នាយ កុយ និង នាយ ក្រឹម លាក់បាំងព័ត៌មានឡើងស័ក្ដិជាឧត្ដមសេនីយ៍ផ្កាយ១?

2014-12-16 15:52:23
ចំនួនមតិ 0 | ចំនួនចែករំលែក 0

ចន្លោះមិនឃើញ

នាយ កុយ និង នាយក្រឹម បានបដិសេធន៍ព័ត៌មានឡើងផ្កាយ ១ ជារឿងមិនពិត។ ក៏ប៉ុន្តែប្រភពដ៏ទុកចិត្តមួយនិយាយថា តារាកំប្លែងទាំងពីរនេះ ពិតជាឡើងតំណែងពីស័ក្តិ ៥ ទៅជាឧត្ដមសេនីយ៍ផ្កាយ ១ នៅក្នុងជួរកងអង្គរក្សរបស់សម្ដេច ហ៊ុន សែន។

តារាកំប្លែង លោក អ៊ូ ប៊ុណ្ណារ៉ាត់ ហៅនាយ ក្រឹម និយាយថា៖ "ដឹងមកពីណា នរណានិយាយ បើសាមីខ្លួនអត់ដឹងផងហ្នឹង មិនពិតទេអូន"។

នាយ ក្រឹម បន្តថា លោកនៅតែមានស័ក្តិ ៥ ដដែល ក្នុងជួរកងអង្គរក្សរបស់សម្ដេចនាយករដ្ឋមន្ត្រី ហ៊ុន សែន ហើយលោកបានបដិសេធន៍ទាំងស្រុងព័ត៌មានលេចលឺថា បានឡើងជាឧត្ដមសេនីយ៍ផ្កាយ១។

មិនខុសពីនាយ ក្រឹមទេ តារាកំប្លែង លោក ជួង ជី ហៅនាយ កុយ ក៏បានឆ្លើយថា លោកមិនបានដំឡើងឋានន្តរសក្ដិទៅជាផ្កាយ ១ ដូចជាការលើកឡើងដូចគ្នា។

នាយ កុយ បញ្ជាក់ថា៖ "អត់ដឹងផងៗ ឡើងផ្កាយ១អីគេអូន ពូនៅធម្មតាដដែលហ្នឹង ខាងណាគេប្រាប់"។

តារាកំប្លែងរូបនេះ លើកឡើងទៀតថា តារាអាជីពជាតារាកំប្លែងដូច លោក ត្រឹមស័ក្ត ៥ ដូចពេលបច្ចុប្បន្ន គឺគ្រប់គ្រាន់ហើយ លោកមិនចង់ទាមទារឱ្យខ្ពស់ជាងនេះឡើយ។

បើទោះជាតារាកំប្លែងល្បីឈ្មោះទាំងពីរឆ្លើយបដិសេធន៍ព្រមគ្នាក៏ដោយ ប្រភពមួយបានឲ្យដឹងថា នាយ កុយ និង នាយ ក្រឹម ពិតជាឡើងឋានន្តរសក្ដិជាឧត្ដមសេនីយ៍ផ្កាយ ១ ពិតមែននាពេលបច្ចុប្បន្ន។

មូលហេតុនាំឱ្យឡើងថ្នាក់ជាឧត្ដមសេនីយ៍ផ្កាយ ១ ត្រូវប្រភពអះអាងបន្ថែមថា ដោយសារតែតារាកំប្លែងទាំងពីរបានចូលរួមចំណែកជួយជាតិ ក៏ដូចជាជួយសង្គមបានច្រើននាពេលកន្លងមក។

ព័ត៌មានទាក់ទងនឹងការឡើងតំណែងជាឧត្ដមសេនីយ៍ត្រីរបស់តារាកំប្លែងល្បីឈ្មោះទាំងពីរខាងលើមិនត្រូវបញ្ចេញឱ្យដឹងជាសាធារណៈទេ ព្រោះខ្លាចមហាជនមួយចំនួនរិះគន់។

បើទោះបីជាមានការលើកឡើងពីករណីថា តារាកំប្លែងល្បីឈ្មោះក្នុងព្រះរាជាណាចក្រកម្ពុជាទាំងពីរក្ដី ក៏អ្នកទាំងពីរបានច្រានចោលទាំងស្រុងចំពោះព័ត៌មាននៃការឡើងឋានៈជាឧត្តមសេនីយ៍ផ្កាយ ១។

ទាំងនាយ កុយ និង នាយ ក្រឹម សុទ្ធតែ ជាទាហានក្នុងជួរកងអង្គរក្សរបស់ សម្ដេច ហ៊ុន សែន ដូចគ្នា។ ពួកគេទាំងពីរក៏ធ្លាប់សម្ដែងកំប្លែងរួមគ្នាផងដែរ តែក្រោយមកបែកបាក់គ្នាទៅវិញ ដោយម្នាក់ៗបង្កើតក្រុមកំប្លែងផ្សេងពីគ្នា។

អានអត្ថបទបន្ត៖ មង្គលការកូនស្រីនាយក្រឹមយប់មិញភ្ញៀវគគ្រឹកគគ្រេង!

អានអត្ថបទបន្ត៖ ពិធីករកម្មវិធី “រង្វាន់ទេវតា” បង្ខំចិត្តសេងហាងនៅផ្លូវកម្ពុជា

អានអត្ថបទបន្ត៖ វីដេអូក្មេងប្រុសអាយុ៨ឆ្នាំ រាំបទរបស់ Bruno Mars ឡូយម៉ាអេម

អត្ថបទ៖ អ៊ីង សុឡា