វិទ្យាល័យ ហ៊ុន សែន ភ្នំពេញថ្មី សង្ឃឹម ៨០% ការពារជើងឯក Western Cup
- 2015-01-10 12:00:13
- ចំនួនមតិ 0 | ចំនួនចែករំលែក 0
វិទ្យាល័យ ហ៊ុន សែន ភ្នំពេញថ្មី សង្ឃឹម ៨០% ការពារជើងឯក Western Cup
ចន្លោះមិនឃើញ
ក្រុមបាល់ទះមកពីវិទ្យាល័យ ហ៊ុន សែន ភ្នំពេញថ្មី រំពឹងដល់ទៅ ៨០% ដើម្បីការពារតំណែងជើងឯកក្នុងព្រឹត្តិការណ៍កីឡាបាល់ទះពានរង្វាន់សកលវិទ្យាល័យវេស្ទើនឆ្នាំ ២០១៥ នេះ (Western Cup 2015) ដែលកំពុងតែដំណើរការនៅវគ្គជម្រុះតាមពូល។
ក្រុមវិទ្យាល័យភ្នំពេញថ្មី កាលពីថ្ងៃបើកឆាកកន្លងទៅ
អមនឹងក្ដីសង្ឃឹមខាងលើលោក អ៊ុក វណ្ណៈ គ្រូបង្វឹករបស់ក្រុមជើងឯកកាលពីឆ្នាំ២០១៤ មួយនេះបានលើកឡើងថា ក្រុមលោកហ្វឹកហាត់រៀងរាល់ព្រឹក ចាប់ពីថ្ងៃច័ន្ទ ដល់ សៅរ៍ អស់ពេលជាង ១ ខែកន្លះមកហើយ។ លោកបានបញ្ចូលសមាជិកថ្មីចំនួន ២ នាក់ដើម្បីបន្ថែមកម្លាំងមុនការប្រកួតមកដល់។
លោកគ្រូកីឡាប្រចាំសាលាបានបន្ថែមទៀតថា ក្រុមដែលទំនងជាគូប្រជែងសំខាន់សម្រាប់ក្រុមលោកនៅឆ្នាំនេះគឺ វិទ្យាល័យ ហ៊ុន សែន ជម្ពូវ័នព្រោះសាលាមួយនេះមានកីឡាករល្អៗច្រើន និង ហ្វឹកហាត់ជាប្រចាំ មិនតែប៉ុណ្ណោះគឺសមត្ថភាពក្រុមទាំងមូលប្រដំប្រសងគ្នាជាមួយក្រុមលោកដែរ។ ចំណែកក្រុមដែលធ្វើឱ្យលោកបារម្ភផ្សេងទៀតមាន វិទ្យាល័យព្រែកឯង និង វត្តកោះ ព្រោះកម្លាំងក្រុមនៅស្ថិតក្នុងភាពអាថ៌កំបាំងនៅឡើយ។
ការប្រកួតកន្លងទៅរបស់ពានរង្វាន់ Western Cup
លោកគ្រូ វណ្ណៈ នឹងប្ដូរទម្រង់ប្រកួតមួយចំនួននៅឆ្នាំនេះ ដោយតម្រូវឱ្យអ្នកលើកបាល់ (ប៉ះសេ) លោត ម្ដងខណៈរាល់ដងលើ ប៉ះបាល់ឱ្យមិត្តរួមក្រុមគប់។ លោកថាការធ្វើបែបនេះធ្វើឱ្យគូប្រកួតមិនអាចស្មានដឹងថាអ្នកប៉ះសេ បញ្ជូនបាល់ឱ្យអ្នកណានោះឡើយ។
សរុបសាលាដែលធ្លាប់ឈ្នះពានរង្វាន់នេះមាន ឆ្នាំ ២០១០ បានទៅវិទ្យាល័យឬស្សកែវ ហើយឆ្នាំ ២០១១ ធ្លាក់ទៅវិទ្យាល័យហ៊ុនសែន ជម្ពូវ័ន វិញម្ដង។ ចំណែកនៅឆ្នាំ ២០១២ បានទៅវិទ្យាល័យព្រែកលៀប ប៉ុន្ដែនៅឆ្នាំ ២០១៣ វិទ្យាល័យហ៊ុនសែន ជម្ពូវ័ន ដណ្ដើមបានមកវិញ និង ចុងក្រោយឆ្នាំ ២០១៤ បានមកវិទ្យាល័យ ហ៊ុនសែន ភ្នំពេញថ្មី៕
អត្ថបទ៖ ម៉ឺន រស្មី
© រក្សាសិទ្ធិគ្រប់យ៉ាងដោយ Sabay ឆ្នាំ២០២៤
គោលការណ៍ភាពឯកជន | Privacy Policy
អាសយដ្ឋាន
អគារលេខ ៣០៨ មហាវិថីព្រះមុន្នីវង្ស
សង្កាត់បឹងរាំង ខណ្ឌដូនពេញ
Sabay Digital Corporation ជាក្រុមហ៊ុនព័ត៌មានឌីជីថល និងកម្សាន្តឈានមុខគេនៅកម្ពុជា។ ព័ត៌មានបន្ថែម
ផលិតផល និង សេវាកម្ម របស់ Sabay
