អីចឹងសោះ...បានអត់សូវឃើញនាង អ៊ីត សម្ដែងស្និទ្ធជាមួយ ពែកមី

2014-09-26 16:47:51
ចំនួនមតិ 0 | ចំនួនចែករំលែក 0

ចន្លោះមិនឃើញ

សាមីខ្លួន នាង អ៊ីត បានទទួលស្គាល់ថា នាងពិតជាមិនសូវសម្ដែងស្និទ្ធស្នាលជាមួយ ពែកមី គឺហ៊ានស្និទ្ធតែជាមួយនាយ ក្រូច ជាបងមែន ប៉ុន្តែថា នោះជាការចាត់ចែងរបស់ថ្នាក់លើរបស់នាង គឺ នាយ ពែកមី ផ្ទាល់ប៉ុណ្ណោះ។

នាង អ៊ីត អធិប្បាយបន្ថែមថា ការចាត់ចែងឲ្យអ្នកណាដើរតួជាគូជាមួយអ្នកណាពីថ្នាក់លើ គឺយោងទៅលើសាច់រឿង និងភាពសមគ្នាក្នុងការសម្ដែងប៉ុណ្ណោះ។ ដូច្នេះហើយ ទើបនាងឧស្សាហ៍សម្ដែងស្និទ្ធតែជាមួយនាយ ក្រូច ដែលជាបងបង្កើត ប៉ុន្តែក៏អត់មានបញ្ហាមិនល្អអ្វីនៅពីក្រោយរឿងដែលថា នាង មិនសូវហ៊ានសម្ដែងជាមួយ ពែកមីដែរ។

“ខ្ញុំ ឧស្សាហ៍ចាប់ដៃគូជាមួយបងក្រូចសម្ដែង ដោយសារថាយើងសម្ដែងសម និងទៅស៊ីចង្វាក់គ្នាល្អ ឯបងពែកមី គាត់លេងសមជាមួយខ្ញុង អីចឹងហើយគេចេះតែដាក់ឲ្យលេងរៀងៗខ្លួនគ្នាអីចឹងទៅ ប៉ុន្តែម្ដងម្កាលខ្ញុំលេងជាមួយគាត់(ពែកមី)ដែរតើ!”។

បើទោះជាយ៉ាងនេះក្ដី ក៏មិនមានន័យថា នាង មិនដែលសម្ដែងស្និទ្ធស្នាលជាមួយ ពែកមីដែរ។ តារាកំប្លែងមកពីខេត្តកំពង់ស្ពឺរូបនេះ បញ្ជាក់ថា នៅក្នុងកម្មវិធី “រាត្រីកម្សាន្ត” នាង និងនាយ ពែកមី ពិតជាអត់ដែលសម្ដែងជាមួយគ្នាមែន ប៉ុន្តែនៅក្នុងកម្មវិធី “សំណើចតាមភូមិ” គឺពួកនាង បានជួបសម្ដែងជាមួយគ្នាខ្លះៗដែរកន្លងមក។

ជាមួយគ្នានេះ រឿងដែលថា នាងកំណាញ់ខ្លួនមិនហ៊ានសម្ដែងស្និទ្ធស្នាលជាមួយ ពែកមី អាចថាមកពីស្វាមីនាងប្រចណ្ឌ ដោយសារតែមេក្រុមរូបនេះតែងលេងស្និទ្ធនោះ ក៏ទេដែរ។ អ៊ីត និយាយថា សម្រាប់ការសម្ដែង ប្រសិនបើមានការតម្រូវនោះ ទោះជាមួយអ្នកណាក៏អត់ខ្លាចដែរ ។ “រឿងខ្លាច…អត់មានខ្លាចទេបង ព្រោះសិល្បៈតែប៉ុណ្ណឹង!”៕