ស្ត្រីគ្រូបង្រៀនខ្មែរដំបូងគេប្រជែងពានរង្វាន់ពិភពលោក រង្វាន់១លានដុល្លារ

2014-12-29 23:52:21
ចំនួនមតិ 0 | ចំនួនចែករំលែក 0

ចន្លោះមិនឃើញ

ស្ត្រីជនជាតិខ្មែរជាប្រវត្តិសាស្ត្រដែលបានចាប់ការងារជាគ្រូបង្រៀនកុមារពិការភ្នែកនៅកម្ពុជាតាំងពីឆ្នាំ១៩៩៣មក ឥឡូវនេះអ្នកស្រី នាង ផល្លា បានជាប់ក្នុងបញ្ជី Finalist ជាមួយគ្រូបង្រៀនមកពីប្រទេសផ្សេងៗ៤៩នាក់ទៀត ប្រជែងគ្នាយកពានរង្វាន់ Global Teacher Prize នៅទីក្រុងឌូបៃដែលមានប្រាក់រង្វាន់ដល់ទៅ១លានដុល្លារ។

មុនវិលមកកម្ពុជាបង្រៀន និងបង្កើតឲ្យមានអក្សរជនពិការភ្នែកដល់កុមារកម្ពុជានៅឆ្នាំ១៩៩៣ អ្នកស្រីមានប្រវត្តិធ្លាប់ជានាយិកាសាលាមួយរបស់អង្គការសហប្រជាជាតិនៅជំរំជនភៀសខ្លួនលើដីថៃតាំងពីឆ្នាំ១៩៨៦។ ទីនោះអ្នកស្រី នាង ផល្លា ដែលត្រួសត្រាយឲ្យមានកម្មវិធីសិក្សាសម្រាប់ជនពិការនិងឥឡូវបានក្លាយជានាយិកាសាលាកុមារពិការភ្នែកភ្នំពេញថ្មី និងជាមន្ត្រីគ្រប់គ្រងកម្មវិធីសិក្សាកុមារពិការភ្នែកនិងថ្លង់គប្រចាំអង្គការគ្រួសារថ្មីទូទាំងប្រទេស បានធ្វើការពាក់នឹងការអប់រំកុមារពិការភ្នែកនៃគ្រួសារជនភៀសខ្លួនខ្មែរ។

និយាយពី Global Teacher Prize វិញពេលនេះអ្នកស្រី នាង ផល្លា ស្ត្រីខ្មែរដំបូងដែលជាប់ក្នុងការជ្រើសរើសស្វែងរកគ្រូបង្រៀនជើងឯកថ្នាក់ពិភពលោកនេះ បានស្ថិតនៅបញ្ជី៥០នាក់ចុងក្រោយ។ ដំណាក់កាលបន្ទាប់ គឺការវាយតម្លៃជម្រុះទុក១០នាក់ចុងក្រោយ ដែលនឹងប្រកាសនៅពាក់កណ្ដាលខែកុម្ភៈ២០១៥។

ឯជយលាភីពានរង្វាន់ ១លានដុល្លារនេះនឹងប្រកាសក្នុងសន្និបាត The Global Education and Skill Forum នៅ ឌូបៃថ្ងៃទី១៦មីនា២០១៥៕