បូនីតា ដាដេណា ទម្លាយរឿងបានប្ដីជាសេដ្ឋីអារ៉ាបក្នុងថ្ងៃខួប

2014-12-18 16:11:24
ចំនួនមតិ 0 | ចំនួនចែករំលែក 0

ចន្លោះមិនឃើញ

តារាសម្ដែងជើងចាស់ អ្នកស្រី បូនីតា ដាដេណា បានទម្លាយរឿងស្នេហានៅថ្ងៃខួបកំណើតឲ្យ Sabay ថា ខ្លួនកំពុងតែមានទំនាក់ទំនងស្នេហាជាមួយសេដ្ឋីអារ៉ាប់ល្បីឈ្មោះម្នាក់ ដោយបច្ចុប្បន្ន ជ្រុលមានកូន ៣ ខែ ជាមួយគ្នា។

ទំនាក់ទំនងរបស់ អ្នកស្រី បូនីតា ដាដេណា មិនមែនទើបតែកើតឡើងឡើយ គឺកើតឡើងជាង២ឆ្នាំមកហើយ គ្រាន់តែមិនធ្លាប់ទម្លាយឲ្យដឹងជាសាធារណៈ។ ចាងហ្វាងផលិតកម្មភាពយន្តអធិមង្គលនិយាយប្រាប់នៅក្នុងខួបកំណើតកាលពីថ្ងៃទី ១៦ ខែធ្នូថា អ្នកស្រីបានស្គាល់សេដ្ឋីអារ៉ាប់តាម Facebook ដោយមានការណែនាំពីមិត្តភ័ក្ដិ ហើយក្រោយមកក៏ឈានដល់មានទំនាក់ទំនងស្នេហាជាមួយគ្នា។

តាមការរៀបរាប់ប្រាប់ពីសាមីខ្លួន ស្វាមីរបស់អ្នកស្រី ជាអ្នកជំនួញធំមួយរូប មានវ័យ ៦៥ ឆ្នាំ ជាជនជាតិអារ៉ាប់ បច្ចុប្បន្នកំពុងតែរកស៊ីលក់រថយន្តនៅសហរដ្ឋអាមេរិក។ អ្នកស្រី បូនីតា ដាដេណា បានឲ្យដឹងទៀតថា ស្វាមីរបស់អ្នកស្រី ឧស្សាហ៍ចេញចូលស្រុកខ្មែរណាស់ ជាធម្មតា ៣ ទៅ៤ ខែ គឺមកលេងម្ដង។

ទំនាក់ទំនងស្នេហារវាងអ្នកស្រី ដាដេណា និង សេដ្ឋីអារ៉ាប់ ឥឡូវបានតំណក់ឈាមមួយទុកជាចំណងដៃ គឺមានកូនអាយុ ៣ ខែ។

ដោយសារតែវ័យកាន់តែចាស់រៀងៗខ្លួន អ្នកស្រី បូនីតា ដាដេណា មិនមានគម្រោងរៀបការឡើយ។ អ្នកស្រីសង្ឃឹមថា ចំណងស្នេហ៍មួយនេះ នឹងក្លាយជាចំណងស្នេហាចុងក្រោយក្នុងឆាកជីវិត ត្បិតអីមុនឈានដល់ស្នេហាជាសេដ្ឋីអារ៉ាប់ម្នាក់នេះ អ្នកស្រីធ្លាប់ឆ្លងកាត់មានស្វាមី ២ លើក មកហើយ៕