ថ្ងៃនេះ៤ឆ្នាំមុនជាព្រឹត្តិការណ៍ខ្មែររន្ធត់បំផុតក្នុងប្រវត្តិសាស្ត្រ៣ទសវត្សចុងក្រោយ

2014-11-22 16:29:42
ចំនួនមតិ 0 | ចំនួនចែករំលែក 0

ចន្លោះមិនឃើញ

ស្ពានពេជ្រ ដែលសម្លាប់មនុស្ស ៣៥១នាក់ និងរបួសជិត៤០០នាក់ (រូបភាព៖ Cambodia.com)

គិតត្រឹមថ្ងៃទី ២២ វិច្ឆិកា២០១៤នេះ គឺខួប៤ឆ្នាំគត់នៃព្រឹត្តិការណ៍សោកនាដកម្ម ជាន់គ្នាលើស្ពានពេជ្រ ដោយបានសម្លាប់ មនុស្សអស់ ៣៥១នាក់ និងរបួសជាច្រើនរយនាក់។ ព្រឹត្តិការណ៍នៅពាក់កណ្ដាលយប់នៃ បុណ្យអុំទូកថ្ងៃទី៣ កាល៤ឆ្នាំមុននោះ ជាហេតុការណ៍ដ៏រន្ធត់បំផុតជាប្រវត្តិសាស្ត្ររបស់ប្រជាជនខ្មែរ នាប៉ុន្មានទសវត្សចុងក្រោយនេះ។

វាក៏ជាហេតុការណ៍ដែលធ្វើឲ្យប្រជាជនខ្មែរទូទាំងប្រទេសខ្លបខ្លាច។ នៅចាំបានថាមួយថ្ងៃបន្ទាប់ពីអ្នកតាមផ្ទះនីមួយៗ ពេញប្រទេស ចាប់ផ្ដើមសែនសំណែន នំនែក ចេក ផ្លែឈើ ទាំងដុតទៀន ដុតធូប ហុយពេញផ្លូវ។ និយាយពីភ្នំពេញ ភ្លើងទៀនធូបលើចានសំណែន ភ្លឺគ្រប់ផ្លូវទាំងអស់។ មនុស្សឆាប់ចូលផ្ទះនៅពេលយប់ ហើយចរាចរណ៍តាមដងផ្លូវគ្រប់ច្រកល្ហក ប្រែជាស្ងប់ស្ងាត់ចាប់ពីម៉ោងជាង៨:៣០យប់ឡើង។ គ្មាននរណាហ៊ានដើរហើរយប់ដូចសព្វដងឡើយ គឺមានតែការសែនព្រេន នៅប៉ុន្មានថ្ងៃដំបូង រហូតធ្វើឲ្យតម្លៃចេកឡើងថ្លៃ ១ស្និតដល់១០ដុល្លារ។ ក្រោយមកអ្វីៗក៏ស្ងប់ស្ងាត់បន្តិចម្ដងៗទៅតាមពេលវេលា។

ស្ពានពេជ្រ ថ្ងៃអុំទូក ២០១០ (រូបភាព៖ sroksrear.com)

ប៉ុន្តែឥឡូវឥឡូវនេះ ស្ពានដែលរំលេចដោយភ្លើងប្រដេញភ្លឺចិញ្ចាចពេលយប់ តែប្រល័យមនុស្សអស់រាប់រយនាក់ បានរុះរើបាត់ស្រមោល និងជំនួសវិញដោយស្ពានថ្មថ្មី។ ហើយ ស្ដូប សម្រាប់គោរពវិញ្ញាណក្ខន្ធអ្នកដែលរងគ្រោះបានសាងសង់ឡើងនៅក្បែរនោះ។

នរណាខ្លះ នៅចាំព្រឹត្តិការណ៍នោះ?

អត្ថបទ៖ ខ្វាន់