ប្លែក! ថៃ ផលិតវីដេអូ "I Hate Thailand” ដើម្បីអ្វី?

2014-11-27 23:21:47
ចំនួនមតិ 0 | ចំនួនចែករំលែក 0

ចន្លោះមិនឃើញ

នៅចំពេលដែលទេសចរថៃកំពុងថយចុះដោយសារឆ្នាំនៃវិបត្តិដ៏រាំរ៉ៃនោះ វីដេអូថ្មីមួយដែលមានចំណងជើងថា "I Hate Thailand” ឬ "ខ្ញុំស្អប់ប្រទេសថៃ" បានឡើងល្បីខ្លាំងលើ YouTube ដោយទទួលបានអ្នកចូលមើលជាង១លានដង ក្រោយបង្ហោះបានប៉ុន្មានថ្ងៃប៉ុណ្ណោះ។

យ៉ាងណាក្ដី អាថ៌កំបាំងនៃវីដេអូដែលមានតួអង្គជាជនជាតិអង់គ្លេសនោះ ត្រូវបានទម្លាយឲ្យដឹងថាជាការផលិតរបស់អាជ្ញាធរទេសចរថៃតែម្ដង មិនមែនដោយទេសចរជនជាតិបរទេសដែលខឹងនឹងថៃនោះឡើយ។

ប្រិយមិត្តប្រហែលជាឆ្ងល់ហើយ ថាហេតុអ្វីបានជាថៃផលិតវីដេអូដោយដាក់ចំណងជើងថា “I Hate Thailand” ដូច្នេះ ខណៈវីដេអូផ្សព្វផ្សាយទេសចរណ៍របស់ប្រទេសដទៃទៀតសុទ្ធតែដាក់ចំណងជើងល្អៗ ដើម្បីទាក់ទាញ។ ចម្លើយគឺនេះជាយុទ្ធសាស្រ្ដថ្មីមួយរបស់ថៃ ដើម្បីទាក់ទាញចំណាប់អារម្មណ៍កាន់តែខ្លាំង ដោយប្រើចិត្តសាស្រ្ដបញ្ច្រាស់។

បញ្រ្ចាស់ត្រង់ថាជនបរទេសនឹងចាប់អារម្មណ៍ចង់ដឹងថាហេតុអ្វីបានជាតួអង្គក្នុងវីដេអូនោះស្អប់ថៃ ខណៈអត្ថន័យទាំងស្រុងក្នុងវីដេអូនោះ បានដោះស្រាយបញ្ហារបស់តួអង្គនោះយ៉ាងរលូន ដែលគេរំពឹងថានឹងអន្ទងចិត្តទេសចរបរទេសដទៃទៀត ឲ្យទៅលេងនៅថៃ។

វីដេអូរយៈពេលជាង៥នាទីនេះ បានបង្ហាញពីតួអង្គប្រុសឈ្មោះ James រៀបរាប់នៅមុខកាមេរ៉ាវីដេអូរបស់ខ្លួន ពីការបាត់កាបូបនៅថៃ។ បុរសអង់គ្លេសនោះ បានខឹង និងមួរម៉ៅយ៉ាងខ្លាំង មុននិយាយពាក្យថា "I hate this place. I hate Thailand”។

សាច់រឿងបន្ទាប់គឺបុរសនោះបានទៅជួបប៉ូលិសដើម្បីរាយការណ៍ ដែលបន្ទាប់មកបានជួបនារីថៃដ៏ទាក់ទាញមួយរូប។ នៅទីបំផុតលោកបានរកកាបូបឃើញវិញ ហើយផ្លាស់គំនិតពីស្អប់ទៅស្រលាញ់ លង់ស្នេហ៍ប្រទេសថៃ។

សន្និសីទកាសែតដែលធ្វើឡើងដោយអាជ្ញាធរទេសចរណ៍ថៃ បានឲ្យដឹងថា វីដេអូនេះ គឺជាផ្នែកមួយនៃ "Romantic-comedy short film”។ អាជ្ញាធរនេះបានបញ្ជាក់ថាការផលិតវីដេអូនេះឡើង គឺក្រោយពីការស្រាវជ្រាវបានរកឃើញថា ការផ្សព្វផ្សាយមានលក្ខណៈផ្ទុយបែបនេះ មានការទាក់ទាញជាងការផ្សព្វផ្សាយធម្មតា។

បើយោងតាមការប៉ាន់ស្មាន ទេសចរថៃក្នុងឆ្នាំ២០១៤ នឹងថយចុះជាលើកដំបូងក្នុងរយៈពេលប៉ុន្មានឆ្នាំចុងក្រោយ បន្ទាប់ពីឡើងខ្ពស់បំផុតកាលពីឆ្នាំ២០១៣ ដែលមានភ្ញៀវបរទេសមកកាន់ថៃដល់ទៅ២៦,៧លាននាក់។ មូលហេតុនៃការថយចុះគឺដោយសារតែប្រទេសនេះត្រូវខូចឈ្មោះដោយសារការធ្វើរដ្ឋប្រហារយោធាកាលពីខែឧសភា បូករួមនឹងករណីការសម្លាប់ជនជាតិអង់គ្លេស២នាក់យ៉ាងឃោរឃៅនៅលើកោះ Tao កាលពីខែកញ្ញាផងដែរ។

ចង់ដឹងថាវីដេអូនេះទាក់ទាញ និងប្លែកជាងគេបែបណានោះ សូមមើលដូចខាងក្រោម៖

http://youtu.be/54uzEouACYs

ដោយ៖ សុខ សុវត្ថិ

ប្រភព៖ traveller