បុរសចិនជួបវិបត្តិខ្វះប្រពន្ធធ្ងន់ធ្ងរ ២៤លាននាក់អាចអត់ប្រពន្ធ
- 2014-12-29 23:26:41
- ចំនួនមតិ 0 | ចំនួនចែករំលែក 0
បុរសចិនជួបវិបត្តិខ្វះប្រពន្ធធ្ងន់ធ្ងរ ២៤លាននាក់អាចអត់ប្រពន្ធ
ចន្លោះមិនឃើញ
ប្រទេសចិនកំពុងជួបវិបត្តិខ្វះមនុស្សស្រី ដោយសារតែគោលនយោបាយកូនតែមួយ ឬ One-child policy ដែលធ្វើឲ្យឪពុកម្ដាយពន្លូតកូនស្រី យកតែកូនប្រុសដើម្បីស្នងត្រកូល។ ប្រសិនបើនិន្នាការនេះនៅតែបន្ត ឆ្នាំ២០២០ខាងមុខ បុរសចិនដល់ទៅ២៤លាននាក់ដែលគ្រប់អាយុរៀបការ នឹងជួបវិបត្តិខ្វះមនុស្សស្រីយកធ្វើជាប្រពន្ធ។
ការពន្លូតកូនស្រី បានធ្វើឲ្យចំនួនមនុស្សប្រុសមានលើសមនុស្សស្រីច្រើនលើសលប់ ចាប់តាំងឈានចូលទសវត្សឆ្នាំ១៩៨០មក។ ការមិនមានសម្មាមាត្រភេទនេះ មានន័យថាទសវត្សក្រោយ (២០២០) បុរសមួយចំនួននឹងត្រូវបង្ខំចិត្តរៀបការជាមួយមនុស្សស្រីខុសជំនាន់គ្នា ឬមនុស្សស្រីដែលមានអាយុច្រើនជាង។
ដោយសារតែបែបនេះហើយ ទើបមានករណីនាំមនុស្សស្រីពីក្រៅប្រទេស ជាពិសេសពីតំបន់អាស៊ីអាគ្នេយ៍ យកទៅរៀបការជាមួយបុរសចិន។ យោងតាម Bloomberg View បានឲ្យដឹងថាមានឈ្មួញកណ្ដាលនាំមនុស្សស្រីពីប្រទេសវៀតណាមចូលទៅចិន ដើម្បីធ្វើជាកូនក្រមុំ។ កាសែត Beijing News វិញ បានបញ្ជាក់ថាបុរសចិនត្រូវចំណាយ១៨៥០០ដុល្លារ ឲ្យទៅឈ្មួញកណ្ដាលវៀតណាមដើម្បីបានប្រពន្ធ។ មានបុរសចិនខ្លះក៏ត្រូវចាញ់បោកឈ្មួញកណ្ដាល អស់លុយអត់ប្រយោជន៍ផងដែរ។
គោលនយោបាយកូនតែមួយ ត្រូវបានគណបក្សកុម្មុយនិស្តចិនបង្កើតឡើងកាលពី៣ទសវត្សមុន ដើម្បីបង្ការការកើនឡើងចំនួនប្រជាជនច្រើនហួសប្រមាណ។ គោលនយោបាយនេះបានរារាំងការបង្កកំណើតកូនដល់ទៅ៤០០លាននាក់។ ប្ដីប្រពន្ធនៅទីក្រុងអាចមានកូនតែម្នាក់គត់ ខណៈនៅជនបទអាចមានកូនដល់២នាក់ ប៉ុន្តែស្ថិតក្រោមកាលៈទេសៈច្បាស់លាស់មួយ។
ដោយ៖ សុខ សុវត្ថិ
ប្រភព៖ CNN, bloomberg view