ជួបជាមួយសេដ្ឋី និងកូនក្រមុំពាក់មាសរាប់គីឡូ ក្នុងថ្ងៃរៀបការ

2014-11-22 16:29:49
ចំនួនមតិ 0 | ចំនួនចែករំលែក 0

ចន្លោះមិនឃើញ

សេដ្ឋីជនជាតិឥណ្ឌាម្នាក់ដែលមានមាសស្រោចខ្លួន បានកុម្ម៉ង់គេធ្វើគ្រឿងអលង្ការឲ្យកូនស្រីខ្លួនពាក់ក្នុងថ្ងៃរៀបការ មានតម្លៃរហូតដល់ទៅជាង ៦០ម៉ឺនដុល្លារ។ អាពាហ៍ពិពាហ៍នេះ ត្រូវប្រារព្ធឡើងនៅទីក្រុងដ៏ពិសិដ្ឋ Tirupati ក្នុងរដ្ឋ Andhra Pradesh ប្រទេសឥណ្ឌា។

កូនក្រមុំ និងមាសស្រោចខ្លួនតម្លៃជាង ៦០ម៉ឺនដុល្លារ

ដោយសារការសំញែងមាសដ៏ច្រើនបែបនេះ ប៉ូលិសបានបញ្ជូនកម្លាំងទៅការពារពួកគេ ដើម្បីធានាសន្តិសុខកុំឲ្យមានអំពើប្លន់នៅតាមផ្លូវទៅ និងត្រលប់មកវិញក្នុងពិធីអាពាហ៍ពិពាហ៍នៅព្រះវិហារកាត់ភូមិក្រីក្រនានា។

អ្នកនាំពាក្យរបស់មន្ត្រីប៉ូលិសឈ្មោះ Sandeep Kumar នៅក្រុង Tirupati បានទទួលស្គាល់ថា សេដ្ឋីរូបនោះ ជាមួយកូនស្រីពិតជាបានពាក់មាសជាច្រើននៅក្នុងពិធីអាពាហ៍ពិពាហ៍មែន។ "វាគ្មានទៅទាស់ខុសអីទេគ្រាន់តែពាក់មាសច្រើននោះ តែវាអាចមានបទល្មើសកើតឡើងពេលមនុស្សច្រើនដឹងឮពីរឿងហ្នឹង.... យើងគ្រាន់តែចង់ធានាថា គ្មានបញ្ហាអីកើតឡើងទុកជាមុនប៉ុណ្ណោះ"។ លោក Kumar បានបញ្ជាក់បន្ថែម។

ឪពុកកូនក្រមុំ ត្រូវបានគេអះអាងថា ធ្វើជំនួញមានប្រាក់វាល់លានដុល្លារ ពីការលក់នំ ស្ករគ្រាប់ និងរបស់ផ្អែមៗដទៃទៀត នៅរដ្ឋ Andhra Pradesh ភាគខាងត្បូងប្រទេសឥណ្ឌា។ ទោះយ៉ាងណា ទាំងឈ្មោះឪពុក និងកូនក្រមុំ មិនត្រូវគេលាតត្រដាងឲ្យដឹងជាសាធារណៈនោះទេ។

សេដ្ឋីដែលកុម្ម៉ង់គេធ្វើគ្រឿងអលង្ការឲ្យកូនស្រី ក៏ពាក់មាសពេញខ្លួនដែរ

ពិធីអាពាហ៍ពិពាហ៍រៀបចំឡើង ក្រោមការរិះគន់ពីប្រជាជន ក្រោយពេលរូបភាពដែលថតដោយទូរសព្ទដៃបានបែកធ្លាយ និងចែកចាយបន្តពាសពេញបណ្ដាញសង្គមនានា។ មនុស្សជាច្រើនបាននិយាយថា ទាំងពីរនាក់ឪពុកកូន គួរតែបរិច្ចាគប្រាក់ដែលខ្ជះខ្ជាយនោះ ធ្វើជាអំណោយសប្បុរសធម៌ មិនគួរយកមកសំញែងចោល ខណៈមនុស្សរាប់លាននាក់ទៀតកំពុងរស់នៅរកប្រាក់ចិញ្ចឹមជីវិតដោយលំបាកដូចនេះទេ។

ឥណ្ឌាគឺជាប្រទេស ដែលប្រើប្រាស់មាសធំជាងគេក្នុងលោក។ គ្រួសារដែលមានទ្រព្យសម្បត្តិស្ដុកស្ដម្ភ តែងចំណាយប្រាក់រាប់ម៉ឺនដុល្លារ ដើម្បីទិញគ្រឿងអលង្ការពាក់នៅក្នុងថ្ងៃអាពាហ៍ពិពាហ៍ និងពិធីពិសេសផ្សេងៗទៀត៕

ចុចអាន៖ ផ្សារទំនើបមួយនៅចិន ក្រាលមាសសុទ្ធតម្លៃរាប់លានដុល្លារឲ្យអតិថិជនដើរលើ

ដោយ៖ គង់ វិសាល

ប្រភព៖ dailymail