តាមពិត ឃាតកស្រី Maggie Q ជាកូនកាត់វៀតណាមសោះ

2014-12-06 19:15:40
ចំនួនមតិ 0 | ចំនួនចែករំលែក 0

ចន្លោះមិនឃើញ

ជាតួលេចធ្លោជាងគេ ក្នុងខ្សែភាពយន្តចិន "ឃាតកស្រី" (Naked Weapon )" Margaret Denise Quigley ឬ Maggie Q ត្រូវបានប្រិយមិត្តភាគច្រើនយល់ច្រឡំថា នាងជាជនជាតិចិន ប៉ុន្តែតាមពិតនាងជាតារាសម្ដែង អាមេរិក កាត់វៀតណាម អៀរឡង់ និងប៉ូឡូញ។

ក្នុងការសម្ដែងខ្សែភាពយន្ត លាយឈុតក្ដៅសាច់ខាងលើ តារាស្រីវ័យ៣៥ឆ្នាំ ទទួលបានគាំទ្រច្រើន ពីសំណាក់អ្នកទស្សនា។ មុនមានកេរ្តិ៍ឈ្មោះល្បីល្បាញយ៉ាងដូច្នេះ តើនាងមានប្រវត្តិយ៉ាងណាខ្លះ?

Maggie Q កើតនៅថ្ងៃទី២២ ខែ ឧសភា ឆ្នាំ១៩៧៩។ នាងទទួលបានការគាំទ្រលើឆាកអន្តរជាតិ ខណៈសម្ដែងស៊េរីភាពយន្តរន្ធត់ Nikita របស់ស្ថានីយទូរទស្សន៍អាមេរិក The CW (ចាក់ផ្សាយក្នុងឆ្នាំ២០១០ ដល់ ២០១៣)។

ជីវិត និងការសិក្សា ធំដឹងក្ដីនៅទីក្រុង Honolulu រដ្ឋ Hawaii សហរដ្ឋអាមេរិក Maggie Q មានឪពុកជាជនជាតិអៀរឡង់ កាត់ប៉ូឡូញ និងម្ដាយជាជនអន្តោប្រវេសន៍វៀតណាម។ ឪពុកម្ដាយរបស់នាង ជួបគ្នាក្នុងអំឡុងពេលសង្គ្រាមវៀតណាម ហើយបច្ចុប្បន្ននាងមានបងប្អូនបង្កើតបួននាក់។

នៅសហរដ្ឋអាមេរិក Maggie បានចូលរៀនបឋមសិក្សា Mililani Waena បន្ទាប់ចូលអនុវិទ្យាល័យ Wheeler និងវិទ្យាល័យ Mililani។ នាងបានបញ្ចប់ការសិក្សានៅវិទ្យាល័យ Mililani ក្នុងឆ្នាំ១៩៩៧។ នាងបានទទួលអាហារូបករណ៍អត្តពលកម្ម នៅសាកលវិទ្យាល័យឯកជនមួយ និងបានចូលរៀនផ្នែកវិទ្យាសាស្ត្រពេទ្យសត្វ។

ការងារសិល្បៈ ដោយមានការឱ្យយោបល់ពីមិត្តភ័ក្ដិម្នាក់ Q បានចាប់ផ្ដើមការងារជាអ្នកបង្ហាញម៉ូដក្នុងទីក្រុង Tokyo នៅអាយុ១៧ឆ្នាំ មុនទៅទីក្រុងតៃប៉ិ (មិនជោគជ័យ) និងចុងក្រោយទៅបង្ហាញម៉ូដនៅទីក្រុងហុងកុង។

ការបង្ហាញខ្លួនរបស់នាងនៅហុងកុង បានធ្វើឱ្យ ឈិន ឡុង ចាប់អារម្មណ៍ និងជ្រើសរើសនាង ព្រោះតារាក្បាច់គុនរូបនេះ ឃើញថានាងមានសមត្ថភាពសម្ដែងរឿង។ ការយកចិត្តទុកដាក់បង្វឹកដ៏ហ្មត់ចត់របស់ឈិនឡុងបានឲ្យនាងយល់ពីសារសំខាន់នៃវិជ្ជាជីវៈ និងអាចឲ្យនាងសម្ដែងឈុតគ្រោះថ្នាក់បានខ្លួនឯង(Stunt)។

Q និយាយថា៖ "ចាប់តាំងប្រលូកក្នុងសិល្បៈមក ខ្ញុំមិនដែលរៀនក្បាច់គុនម្ដងណាសោះ ហើយមិនអាចសូម្បីតែឱនកាន់ម្រាមជើងខ្លួន”។ ការនិយាយនេះនាងចង់សំដៅថា ការបំពាក់បំប៉នពីឈិន ឡុងធ្វើឲ្យនាងរីកចម្រើនច្រើន។

ឆ្នាំ១៩៩៨ នាងបានសម្ដែងក្នុងរឿងភាគទូរទស្សន៍ " House of the Dragon” ដែលល្បីខ្លាំងនៅអាស៊ី។ ឆ្នាំ២០០០ នាងសម្ដែងជាតួ Anna រឿងរន្ធត់បិសាចក្បាលពីរ (Model from Hell) និងសម្ដែងតួ Jane Quigley ជាភ្នាក់ងារស៊ើបអង្កេត FBI ក្នុងរឿង "Gen-Y Cops"។ ការសម្ដែងរបស់នាងក្នុងខ្សែភាពយន្តនេះ ធ្វើឱ្យឈិន ឡុង ស្ងើចសរសើរនាងជាខ្លាំង ហើយក៏ត្រូវបានគេឱ្យសម្ដែង ក្នុងភាពយន្ត "Manhattan Midnight" និង "Rush Hour 2" ជាបន្តបន្ទាប់។ ឆ្នាំ២០០២ Q បានសម្ដែងរឿងក្បាច់គុន "ឃាតកស្រី ឬ Naked Weapon”។

ជីវិតបុគ្គល Q បានចូលរួមជាមួយអង្គការការពារសិទ្ធិសត្វរបស់អាមេរិក PETA យុទ្ធនាការលើកស្ទួយអ្នកតមសាច់ប្រចាំនៅអាស៊ី។ កាលពីមុន តារាស្រីពូកែដាក់អារម្មណ៍ឈុតស្នេហារូបនេះ ធ្លាប់មានទំនាក់ទំនងស្នេហា ជាមួយតារាហុងកុង Daniel Wu តារាសម្ដែងរួមគ្នាក្នុងរឿង "កំពូលនារីពិឃាដ"។

នាងមានសាក់បីកន្លែងនៅលើខ្លួន ពីរនៅលើដៃទាំងពីរ និងមួយទៀតនៅត្រគាកខាងឆ្វេង។ នាងមានបញ្ហាធ្ងន់ត្រចៀកខាងស្ដាំ ដោយសារការបំផ្ទុះពេលថតរឿង៕