កំពូលមហាសេដ្ឋីផុតលេខទាំង ៥រូប របស់ប្រទេសថៃ

2014-11-26 00:05:49
ចំនួនមតិ 0 | ចំនួនចែករំលែក 0

ចន្លោះមិនឃើញ

បើតាមការចាត់ថ្នាក់របស់ទស្សនាវដ្ដី Forbes នៃសហរដ្ឋអាមេរិក បានបង្ហាញថា ក្នុងឆ្នាំ២០១៤ នេះ មហាសេដ្ឋីទឹកប្រាក់ពាន់លានដុល្លារ មានទាំងអស់ ១៦៤៥នាក់។ ក្នុងចំណោមនោះក៏មានមហាសេដ្ឋីនៃប្រទេសថៃចំនួន ២៦នាក់ផងដែរ។ ខាងក្រោមនេះ គឺជាមហាសេដ្ឋី ៥រូប ដែលមានទ្រព្យសម្បត្តិច្រើនជាងគេបំផុតក្នុងប្រទេសជាសមាជិកអាស៊ានមួយនេះ៖

៥. លោក Krit Ratanarak

លោក Krit Ratanarak មានទ្រព្យសម្បត្តិសរុប ៥,១ពាន់លានដុល្លារ ហើយពេលនេះលោកកំពុងរស់នៅ និងប្រកបមុខជំនួញក្នុងរាជធានីបាងកក។ ប្រភពទ្រព្យសម្បត្តិដ៏ច្រើនក្រាស់ក្រែលរបស់លោក បានមកពីការវិនិយោគលើប្រព័ន្ធផ្សព្វផ្សាយ និងអចលនទ្រព្យ។

៤. លោក Chalerm Yoovidhya

លោក Chalerm Yoovidhya មានទ្រព្យសម្បត្តិសរុប ៩,៩ពាន់លានដុល្លារ ហើយពេលនេះលោកកំពុងរស់នៅ និងប្រកបមុខជំនួញនៅក្នុងរាជធានីបាងកក។ មហាសេដ្ឋីនេះ គឺជាកូនប្រុសច្បងគេរបស់ស្ថាបនិកនៃក្រុមហ៊ុនភេសជ្ជៈប៉ូវកម្លាំង គោជល់។ ប្រភពទ្រព្យសម្បត្តិរបស់លោក គឺបានមកពីភាគហ៊ុននៅក្នុងក្រុមហ៊ុនភេសជ្ជៈនានាដែលមាន៤៩% រួមទាំងភាគហ៊ុននៅក្នុងវិស័យសុខភាព អចលនទ្រព្យ និងក្រុមកីឡាជាដើម។ ចំណែកឯនៅក្នុងក្រុមហ៊ុនភេសជ្ជៈគោជល់វិញ លោកមានភាគហ៊ុន ២%។

៣. លោក Charoen Sirivadhanabhakdi

លោក Charoen Sirivadhanabhakdi មានទ្រព្យសម្បត្តិសរុប ១១,៣ពាន់លានដុល្លារ ហើយពេលនេះលោកកំពុងរស់នៅ និងប្រកបមុខជំនួញនៅក្នុងរាជធានីបាងកក។ ប្រភពទ្រព្យសម្បត្តិរបស់លោក បានមកពីការផលិត និងចែកចាយភេសជ្ជៈជាច្រើនប្រភេទ។ ក្នុងចំណោមនោះ ស្រាបៀឆាងដែលធ្លាប់វាយលុកទីផ្សារកម្ពុជាកាលពីមុន ក៏បង្កើតឡើងដោយមហាសេដ្ឋីលំដាប់លេខបីនៅថៃនេះដែរ។

២. លោក Dhanin Chearavanont និងក្រុមគ្រួសារ

លោក Dhanin Chearavanont និងក្រុមគ្រួសារ មានទ្រព្យសម្បត្តិសរុប ១១,៥ពាន់លានដុល្លារ។ ពេលនេះលោកកំពុងរស់នៅ និងប្រកបមុខជំនួញនៅក្នុងរាជធានីបាងកក។ ប្រភពទ្រព្យសម្បត្តិចម្បងរបស់លោក គឺបានមកពីឧស្សាហកម្មផលិតចំណីអាហារ ដែលកំពុងកាន់កាប់ក្រុមហ៊ុនយក្សក្នុងប្រទេសថៃ Charoen Pokphand Group Co.(CP Group)។

១. លោក Chirathivat និងក្រុមគ្រួសារ

ក្រុមគ្រួសារលោក Chirathivat គឺជាមហាសេដ្ឋីដែលមានទឹកប្រាក់ច្រើនបំផុតនៅប្រទេសថៃ ក្នុងរង្វង់ទ្រព្យសម្បត្តិ ១២,៧ ពាន់លានដុល្លារ។ បច្ចុប្បន្ន លោកកំពុងរស់នៅក្នុងរាជធានីបាងកក ហើយប្រភពទ្រព្យសម្បត្តិរបស់មហាសេដ្ឋីផុតលេខនៃប្រទេសថៃនេះ គឺបានមកពីការបោះលក់ទំនិញផ្សេងៗ និងក្រុមហ៊ុនអចលនទ្រព្យ។

ចុចអាន៖ ជួបជាមួយសេដ្ឋី និងកូនក្រមុំពាក់មាសរាប់គីឡូ ក្នុងថ្ងៃរៀបការ

ប្រែសម្រួល៖ គង់ វិសាល

ប្រភព៖ Forbes