ផ្ដើមប្រាក់ ១៨០០ ដុល្លារ អាចរកចំណូលបានជាង ១ សែនដុល្លារក្នុងមួយឆ្នាំ

2014-12-08 17:37:25
ចំនួនមតិ 0 | ចំនួនចែករំលែក 0

ចន្លោះមិនឃើញ

អ្នកស្រី ហូវ ដានេ អគ្គនាយិកា មជ្ឈមណ្ឌលកែសម្ផស្សឌែម៉ូគ្លីនិក ដែលជាគ្លីនិកល្បីខ្លាំងទៅលើការកែសម្ផស្ស ពិសេសក្នុងចំណោមតារាទោះ បានផ្ដើមការរកស៊ីមានដើមទុនត្រឹមតែ ១៨០០ ដុល្លារក្ដី ប៉ុន្តែបច្ចុប្បន្នអ្នកស្រីអាចរកចំណូលបានរហូតដល់ទៅជាង១សែនដុល្លារក្នុងមួយឆ្នាំ។

ស្ថានភាពគ្រួសារ

អ្នកស្រី ហូវ ដានេ កើតនៅថ្ងៃទី ០៣ ខែ មិនា ឆ្នាំ ១៩៧៨ ស្ថិតក្នុងភូមិ ចុងកោះ ឃុំ កោះតាស៊ុយ ស្រុក ព្រែកប្រសប់ ខេត្តក្រេះ។ អ្នកស្រីមានបងប្អូន ១០ នាក់ ស្រី ៥ ប្រុស ៥ ជាកូនទី ៦ ដែលគ្រួសារមានស្ថានភាពសេដ្ឋកិច្ចធូធារ ដោយឪពុកម្ដាយជា អ្នកចម្ការធំមួយនៅក្នុងទឹកដីខេត្តក្រចេះ ។

ការសិក្សា

អ្នកស្រី ហូវ ដានេ បានបញ្ចប់ថ្នាក់ឌុបនៅឆ្នាំ ១៩៩៣ នៅវិទ្យាល័យមួយក្នុងទីរួមខេត្តក្រចេះ។ ក្រោយចប់បាក់ឌុប អ្នកស្រីបានឡើងមកបន្តការសិក្សានៅភ្នំពេញដោយមកស្នាក់នៅជាមួយម្ដាយមីង។ គោលបំណងមកបន្តការសិក្សានៅភ្នំពេញ អ្នកស្រីដានេ ចង់រៀនជំនាញច្បាប់ ដើម្បីប្រលងចូលធ្វើជាមេធាវី ប៉ុន្តែ បំណងមួយនោះមិនបានសម្រេចឡើយ ព្រោះគ្រានោះឪពុកបានធ្លាក់ខ្លួនឈឺ ហើយក៏ទទួលមរណភាព ធ្វើឲ្យក្រុមគ្រួសារ មិនមានលទ្ធភាពឲ្យអ្នកស្រីបន្តការសិក្សាបាន។

បែបនេះក្ដីអ្នកស្រីបានសម្រេចចិត្តរៀនជំនាញវគ្គខ្លីៗវិញ ដោយជ្រើសរើស ជំនាញកាត់សក់ ផាត់មុខ។ ម្ដាយមីងរបស់អ្នកស្រីជាអ្នកមានធូរធារម្នាក់ ហើយគាត់មានភោជនីយដ្ឋានមួយកន្លែងនៅត្រើយម្ខាង រាជធានីភ្នំពេញ។ ដោយមិនចង់ពឹងផ្អែកទៅលើម្ដាយមីងទាំងស្រុង អ្នកស្រី ដានេ ជួយមើលការខុសត្រូវក្នុងហាងផង នឹង ឆ្លៀតទៅរៀនកាត់ សក់ផាត់មុខផង នៅហាងតូច១នៅផ្សារអូរឫស្សី។ រៀនជំនាញកាត់សក់ អ៊ុតសក់បានប្រហែលជា២ឆ្នាំ ក៏អាចមានសមត្ថភាពចេញធ្វើការបាន។

ធ្វើការដំបូងប្រាក់ខែ៣ម៉ឺនរៀល

ការងារដំបូងរបស់ អ្នកស្រី ដានេ ទទួលបានប្រាក់ខែតែ៣ម៉ឺនរៀល ដែលកាលណោះអ្នកស្រី បានទៅធ្វើការនៅហាងអ៊ុតសក់មួយនៅម្ដុំ DN ធ្វើបាន១ខែម្ចាស់ហាងបានដំឡើងប្រាក់ឲ្យបាន ៨ ម៉ឺនរៀល នឹងឡើងជាបន្តបន្ទាប់។

អ្នកស្រី ដានេ បាននិយាយថា ក្នុងរយៈពេល២ឆ្នាំ ដែលមករស់នៅភ្នំពេញរៀនជំនាញកាត់សក់អ៊ុតសក់រហូតដល់ចេះចេញធ្វើការ អ្នកស្រីមានសៀវភៅកំណត់ហេតុពីការចំណាយផ្ទាល់ខ្លួនមួយ។ រយៈពេលនេះអ្នកស្រី បានចាយប្រាក់របស់ម្ដាយអ្នកស្រីចំនួន៤៨ម៉ឺនរៀល ។ ប្រាក់ខែដំបូង អ្នកស្រីមិនបានចាយខ្លួនឯងឡើយ គឺសន្សំទុក ផ្ញើទៅឲ្យម្ដាយនៅឯស្រុកកំណើត ដោយចាយតែប្រាក់ធីបដែលភ្ញៀវឲ្យតែប៉ុណ្ណោះ។

ចេញបើកហាងមិនប្រើដើមទុន ប្រើតែចំណេះ អ្នកស្រី ដានេ ធ្វើការជាកូនជាងគេបានប្រហែល១ឆ្នាំប៉ុណ្ណោះ ក៏មានឱកាសបើកហាងបាន ដោយមិនប្រើដើមទុនសោះ គឺប្រើតែចំណេះ។ ដើមហេតុដែលនាំឲ្យអ្នកស្រី អាចក្លាយជាម្ចាស់ហាងនេះក៏ ព្រោះតែកាលដែលអ្នកស្រីធ្វើជាកូនជាងអ៊ុតសក់នោះ អ្នកស្រីមានស្គាល់ម៉ូយម្នាក់ ដែលបច្ចុប្បន្នជាថៅកែនាំចូលផ្ដាច់មុខផលិតផល Revlon ប្រចាំប្រទេសកម្ពុជា បានណែនាំឲ្យអ្នកស្រី ចេញបើកហាងដោយខ្លួនឯង ដោយថៅកែ Revlon នោះមានផ្ទះ និង សម្ភារៈ ចំណែកអ្នកស្រីមានតែជំនាញ ហើយពេលបានចំណេញចែកគ្នា ពាក់កណ្ដាលម្នាក់។

ក្រោយពីបើកហាងបានប្រហែល៣ទៅ៤ខែ ទូទាត់ទៅ អ្នកស្រី អាចសល់បាន ៣០០ ទៅ ៤០០ ដុល្លារ ក្នុងមួយខែ។ គ្រានោះអ្នកស្រីឈប់ស្នាក់នៅជាមួយម្ដាយមីង ហើយថែមទាំងបានយកប្អូន២នាក់ មកស្នាក់នៅជាមួយថែមទៀត ដើម្បីបន្តការសិក្សានៅភ្នំពេញ ។ កាលណោះ អ្នកស្រីបានជួលបន្ទប់មួយ នៅក្បែរហាងដែលអ្នកស្រីបើក។

បើកហាងអ៊ុតសក់ជាមួយថៅកែ Revlon មួយរយៈប៉ុណ្ណោះ ដោយហាងមួយនោះបានដើរស្រួល គួបផ្សំ ចង់អភិវឌ្ឍន៍ភាសាចិន និង អង់គ្លេសឲ្យកាន់តែប្រសើរ អ្នកស្រី ដានេ ក៏សម្រេចផ្លាស់ប្ដូរការងារ។

អ្នកស្រី ដានេ មិនទៅណាឆ្ងាយពីជំនាញដែលខ្លួនមានឡើយ អ្នកជំនួញមានកំណើតមកពីខេត្តក្រចេះម្នាក់នេះ បានមកធ្វើមេជាងផាត់មុខនៅស្ទូឌីយោថតរូបល្បីមួយឈ្មោះ "ម៉ូណាឌីហ្សា"ដែលមានថៅកែជាជនជាតិចិន ដោយកាលណោះទទួលបានប្រាក់ខែ ១៨០ ដុល្លារ ប៉ុន្តែ នៅមានប្រាក់ភាគរយផ្សេងទៀត។

ស្ទូឌីយោថតរូប "ម៉ូណាឌីហ្សា" នៅគ្រានោះល្បីខ្លាំងណាស់ តារា និង អ្នកមានៗ ទៅថតរូប ផាត់មុខនៅទីនោះច្រើនណាស់។ អ្នកស្រី ដានេ បានធ្វើនៅទីនោះប្រហែល៣ឆ្នាំប៉ុណ្ណោះ សន្សំប្រាក់បានខ្លះក៏បានទៅរៀនជំនាញ ម៉ូដសក់ និង ត្រាំទឹកដោះគោនៅហាងមួយ ក្នុងប្រទេសថៃ តាមការណែនាំពីមិត្តភ័ក្ដិ ដោយការទៅសិក្សានោះមានរយៈពេលតែ៣ខែ ។

ត្រឡប់មកពីរៀនពីប្រទេសថៃវិញ បានមកធ្វើជាកូនជាងនៅហាង "កែសម្ផស្ស និង អ៊ុតសក់សុជាតិ" ធ្វើនៅទីនោះបាន៣ខែក៏សម្រេចបើកហាងផ្ទាល់ខ្លួនតែម្ដង។

បើកហាងផ្ទាល់ខ្លួនមានដើមទុនត្រឹម១៨០០ដុល្លារ

ក្នុងអំឡុងពេលធ្វើការនោះ អ្នកស្រី ដានេ បានសន្សំបានមាសបាន៧ជី បូក និង ទ្រព្យម្ដាយចែកឲ្យខ្លះ អ្នកស្រីប្រមូលលក់ បានប្រាក់សរុប ១៨០០ ដុល្លារ ហើយក៏បានសម្រេចបើកហាងអ៊ុតសក់មួយឈ្មោះថា "Pretty saloon” ដែលមានទីតាំងនៅមុខ សណ្ឋាគារផ្ការាំទឹករាំ។

អ្នកស្រីបន្ដថា នៅឆ្នាំ ២០០៤ ដែលអ្នកស្រីបើកហាង "pretty saloon” ដើមឡើយមានផ្ទះតែ ១ ល្វែង កៅអី ២ អ៊ុតសក់ ២ និង កៅអីកក់សក់ ១ ប៉ុណ្ណោះ ប៉ុន្តែ ក្រោយបើកបានមួយរយៈ មានការទទួលការគាំទ្រក៏ឈានបើរហូតដល់២ល្វែង ហើយមានទទួលបង្រៀនសិស្សថែមទៀត។

អ្នកស្រី ដានេ បាននិយាយថា ហាងអ៊ុតសក់"pretty saloon”នេះហើយ ដែលធ្វើឲ្យ អ្នកស្រីមានលទ្ធភាពទិញផ្ទះ ទិញឡាន និង ឈានរហូតដល់ទៅបើកក្រុមហ៊ុនផ្ទាល់ខ្លួនថែមទៀតផង។ ក្រោយពីមាន អតិថិជនស្គាល់កាន់តែច្រើន និង ការទំនាក់ទំនងល្អ ក្រុមហ៊ុននាំចូលផលិតផល cosmetic ពីបរទេសជាច្រើនបានមកទាក់ទង ដើម្បីឲ្យហាងរបស់អ្នកស្រីជួយលក់បន្ត ក្នុងនោះមានដូចជាក្រុមហ៊ុន "Depomex “ជាដើម។

ដោយសារតែចង់លក់ផលិតផលផ្ដាច់មុខដោយខ្លួនឯង ឆ្នាំ ២០០៩ អ្នកស្រីនិង ស្វាមី បានបើកក្រុមហ៊ុនផ្ទាល់ខ្លួន ដែលចូលផលិតផល cosmetic ផ្ដាច់មុខមានឈ្មោះថា"dermopharma” ដោយនៅក្នុងនោះស្វាមីរបស់អ្នកស្រីជាអ្នកគ្រប់គ្រងផ្នែកហិរញ្ញវត្ថុទាំងមូល ចំណែកអ្នកស្រី កាន់តួនាទីជាប្រធានទីផ្សារ ។

ស្របពេលនោះដែរ អ្នកស្រីដានេ តែងតែត្រូវបានក្រុមហ៊ុន cosmetic នានាអញ្ជើញទៅទស្សនកិច្ចសិក្សានៅក្រៅប្រទេសជាបន្តបន្ទាប់ ដូចជា ថៃ វៀតណាម សាំងហ្គាពួរ និង សហរដ្ឋអាមេរិកជាដើម។

បើកមជ្ឈមណ្ឌលកែសម្ផស្សឌែម៉ូគ្លីនិក រហូតដល់ទៅ៣កន្លែងបន្តបន្ទាប់

ផ្អែកលើបទពិសោធន៍ និង បានឃើញពេលទៅទស្សនកិច្ចសិក្សានៅក្រៅប្រទេសជាបន្តបន្ទាប់ ជាមួយនឹងការសម្លឹងឃើញទីផ្សារក្នុងស្រុក គួបផ្សំមានការការផ្ដល់យោបល់វេជ្ជបណ្ឌិត ក្នុងស្រុកជាច្រើនផងនោះ នៅឆ្នាំ ២០១០ អ្នកស្រី ដានេ បានសម្រេចបើកមជ្ឈមណ្ឌលកែសម្ផស្សឌែម៉ូគ្លីនិក មួយឡើង នៅ DN ។

មជ្ឈមណ្ឌលកែសម្ផស្សឌែម៉ូគ្លីនិក មានបម្រើតែសេវាកម្មផ្នែក កែសម្ផស្ស ចំនួន ៤ ធំ ក្នុងនោះរួមានមាន៖

១ ការព្យាបាលរាល់ជំងឺសើស្បែក, ២ ព្យាបាលដោយឧបករណ៍ម៉ាស៊ីន, ៣ ការកែសម្ផស្សដោយមិនវះកាត់, និង ៤ ការកែសម្ផស្សដោយវះកាត់។ និយាយដោយខ្លី ការកែសម្ផស្សនៅលើពិភពលោកមាន ចាប់ពីចុងសក់រហូតដល់ចុងជើង គឺឌែម៉ូគ្លីនិក ក៏មានបម្រើជូនទាំងអស់នូវសេវាកម្ម ទាំងនោះដូចគ្នា។ ចំណែកវេជ្ជបណ្ឌិតវិញ សុទ្ធតែមានជំនាញត្រឹមត្រូវ ទទួលស្គាល់ពីក្រសួងសុខាភិបាលទាំងអស់ ។ ជាមួយគ្នានោះដែរ ក៏មាន វេជ្ជបណ្ឌិតឯកទេសបរទេសជាច្រើនអ្នកផងដែរ។

អ្នកស្រី ដានេ បានលើកឡើងថា ឌែម៉ូគ្លីនិកបើកនៅDN បើកមិនបាន១ឆ្នាំស្រួលបួលផង ក៏ឈានទៅបើកសាខាទី២ នៅជិតផ្សារចាស់ ហើយបន្តបើកនៅ សាខាទី៣ នៅ បូរីកីឡា និងចុងក្រោយ នៅចុងឆ្នាំ២០១៣ អ្នកស្រីបានបើកសាខាទី៤ នៅទួលគោក។

ទាំង៤សាខានេះ បើសរុបដើមទុនមិនក្រោម១លានដុល្លារនោះឡើយ ប៉ុន្តែអ្នកស្រី ដានេ បញ្ជាក់ ប្រាប់ថា ៣សាខា នៅDN ផ្សារចាស់ និង បូរីកីឡា មិនមែនជាកម្មសិទ្ធិផ្ដាច់មុខរបស់អ្នកស្រីទាំងអស់ឡើង គឺអ្នកស្រីបានផ្ទេរឲ្យបងប្អូន និង មិត្តភ័ក្ដិ តែអ្នកស្រីនៅតែទទួលបានភាគលាភ និង ប្រាក់ចំណេញផ្សេងៗទៀត ពីសាខាទាំងនោះ ជារៀងរាល់ខែ។

កម្មសិទ្ធិផ្ដាច់មុ របស់អ្នកស្រី ដានេ មានតែមួយកន្លែងប៉ុណ្ណោះ គឺមជ្ឈមណ្ឌលកែសម្ផស្សឌែម៉ូគ្លីនិកទួលគោក ដែលជាការិយាល័យកណ្ដាល មានលក្ខណៈទំនើបជាអន្តរជាតិ ។ ទោះបីជា ឌែម៉ូគ្លីនិកមានសាខាច្រើននិងអ្នកគ្រប់គ្រងផ្សេងគ្នាបែបនេះក្ដី ប៉ុន្តែគ្រប់សាខាមានបម្រើសេវាកម្មដូចៗគ្នាទាំងអស់ ករណីមានការវះកាត់ធំ គឺត្រូវបញ្ជូនមកការិយាល័យកណ្ដាល ឌែម៉ូគ្លីនិក ទួលគោក។ ប្រាក់ចំណេញពីជំនួញកែសម្ផស្សនេះ អគ្គនាយិកា រូបនេះបានបង្ហើបប្រាប់ថា មិនក្រោម១សែនដុល្លារក្នុង១ឆ្នាំនោះឡើយ។

ជោគជ័យមិនមែនកើតឡើងតែម្នាក់ឯង

អគ្គនាយិកាមានឥទ្ធិពលម្នាក់នេះ បានលើកឡើងថា មជ្ឈមណ្ឌលកែសម្ផស្សឌែម៉ូគ្លីនិក មិនមែនតែជារបស់អ្នកស្រីម្នាក់ឯងឡើយ គឺជារបស់ បុគ្គលិកទាំងអស់គ្នា ។ អ្នកស្រី មិនដែលចាត់ទុកខ្លួនជា ថៅកែ មើលងាយមើលថោកកូនចៅនោះទេ។ អ្នកស្រីថា រាប់ទាំងអ្នកអនាម័យ សន្តិសុខ បុគ្គលិកគ្រប់ជាន់ថ្នាក់ គឺជាសរសៃឈាមនៃភាពជោគជ័យទាំងអស់។ រាល់ការប្រជុំម្ដងៗ អ្នកស្រីតែងតែឲ្យអ្នកអនាម័យ ក៏ដូចជា សន្តិសុខ ចូលរួម ស្វែងរកគំនិតថ្មីៗ ដើម្បីស្ថាបនា ឌែម៉ូគ្លីនិកឲ្យកាន់តែរីកចម្រើនថែមទៀត។ ជារៀងរាល់ឆ្នាំ គ្រប់បុគ្គលិកទាំងអស់សុទ្ធតែមានការលើកទឹកចិត្ត។

បណ្ដាំផ្ញើមកយុវវ័យ

អគ្គនាយិកា រូបនេះ បានលើកឡើងថា វិស័យកែសម្ផស្សនៅលើពិភពលោក កំពុងតែត្រូវបានយកចិត្តទុក្ខដាក់ខ្លាំង ក្នុងនោះប្រទេសអភិវឌ្ឍមាននិស្សិតច្រើនណាស់រៀននៅជំនាញមួយនេះ។ តែបើងាកមកប្រទេសកម្ពុជាវិញនៅមិនទាន់មានច្រើននៅឡើយទេ ប្រសិនបើនិស្សិតជំនាន់ក្រោយ ងាកមកចាប់ជំនាញមួយនេះ គឺល្អខ្លាំងណាស់ ត្បិតអីជំនាញមួយនេះ ងាយស្រួលរកប្រាក់គួរសម ៕