពាន់លានដុល្លារ)

លោក Christoffel Wiese គឺជាជនជាតិអាហ្វ្រិកខាងត្បូង។ ប្រភពទ្រព្យសម្បត្តិរបស់លោក គឺទទួលបានមកពីការធ្វើជំនួញច្រើនប្រភេទ។ ក្រៅពីនេះ លោកបានវិនិយោគលើក្រុមហ៊ុនបង់រំលោះ ដែលធ្វើឲ្យលោករកចំណូលបានយ៉ាងច្រើន។ គ្រាន់តែឆ្នាំមុន ក្រុមហ៊ុនទាំង ៧ របស់លោកទទួលបានចំណូលដល់ទៅ ៥០០ លានដុល្លារ។

៥. លោក Mike Adenuga (ទ្រព្យសម្បត្តិសរុប ៤,៧ ពាន់លានដុល្លារ)

លោក Mike Adenuga គឺជាអ្នកមានជាងគេលំដាប់ទី២ នៅនីហ្សេរីយ៉ា និងជាមហាសេដ្ឋីលេខ ៥ នៅទូទាំងទ្វីបអាហ្វ្រិក។ ចំណូលរបស់លោកទទួលបានមកពីក្រុមហ៊ុនប្រេង និងក្រុមហ៊ុនទូរគមនាគមន៍។ ប៉ុន្តែសំណាងដែលនាំឲ្យលោកមានថ្ងៃនេះ គឺការចែកចាយភេសជ្ជៈកូកាកូឡាក្នុងប្រទេស នៅអាយុ ២០ឆ្នាំ។ បច្ចុប្បន្ននេះ លោកកំពុងកាន់កាប់លើក្រុមហ៊ុនផ្ដល់សេវាទូរសព្ទធំជាងគេលំដាប់ទី២ នៅនីហ្សេរីយ៉ា ដែលមានអ្នកប្រើប្រាស់ ២៥ លាននាក់។

៤. លោក Nassef Sawiris (ទ្រព្យសម្បត្តិសរុប ៦,៥ ពាន់លានដុល្លារ)

លោក Nassef Sawiris គឺជាមហាសេដ្ឋីជនជាតិអេហ្សីបម្នាក់ទៀតក្នុងតំបន់អាហ្វ្រិក។ ទ្រព្យសម្បត្តិរបស់លោក គឺទទួលបានមកពីក្រុមហ៊ុនសាងសង់ធំជាងគេបំផុតនៅអេហ្ស៊ីប Orascom។

៣. លោក Nicky Oppenheimer (ទ្រព្យសម្បត្តិសរុប ៦,៥ ពាន់លានដុល្លារ)

លោក Nicky Oppenheimer គឺជាជនជាតិអាហ្វ្រិកខាងត្បូង។ ទ្រព្យសម្បត្តិរបស់លោក គឺបានពីលក់ភាគហ៊ុននៃក្រុមហ៊ុនពេជ្រ DeBeers Diamonds។ លើសពីនេះ លោកក៏ជាប្រធាននៃក្រុមហ៊ុនហ្គេមដ៏ធំមួយនៅអាហ្វ្រិកផងដែរ។

២. លោក Johann Rupert (ទ្រព្យសម្បត្តិសរុប ៧,៩ ពាន់លានដុល្លារ)

លោក Johann Rupert គឺជាជនជាតិអាហ្វ្រិកខាងត្បូង។ ចំណូលរបស់លោកទទួលបានពីក្រុមហ៊ុនផលិតសម្ភារៈមានតម្លៃនានាដូចជា នាឡិកា គ្រឿងអលង្ការ និងទំនិញពីរោមសត្វ។ ក្រៅពីនេះ លោកនៅមានចម្ការទំពាំងបាយជូរពីរនៅអាហ្វ្រិកខាងត្បូង និងជាប្រធានសាកលវិទ្យាល័យមួយផងដែរ។

១. លោក Aliko Dangote (ទ្រព្យសម្បត្តិសរុប ២៥ ពាន់លានដុល្លារ)

លោក Aliko Dangote គឺជាជនជាតិនីហ្សេរីយ៉ា។ លោកជាមហាសេដ្ឋីស្បែកខ្មៅមានជាងគេបំផុតក្នុងលោក និងឈរនៅចំណាត់ថ្នាក់ទី២៣ក្នុងចំណោមមហាសេដ្ឋីទាំងអស់។ ប្រភពទ្រព្យសម្បត្តិរបស់លោក ទទួលបានមកពីជំនួញច្រើនប្រភេទដូចជា ស៊ីម៉ង់ ស្ករស ម្សៅមី និងផលិតផលផ្សេងៗ។

ចុចអាន៖ ៦យ៉ាងពីលុយដុល្លារអាមេរិក ធ្លាប់ដឹងអត់?

ប្រែសម្រួល៖ គង់ វិសាល ប្រភព៖ therichest