គ្រួសារ Sabay ក្នុងយុទ្ធនាការសង្គ្រោះជីវិតដោយបរិច្ចាគឈាម

2014-12-10 00:04:07
ចំនួនមតិ 0 | ចំនួនចែករំលែក 0

ចន្លោះមិនឃើញ

គ្រួសារ Sabay និងសប្បុរសជនមួយចំនួនទៀត បានបើកយុទ្ធនាការបរិច្ចាគឈាមស្ម័គ្រចិត្តពេញមួយព្រឹកនេះ នៅការិយាល័យក្រុមហ៊ុនតែម្ដង ហើយវាជាលើកទី៣របស់ក្រុមគ្រួសារ Sabay ក្នុងបេសកកម្មរួមចំណែកកាត់បន្ថយកង្វះខាតឈាមក្នុងសង្គមខ្មែរ ដែលមជ្ឈមណ្ឌលជាតិផ្ដល់ឈាមកំពុងដង្ហោយរក។

បើទោះជាការលើកទឹកចិត្តឲ្យមានការសង្គ្រោះជល់ជីវិតដោយការបរិច្ចាគឈាម បានផ្សព្វផ្សាយទូលំទូលាយទៅបណ្ដាមហាជន តែបញ្ហានេះនៅតែស្ថិតក្នុងស្ថានភាពកង្វះខាតកម្រិតខ្ពស់នៅឡើយ។

មន្ត្រីមជ្ឈមណ្ឌលជាតិផ្ដល់ឈាមឲ្យដឹងថាមកទល់ពេលនេះ ឈាមពីការបរិច្ចាគមានមិនដល់ ពាក់កណ្ដាលឈាមដែលត្រូវការចាំបាច់សម្រាប់សង្គ្រោះជីវិតជនរងគ្រោះផង។ «គឺមានប្រមាណ៤០%នៃការត្រូវការ។ ហើយបញ្ហាសំខាន់ត្រង់ ថាប្រជាជននៅតែភ័យខ្លាចនឹងបរិច្ចាគ»។

លោក អ៊ឹង ងួនតុលា មន្ត្រីអប់រំផ្សព្វផ្សាយរកអ្នកបរិច្ចាគឈាមថា ការផ្សព្វផ្សាយកន្លងមកកំពុងទាញឲ្យសន្ទុះអ្នកបរិច្ចាគកើនឡើង បើទោះក្នុងកម្រិតយឺតៗ តិចតួច។ ហើយឆ្នាំ២០១៣ទៅមិញការបរិច្ចាគកើនឡើងច្រើន ដែលអ្នកបរិច្ចាគភាគច្រើនគឺយុវជនសិស្សសាលា និស្សិតមហាវិទ្យាល័យជាដើម។

មជ្ឈមណ្ឌលជាតិផ្ដល់ឈាមនឹងបន្តផ្សព្វផ្សាយឲ្យកាន់តែទូលាយ ស្វែងរកការបរិច្ចាគឈាមឲ្យគ្រប់គ្រាន់កង្វះខាត ដើម្បីលុបចោលទាំងស្រុងរាល់ភាពអសកម្មនៃការផ្គត់ផ្គងនិងចរាចរណ៍ឈាម។

ប្រជាជនមួយចំនួនភ័យខ្លាចថាឈាមដែលផ្ដល់នឹងយកទៅលក់ដូរ ដែលមិនបានបម្រើដល់ប្រយោជន៍ដូចគាត់ចង់បាន តើមានការបកស្រាយបែបណា? លោក ងួនតុលា ពន្យល់ថាតែងមានភាពអសកម្មខ្លះក្នុងការចរាចរឈាម តែស្ថាប័នផ្គត់ផ្គង់ថ្នាក់ជាតិនេះកំពុងលុបបំបាត់។ មជ្ឈមណ្ឌលជាតិផ្ដល់ឈាមតែងពន្យល់ថា តើឈាមទាំងនេះនឹងបម្រើកង្វះខាតបែបណា ហើយរាល់ពេលអ្នកបរិច្ចាគត្រូវការ អាចទៅទាក់ទងនៅឯណា និងថាឈាមទាំងនេះនឹងមិនយកទៅលក់ដូរឡើយ។ មជ្ឈមណ្ឌលក៏កំពុងត្រៀមចេញច្បាប់ បោសសម្អាតអ្នកធ្វើអាជីវកម្មឈាម ដើម្បីជីករំលើងចោលទាំងស្រុងនូវភាពអសកម្មក្នុងការផ្គត់ផ្គង់ឈាមទៅជនរងគ្រោះ។

ព្រឹកនេះ បុគ្គលិក Sabay តាំងពីថ្នាក់គ្រប់គ្រងតាមផ្នែកនានាបានចូលគ្រែបរិច្ចាគឈាមម្ដងម្នាក់ៗ ដើម្បីរួមចំណែកកិច្ចមនុស្សធម៌មួយនេះ។

មន្ត្រីផ្នែកទីផ្សាររបស់ Sabay វ័យក្បែរ៣០ឆ្នាំ លីណា ថានេះជាលើកទី៣ហើយ ដែលអ្នកស្រីបរិច្ចាគឈាម។ «ដំបូងខ្ញុំភ័យ តែវាមិនអីផង។ ពេទ្យថានៅពេលខ្ញុំត្រូវការគឺអាចទាក់ទងសុំវិញបាន។ ប៉ុន្តែបើមិនយើងមិនត្រូវការវាទេ ទោះមិនសម្រាប់ជួយខ្លួនឯង ក៏វានឹងជួយសង្គ្រោះទៅដល់មនុស្សដទៃដែលកំពុងត្រូវការ »