ភ្នំពេញឥឡូវមិនដូចពីដើមទេ ការញ៉ាំកាហ្វេសឹងជារឿងធម្មតាទៅហើយ

2014-10-08 20:00:16
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្លិនកាហ្វេដ៏ឈ្ងុយឆ្ងាញ់បានគ្របដណ្ដប់ក្នុងរាជធានីភ្នំពេញនាព្រឹកព្រហាម។ ក្លិនទាំងនេះ ត្រូវបានភាយចេញពីកន្លែងតៀមកាហ្វេ ឬអ្នករុញរទេះកាហ្វេ និង ហាងទំនើបនានា ដែលគេសង្កេតឃើញនៅកន្លែងទាំងនោះ មានមនុស្សអង្គុយពិសាកាហ្វេត្រៀបត្រាពីព្រលឹមស្រាងៗទល់ព្រលប់។

ក្រៅពីអ្នកញុំាកាហ្វេគិតថា ជាភេសជ្ជៈមួយជួយកម្លាំង ខួរក្បាល ទីតាំងកាហ្វេក៏ជាចំណុចសំខាន់សម្រាប់សិស្ស-និស្សិត អ្នកជំនួញតូច-ធំ និង អ្នកធ្វើការងាររដ្ឋ ជាដើម យកធ្វើជាកន្លែងណាត់ជួបគ្នា ជជែកគ្នាពីនេះពីនោះទៅតាមស្ថានភាពជាក់ស្ដែង។ តើទីតាំងកាហ្វេបែបណាទើប ជាកន្លែងញុំាកាហ្វេល្អ?

http://youtu.be/0BqdBcmwC10?list=UUY70LlkxiaPm2VEOvN_cmaQ

តៀមកាហ្វេ

កំពុងអង្គុយនៅ តៀមកាហ្វេស្ថិតនៅច្រកតូច (ដឿងហែម) ខាងកើតផ្សារអូរឫស្សី៤ លោកកុសល មន្ត្រីមន្ទីរសាធារណៈការ និងដឹកជញ្ជូនបាននិយាយថា លោកមកទីនេះហូបកាហ្វេទៀងទាត់អស់រយៈពេលជិត២០ឆ្នាំមកហើយ។ លោកបាននិយាយថា ហេតុផលដែលលោកចូលចិត្តកាហ្វេនៅទីនេះ មិនមែនដោយសារតែកាហ្វេឆ្ងាញ់ម្យ៉ាងទេ តែទីនេះធ្វើអាយលោកស្គាល់មនុស្សកាន់តែច្រើន។

"ខ្ញុំហូបកាហ្វេនៅទីនេះតាំងពីកាហ្វេ១កែវមិនដល់១ពាន់ តែឥឡូវ១កែវ២៥០០រៀល។ បើខ្ញុំទៅផឹកកន្លែងផ្សេង គឺមិនហ៊ាននិយាយអីច្រើននោះទេ ព្រោះមិនសូវស្គាល់គេ តែបើនៅ ទីនេះម៉ាសេរី អ្នកញុំានៅទីនេះសុទ្ធតែគ្នាឯង"។

អាចថា ការញៀននឹងរសជាតិកាហ្វេ និងទីកន្លែង បានទាក់ទាញអតិថិជនមកហូបកាហ្វេនៅកន្លែងដដែលៗស្ទើររៀងរាល់ថ្ងៃ។ លោកសំណាង ដែលនិយមចូលចិត្តញុំាកាហ្វេ បានបញ្ចេញទស្សនៈដែរថា មិនថាទីតាំងកាហ្វេតូច-ធំនោះទេ ប៉ុន្ដែកន្លែងធ្លាប់ញុំាកាហ្វេ សេវាកម្ម និងស្គាល់មនុស្សច្រើន គឺបានទាក់ទាញអារម្មណ៍ឲ្យយើងចង់តែទៅទីនោះ។

លោក សំណាងដែលមានផ្ទះនៅឯម្ដុំស្ទឹងមានជ័យ ប៉ុន្តែលោកបានធ្វើដំណើរមករកកាហ្វេនៅដឿងហែមផ្សារអូរឫស្សី តាំងពីព្រឹកព្រហាមមុននឹងចូលធ្វើការ ហើយសកម្មភាពនេះកើតមានដដែលៗស្ទើរជារៀងរាល់ថ្ងៃ។ "ខ្ញុំពេលខ្លះហូបកាហ្វេរហូតដល់២ដងទៅ៣ដងក្នុង១ថ្ងៃ ដូច្នេះខ្ញុំត្រូវជិះម៉ូតូចុះឡើង តែខ្ញុំនៅតែមកទីនេះហូបកាហ្វេ"។

កន្លែងលក់កាហ្វេនៅច្រកតូច ខាងកើតផ្សារអូរឬស្សី

កាហ្វេរុញតាមរទេះ

ងាកមកមើលការលក់កាហ្វេចល័តវិញ គឺកាហ្វេរុញតាមរទេះ កំពុងក្លាយជាចំណាប់អារម្មណ៍គ្រាន់បើដែរក្នុងរយៈពេលចុងក្រោយនេះពិសេសក្នុងចំណោមកម្មករ អ្នករត់ម៉ូតូឌុប សន្តិសុខនិងអ្នកធ្វើដំណើរនានាតាមដងផ្លូវជាដើម។ អ្នកស្រីពឿន អ្នកលក់កាហ្វេតាមរទេះរុញ នៅម្ដុំផ្សារដើមថ្កូវ បានប្រាប់សប្បាយថា អ្នកស្រីរុញរទេះកាហ្វេនេះ អស់ពេលជិត១០ឆ្នាំមកហើយ ហើយភ្ញៀវភាគច្រើនគឺអ្នកធ្វើដំណើរ។ កាហ្វេមួយកំប៉ុងតម្លៃតែ១ពាន់រៀល ឯកាហ្វេទឹកដោះគោទឹកកកតម្លៃ១៥០០រៀល។

យុវជនណន ផា ជាកម្មករសំណង់ បានបញ្ចេញចំណាប់អារម្មណ៍ថា មួយថ្ងៃៗរវល់ធ្វើការឲ្យគេ គឺមិនសូវមានពេលញុំាកាហ្វេនៅហាងនោះទេ ឲ្យតែឃើញរទេះរុញកាហ្វេ គឺលោកហៅញុំាភ្លាម។ "ខ្ញុំថា វាស្រួលពេលធ្វើការនឿយហត់ អស់កម្លាំងផង នៅពេលបានញុំាកាហ្វេមួយកែវ គឺហាក់ដូចជាមានកម្លាំងឡើងវិញអញ្ចឹង"។ មួយទៀតចំណូលតិច ដូច្នេះញុំាកាហ្វេរុញរទេះ តម្លៃថោក ជាងញុំាកាហ្វេតាមហាង។

កាហ្វេនៅហាងទំនើប

បរិវេណក្នុងហាងទំនើប

ដោយឡែកកាហ្វេនៅតាមហាងទំនើបវិញ ក៏បានទាក់ទាញចំណាប់អារម្មណ៍សម្រាប់សិស្ស-និស្សិត អ្នកធ្វើការវិស័យឯកជន និងរដ្ឋមិនអន់ដែរ។ លោក សាន់ ស៊ីណា អ្នកគ្រប់គ្រងទូទៅនៅហាងកាហ្វេ T&C ធ្លាប់បាននិយាយប្រាប់ Sabay ថា យុវវ័យប្រហែលជាង ៣០% បានមកញុំាកាហ្វេនៅហាងកាហ្វេ T&C សាខាផ្លូវសម្ដេចប៉ានសង្កាត់បឹងរាំងខណ្ឌដូនពេញ រាជធានីភ្នំពេញ។ ភាគច្រើននៃពួកគេមកទីនេះ ដើម្បីស្រាវជ្រាវឯកសារ ឬណាត់គ្នាជជែកពីការងារផ្សេងៗផង។ ទន្ទឹមនឹងនេះ T&C ក៏មានបន្ទប់ដាច់ដោយឡែកសម្រាប់ភ្ញៀវធ្វើការប្រជុំពិភាក្សាជាលក្ខណៈឯកជនដែរ។

យុវតី ឡាលីន និស្សិតឆ្នាំទី ០៣ នៅសាកលវិទ្យាល័យន័រតុន ដែលបានទៅហូបកាហ្វេ Cappuccino ជាមួយមិត្តភ័ក្ដិនៅ T&C សម្ដេចប៉ាន បានបញ្ចេញទស្សនៈថា នៅទីនេះទទួលបានផាសុកភាពព្រោះហាងបំពាក់ដោយម៉ាស៊ីនត្រជាក់ និង មាន Free Wi-Fi ដែលងាយនៅក្នុងការស្រាវជ្រាវឯកសារ ដើម្បីធ្វើ Assignment របស់សាលា។

យុវជនពិសិដ្ឋ ដែលមកជាមួយ ឡាលីន បានបញ្ចេញទស្សនៈដែរថា កាហ្វេទឹកកក ១កែវ តម្លៃ ១ ដុល្លារ ជាជំនួយដ៏សំខាន់ដល់បរិយាកាសពិភាក្សាគួបផ្សំ និង ទីតាំងស្ងប់ស្ងាត់ល្អមានទីចតយានយន្តផង។