យុទ្ធសាស្រ្តទីផ្សារថ្មី តូយ៉ូតាអនុញ្ញាតិអតិថិជនទិញរថយន្តបង់រំលស់

2014-11-29 20:16:38
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្រុមហ៊ុនតូយ៉ូតាបានដាក់ដំណើរការសេវាបង់រំលស់ "តូយ៉ូតាកម្ពុជាហ្វាយណែន" ដែលជាយុទ្ធសាស្រ្តថ្មីដើម្បីទាក់ទាញការគាំទ្ររបស់អតិថិជន និងដើម្បីពង្រីកទីផ្សារប្រើប្រាស់រថយន្តតូយ៉ូតានៅកម្ពុជា។

លោក លី ប៊ុនហៃ នាយកគ្រប់គ្រងផ្នែកលក់របស់ក្រុមហ៊ុនតូយ៉ូតាខេមបូឌាបានឲ្យដឹងថា ការដាក់ឲ្យដំណើរការសេវាបង់រំលស់ "តូយ៉ូតាកម្ពុជាហ្វាយណែន" ដោយសារក្រុមហ៊ុនមើលឃើញថានឹងអាចជួយទាក់ទាញការគាំទ្រពីអតិថិជន ជាពិសេសការពង្រីកទីផ្សារប្រើប្រាស់រថយន្តតូយ៉ូតាឲ្យមានការកើនឡើងបន្ថែមទៀត។

"ឆ្នាំ ២០១៤ នេះ យើងបានដាក់ផែនការលក់រថយន្តតូយ៉ូតាឲ្យបាន ១.៣០០ គ្រឿង នៅទីផ្សារកម្ពុជា។ ដូច្នេះជាមួយការអនុវត្តគម្រោងនេះ យើងជឿជាក់ថានឹងជួយជំរុញកំណើនការលក់រថយន្តតូយ៉ូតា ក៏ដូចជាអាចឲ្យក្រុមហ៊ុនសម្រេចផែនការលក់ដែលបានគ្រោងទុក។

បន្ថែមពីនេះ លោក លី ប៊ុនហៃ បានអះអាងថា ការដាក់ដំណើរការសេវាបង់រំលស់នេះ ក៏នឹងជួយសម្រួលដល់ពលរដ្ឋដែលខ្វះថវិកាឲ្យមានលទ្ធភាពទិញរថយន្តថ្មីកាន់តែច្រើន ដែលនេះពិតជានឹងរួមចំណែកកាត់បន្ថយការប្រើប្រាស់រថយន្តជជុះដែលខ្វះស្តង់ដា និងដែលកំពុងក្លាយជាក្តីព្រួយបារម្ភនិងបង្កបញ្ហាជាច្រើននៅលើដងផ្លូវ។

ការដាក់ដំណើរការសេវាបង់រំលស់ ត្រូវបានក្រុមហ៊ុនតូយ៉ូតាដាក់អនុវត្តនៅតាមប្រទេសធំៗជាង ៣៥ ជុំវិញពិភពលោក និងទទួលបានជោគជ័យគួរឲ្យកត់សម្គាល់។ ក្រុមហ៊ុនតូយ៉ូតាបានបញ្ជាក់ថា សម្រាប់សេវាបង់រំលស់ "តូយ៉ូតាកម្ពុជាហ្វាយណែន" នេះ អតិថិជនអាចសម្រេចចិត្តដោយផ្តើមការបង់ប្រាក់មុនចាប់ពី ៣០ ទៅ ៥០ ភាគរយនៃតម្លៃរថយន្ត និងអាចជ្រើសរើសរយៈពេលបង់ប្រាក់ចាប់ពី ១ ឆ្នាំ ទៅ ៥ ឆ្នាំ។

ព័ត៌មានបន្ថែមអាចទាក់ទងក្រុមហ៊ុនតូយ៉ូតា ឬតាមលេខទំនាក់ទំនង ០១៧ ២២២ ៥៣២/ ០១៧ ៣៣៣ ៥០៣

អត្ថបទ៖ ប៊ុណ្ណារ៉ា