ដឹងថា លោក អេ ភូថង រកចំណូលបានប៉ុន្មានក្នុងមួយខែពីការងារកីឡា?

2014-11-28 12:30:02
ចំនួនមតិ 0 | ចំនួនចែករំលែក 0

ចន្លោះមិនឃើញ

លោក អេ ភូថងត្រូវបានមហាជនមើលឃើញថាជាអតីតកីឡាករប្រដាល់ម្នាក់ដែលមមាញឹកខ្លាំងនឹងការងារជាចៅក្រម អាជ្ញាកណ្ដាល និងផ្គូផ្គងឲ្យសហព័ន្ធកីឡាប្រដាល់កម្ពុជា។ ប៉ុន្តែលោកអ្នកដឹងទេថា តើលោកអាចរកចំណូលបានប៉ុន្មានក្នុងមួយខែ?

ពីឆ្វេងទី២ លោក អេ ភូថង

អ្នកស្រី សាំង សុម៉ាលី ភរិយារបស់លោកអេ ភូថង និងជាចៅក្រម អាជ្ញាកណ្តាលដែរនោះបានឲ្យដឹងថា ប្តីរបស់គាត់ធ្វើការឲ្យសហព័ន្ធកីឡាប្រដាល់កម្ពុជាប្រចាំតែប៉ុស្តិ៍ស៊ីធីអិនតែមួយគត់។ សព្វថ្ងៃនេះលោកធ្វើជាចៅក្រម និងអាជ្ញាកណ្ដាលនៅសង្វៀនមួយនេះរយៈពេល៤ថ្ងៃក្នុងមួយសប្ដាហ៍ពោលគឺថ្ងៃព្រហស្បតិ៍ សុក្រ សៅរ៍ និងអាទិត្យដែលក្នុងមួយថ្ងៃលោកទទួលបាន១៣ដុល្លារអាមេរិក។

អ្នកស្រីបន្ថែមថា ក្រៅពីធ្វើជាអាជ្ញាកណ្ដាល និងចៅក្រម ប្តីរបស់គាត់ក៏ធ្វើជាអ្នកផ្គូផ្គងគូប្រកួតឲ្យសហព័ន្ធប្រចាំសង្វៀនស៊ីធីអិនដែរ ប៉ុន្តែគាត់មិនដឹងថាទទួលបានកម្រៃឬអត់នោះទេ។ «ខ្ញុំអត់ដឹងថា គាត់បានលុយអត់...ធ្វើជាអ្នកផ្គូផ្គងនោះ ព្រោះខ្ញុំអត់បានសួរនាំដែរ»។

លោក អេ ភូថង ធ្វើជាអាជ្ញាកណ្តាលក្នុងកម្មវិធី អាស៊ាន៣

អ្នកស្រីបញ្ជាក់ថា ក្រៅពីទទួលបានកម្រៃសម្រាប់ការធ្វើជាអាជ្ញាកណ្តាល និងចៅក្រម លោក អេ ភូថង មិនមានទទួលបានការឧបត្ថម្ភពីម្ចាស់ក្រុមហ៊ុនណាមួយ ឬសប្បុរសជនឡើយ។ ដោយឡែកការបណ្ដុះបណ្ដាលកីឡាករនៅក្លិបអេភូថងកីឡាវិញ លោកក៏គ្មានទទួលបានអ្វីច្រើនដែរ។

អ្នកស្រីសាំង សុម៉ាលីបានឲ្យដឹងថា កីឡាករខ្លះមកហ្វឹកហាត់ ពួកគាត់អត់យកប្រាក់ទេ ប៉ុន្តែកីឡាករខ្លះក៏ប្រាក់តិចតូចដែរ។ «កីឡាករណាខ្វះខាត់ ពួកខ្ញុំអត់យកលុយទេគឺមកហាត់ដោយសេរីហើយទៅផ្ទះវិញ តែកីឡាករខ្លះមានជីវភាពគ្រាន់បើ យើងយក៨ម៉ឺនរៀល ហើយហាត់រហូត។ យកតែ៨ម៉ឺនរៀលគឺហាត់រហូត តែអត់ដេកនៅក្លិបទេ។ បើដេកនៅក្លិប ខ្ញុំយកប្រហែល២០ម៉ឺន និងអង្កមួយបាវហើយហាត់រហូតដែរ»។

បើសរុបចំណូល លោក អេ ភូថងអាចរកចំណូលបានចន្លោះពី២០០ទៅ៣០០ដុល្លារអាមេរិកសម្រាប់រយៈពេលមួយខែ។ ប្រាក់ដែលលោករកបាននេះក៏គ្មានយកទៅចាយអ្វីក្រៅពីចិញ្ចឹមកូន ទិញអាហារ និងសម្ភារៈសម្រាប់ផ្គត់ផ្គង់ក្លិបអេភូថងកីឡារបស់លោក៕