តារាស្រី១ដួង តារាប្រុស៦ដួង ជួបគ្រោះថ្នាក់ចរាចរណ៍ក្នុងឆ្នាំ២០១៤នេះ

2014-11-27 16:54:50
ចំនួនមតិ 0 | ចំនួនចែករំលែក 0

ចន្លោះមិនឃើញ

គ្រោះថ្នាក់ចរាចរណ៍ នៅតែជាបញ្ហាគួរឲ្យព្រួយអារម្មណ៍ នៅក្នុងប្រទេសកម្ពុជា ដោយបានសម្លាប់មនុស្សជាមធ្យម៦នាក់ និង១៦នាក់ផ្សេងទៀតរងរបួសជារៀងរាល់ថ្ងៃ។ តួលេខមិនទាន់ថមថយនៅឡើយទេ។ នៅក្នុងសង្គមសិល្បៈឯណេះវិញ ក៏មានតារាល្បីៗខ្លះ បានជួបគ្រោះថ្នាក់នេះដែរ ដោយហេតុផលផ្សេងៗគ្នា អំឡុងឆ្នាំ២០១៤ គិតត្រឹមថ្ងៃទី២៧ វិច្ឆិកានេះ។ ចង់ដឹងថា តើពួកគេជានរណាខ្លះ?

អានអត្ថបទ៖ ស្រីស្អាត ណាតហ្សា ប៉ុណ្ណឹងCute អត់?

១. នាយ ពែកមី៖ កាលពីល្ងាចថ្ងៃទី១២ ខែវិច្ឆិកា ២០១៤ មានការរាយការណ៍ព័ត៌មានបន្តបន្ទាប់តាមរយៈសាក្សីមួយចំនួននៅកន្លែងកើតហេតុ ដោយបានបញ្ជាក់ថា តារាកំប្លែងល្បីរូបនេះ ជួបហេតុការណ៍ក្រឡាប់រថយន្តនៅស្រុកដងទង់ ខេត្តកំពត ដោយសារគេចសត្វគោមួយក្បាល ខណៈកំពុងធ្វើដំណើរលើផ្លូវជាតិលេខ៣។ ហេតុការណ៍នេះ មិនបណ្ដាលឲ្យនរណាម្នាក់រងរបួសទេ គ្រាន់តែខូចខាតរថយន្តប៉ុណ្ណោះ។ ទោះយ៉ាងណា តារាកំប្លែងខាងលើ បានប្រកាន់ជំហរថា នាយមិនបានជួបគ្រោះអាក្រក់នោះទេ៕

២. តារាចម្រៀង មង្គល ទីណា៖ រថយន្ត Range Rover បានរេចង្កូតទៅបុករបាំងដែកចែកទ្រូងផ្លូវសហព័ន្ធរុស្ស៊ី ធ្វើឲ្យខូចខាតអស់១០ផ្ទាំង នៅម៉ោង១រំលងអាធ្រាត្រឈានចូលថ្ងៃទី ២១ ខែវិច្ឆិកា ២០១៤ កន្លងទៅ ព្រោះតារាចម្រៀងរូបនេះនិយាយទូរសព្ទ ពេលកំពុងបើកបរ។ ចំណែករថយន្ត ត្រូវរបូតកង់មុខ ខណៈកំពុងបើកគេចបាន៣០០ម៉ែត្រប៉ុណ្ណោះ៕

៣. តារាចម្រៀង ជុំ លីណូ៖ បានជួបគ្រោះថ្នាក់ចរាចរណ៍នៅថ្ងៃទី៦ ខែវិច្ឆិកា កន្លងទៅនេះ ដោយរថយន្តស្ព័ររបស់គេ បានជួបគ្រោះថ្នាក់ចរាចរណ៍ ពេលកំពុងធ្វើដំណើរចេញពីច្រៀងនៅខេត្តសៀមរាប ឆ្ពោះមកស្រុកកំណើតនាខេត្តកំពង់ឆ្នាំង។ ហេតុការណ៍នេះ បានបណ្ដាលឲ្យស្រ្តីវ័យ៥០ឆ្នាំម្នាក់ស្លាប់ និងយុវតីវ័យ១៨ឆ្នាំរងរបួស។ គិតមកត្រឹមថ្ងៃនេះ ការដោះស្រាយមិនទាន់ដាច់ស្រេចនៅឡើយផងទេ៕

៤. អ្នកនាង សុខ សោមាវត្តី៖ នាងបានជិះរថយន្ត អេស្កាឡែត ហើយជ្រុលទៅប៉ះជាមួយម៉ូតូ Smash V ជិះគ្នា២នាក់ លើកំណាត់ផ្លូវជាតិលេខ៤ មុខវត្តជំពូវ័ន្ត ធ្វើឲ្យភាគីម្ចាស់ម៉ូតូរងរបួសស្រាល។ ហេតុការណ៍នេះកើតឡើងកាលពីយប់ថ្ងៃទី១៧ ខែកញ្ញា២០១៤៕

៥. លោក ញ៉ែម សុគន្ធ៖ យប់ថ្ងៃទី១៧ ខែកក្កដា រថយន្តកូរ៉ូឡារបស់តារាសម្ដែងរូបនេះ បានប៉ះជាមួយម៉ូតូ Scoopy នៅម្ដុំខណ្ឌទូលគោក រាជធានីភ្នំពេញ បណ្ដាលឲ្យភាគីម៉ូតូរបួសធ្ងន់ និងស្រាល៕

៦. លោក អ៊ឹង សុទ្ធារិទ្ធ៖ បានជួបគ្រោះថ្នាក់ចរាចរណ៍កាលពីយប់ថ្ងៃទី១ ខែមេសា កន្លងទៅ ដោយម៉ូតូរបស់លោកបានប៉ះគ្នាជាមួយរថយន្តមួយគ្រឿងមិនចាំម៉ាក ប៉ុន្តែមិនបានបណ្ដាលឲ្យភាគីណារបួសឡើយ។ ហេតុការណ៍នោះបានបង្កឲ្យភាគីទាំងពីរ មានការប្រើប្រាស់ពាក្យសំដីដាក់គ្នាផងដែរ ដើម្បីរកត្រូវរៀងខ្លួន៕

៧. លោក មូល សុវណ្ណគិរី៖ ត្រូវមនុស្ស៤-៥នាក់ បានបើករថយន្តដេញកៀររថយន្តរបស់គេ ខណៈដែលលោកធ្វើដំណើត្រឡប់ពីថតខ្សែភាពយន្ត ឲ្យផលិតកម្មសាន់ដេនៅតាមខេត្តវិញ។ ហេតុការណ៍នេះបានកើតឡើងនៅរំលងអាធ្រាត្រឈានចូលថ្ងៃទី ៣ ខែកក្កដា ឆ្នាំ២០១៤ ចំណុចមុខបុរីសុភមង្គល តាមបណ្តោយផ្លូវជាតិលេខ៦A សង្កាត់ជ្រោយចង្វា រាជធានីភ្នំពេញ៕