កម្ពុជាត្រៀមទីលាន ធ្វើម្ចាស់ផ្ទះស៊ីហ្គេម២០២៣ដល់កម្រិតណាហើយ?
- 2015-01-22 17:37:22
- ចំនួនមតិ 0 | ចំនួនចែករំលែក 0
កម្ពុជាត្រៀមទីលាន ធ្វើម្ចាស់ផ្ទះស៊ីហ្គេម២០២៣ដល់កម្រិតណាហើយ?
ចន្លោះមិនឃើញ
នៅសល់មិនដល់១០ឆ្នាំទៀតដែលប្រទេសកម្ពុជាគ្រោងនឹងទទួលរៀបចំធ្វើជាម្ចាស់ផ្ទះនៃព្រឹត្តិការណ៍កីឡាអាស៊ីអាគ្នេយ៍ (ស៊ីហ្គេម)នៅឆ្នាំ២០២៣ដែលជាព្រឹត្តិការណ៍ធំប្រចាំតំបន់អាស៊ានរយៈពេល២ឆ្នាំម្តង។ បន្ទាប់ពីទទួលភារកិច្ចធំលើកដំបូងមក តើប្រទេសកម្ពុជាបានត្រៀមលក្ខណៈសម្បត្តិ ជាពិសេសទីកន្លែងសម្រាប់រៀបចំការប្រកួតបានដល់កម្រិតណា?
គម្រោងពហុកីឡដ្ឋានមរតកតេជោ
ឯកឧត្តម វ៉ាត់ ចំរើន អគ្គលេខាធិការគណៈកម្មាធិការជាតិអូឡាំពិកកម្ពុជាបានប្រាប់ Sabay ផ្តាច់មុខតាមរយៈបទសម្ភាសន៍ពិសេសដូចខាងក្រោម៖
មុន្នីរម្យ៖ ប្រទេសកម្ពុជាយើងនឹងទទួលរៀបចំធ្វើជាម្ចាស់ផ្ទះនៃព្រឹត្តិការណ៍កីឡាស៊ីហ្គេមនៅឆ្នាំ២០២៣ តើគេតម្រូវឲ្យកម្ពុជាយើងមានទីលានប្រកួតប៉ុន្មានទើបអាចធ្វើម្ចាស់ផ្ទះបាន? វ៉ាត់ ចំរើន៖ ការរៀបចំធ្វើជាម្ចាស់ផ្ទះកីឡាស៊ីហ្គេម ប្រទេសមួយទាល់តែមានកន្លែងអាចរៀបចំការប្រកួតបានកីឡាចំនួន២២ប្រភេទឡើង។ តាមច្បាប់របស់ស៊ីហ្គេមគឺរៀបចំការប្រកួតក្នុងរយៈពេលមិនលើសពី២សប្តាហ៍ អីចឹងគ្រប់ប្រភេទកីឡាទាំងអស់ត្រូវបញ្ចប់ក្នុងរយៈពេលក្រោម១៥ថ្ងៃ។ ទោះជាយើងមិនអាចមានទីលានគ្រប់ដល់ចំនួនជាង២២ តែប្រភេទកីឡាខ្លះក៏អាចរៀបចំការប្រកួតលើទីលានតែមួយបាន ដូចជាកីឡាមួយប្រភេទប្រកួតត្រឹមតែ៥ថ្ងៃ ហើយកីឡាផ្សេងអាចប្រកួតនៅថ្ងៃបន្ទាប់ជាដើម។
មុន្នីរម្យ៖ ពហុកីឡដ្ឋានមរតកតេជោជាទីលានដ៏សំខាន់បំផុតសម្រាប់ការរៀបចំ តើរហូតដល់ពេលនេះការកសាងឈានដល់កម្រិតណាហើយ? វ៉ាត់ ចំរើន៖ រហូតដល់ពេលនេះយើងកំពុងកសាងក្នុងដំណាក់កាលទីមួយបានប្រហែលជា៦០ភាគរយហើយ។ ដំណាក់កាលទីមួយនេះមានកន្លែងសំខាន់ៗមួយចំនួនដូចជា អាងហែលទឹក Indoor Stadium ដែលមាន៣កន្លែងក្នុងនោះ២កន្លែងសម្រាប់ហ្វឹកហាត់ មានកន្លែងសម្រាប់កីឡាករ៣០០នាក់ស្នាក់នៅ និងមានតារាងបាល់មួយទៀត។ ទីលាន និងកន្លែងទាំងអស់នេះធ្វើបានជាង៦០ភាគរយហើយ ប៉ុន្តែក្រុមហ៊ុនកសាងមិនទាន់ឲ្យអ្នកជំនាញគណៈកម្មាធិការជាតិអូឡាំពិកទៅត្រួតពិនិត្យនៅឡើយទេ ហើយទាល់តែគេធ្វើរួចរាល់ និងបំពាក់សម្ភារៈទើបយើងទៅត្រួតពិនិត្យ។
មុន្នីរម្យ៖ តើមានប៉ុន្មានដំណាក់កាលទៀតសម្រាប់ការកសាងពហុកីឡដ្ឋានមរតកតេជោ បន្ទាប់ពីដំណាក់កាលទីមួយ? វ៉ាត់ ចំរើន៖ យើងនៅមាន២ដំណាក់កាលទៀតសម្រាប់ការកសាងពហុកីឡដ្ឋានមរតកតេជោ។ ដំណាក់កាលទីពីរគឺយើងធ្វើកីឡដ្ឋានបាល់ទាត់សំខាន់ជាងគេដែលគម្រោងនេះនឹងទទួលបន្ទុកកសាងដោយក្រុមហ៊ុនចិនដែលគ្រោងចាប់ផ្តើមសាងសង់នៅឆ្នាំ២០១៦ និងគ្រោងរួចរាល់ឆ្នាំ២០១៨។ ចំពោះដំណាក់កាលទី៣ យើងនឹងកសាងទីលានកីឡាសំខាន់ផ្សេងទៀតដូចជាសាលបាញ់កាំភ្លើងជាដើម។
មុន្នីរម្យ៖ ពហុកីឡដ្ឋានមរតកតេជោកគ្រោងនឹងចំណាយអស់ថវិកាប៉ុន្មាន និងទទួលបានប្រាក់មកពីណាខ្លះ? វ៉ាត់ ចំរើន៖ សម្រាប់ដំណាក់កាលទីមួយគឺគ្រោងនឹងចំណាយអស់ប្រាក់ជាង៣០លានដុល្លារអាមេរិកដែលជាប្រាក់របស់រដ្ឋាភិបាលកម្ពុជា ហើយក្រុមហ៊ុនលី យ៉ុងផាត់ទទួលបន្ទុកកសាង។ ចំពោះដំណាក់កាលទីពីរដែលកសាងកីឡដ្ឋានបាល់ទាត់សំខាន់នោះគ្រោងនឹងចំណាយថវិកាជាង១០០លានដុល្លារអាមេរិកជាជំនួយឥតសំណងពីរដ្ឋាភិបាលចិន ហើយក្រុមហ៊ុនចិនជាអ្នកទទួលបន្ទុកកសាង។ ចំពោះដំណាក់កាលចុងក្រោយគ្រោងចំណាយជាង១០លានដុល្លារអាមេរិក តែយើងអត់ទាន់មានតម្រុយថាបានលុយមកពីណាទេ។ ពហុកីឡដ្ឋានមរតកតេជោគ្រោងបញ្ចប់មុនឆ្នាំ២០២០ ដើម្បីទុកពេល២ទៅ៣ឆ្នាំមុនសម្រាប់ការធ្វើតេស្ត។
មុន្នីរម្យ៖ ចុះក្រៅពីពហុកីឡដ្ឋានមរតកតេជោ តើមានកីឡដ្ឋាន និងទីលានកន្លែងណាផ្សេងទៀតដែលសម្រាប់រៀបចំការប្រកួតស៊ីហ្គេម? វ៉ាត់ ចំរើន៖ ក្រៅពីពហុកីឡដ្ឋានមរតកតេជោគឺពហុកីឡដ្ឋានជាតិអូឡាំពិកដែលយើងមានស្រាប់។ ក្រៅពីនោះទៀតយើងអាចនឹងធ្វើឡើងនៅតាមសាលអគារធំៗដូចជានៅកោះពេជ្រជាដើម ពីព្រោះតាមអគារហ្នឹងជាកន្លែងមានសាលដែលរៀបចំការប្រកួតបានដូចជាកីឡាបែបប្រយុទ្ធ និងសម្តែងជាដើម ហើយមានកន្លែងសម្រាប់អ្នកទស្សនា និងចតយានយន្ត។ លើសពីនេះទៀត យើងប្រហែលជាត្រូវទៅដល់ខេត្តកែប ពីព្រោះនៅភ្នំពេញអត់មានកន្លែងរៀបចំកីឡាលើទឹកទេ មានតែនៅកំពត ឬកែបដែលមានដៃសមុទ្រដែលអាចរៀបចំការប្រកួតកីឡាលើទឹកបាន។ យើងនឹងដោះស្រាយជាបន្តបន្ទាប់ទៀតសម្រាប់ទីលានដែលនៅសល់។
មុន្នីរម្យ៖ ចុះនិយាយពីគុណភាពវិញយ៉ាងម៉េចដែរ? វ៉ាត់ ចំរើន៖ និយាយពីគុណភាពវិញសុទ្ធតែទទួលស្គាល់ និងស្របតាមមាត្រដ្ឋានអន្តរជាតិ។ ពហុកីឡដ្ឋានមរតកតេជោត្រូវបានត្រួតពិនិត្យដោយអ្នកជំនាញបច្ចេកទេសសហព័ន្ធកីឡាអាស៊ី និងអន្តរជាតិ ព្រមទាំង FIFA៕
អត្ថបទ៖ សុខ មុន្នីរម្យ