Samsung ​ទំនង​នឹង​ផ្ដោត​ទៅ​លើ​ការ​ឌីហ្សាញ​ Smartphone ​កំពូល​របស់​ខ្លួន​សម្រាប់​ចេញ​ក្នុង​ឆ្នាំ​ ២០១៥​ ​នេះ​កាន់​តែ​ខុស​ប្លែក​ ​និង​អស្ចារ្យ​​ជាង​មុន។ ​នេះ​បើ​តាម​ប្រភព​កៀក​កិត​នឹង​ក្រុមហ៊ុន​ដែល​សុំ​មិន​បញ្ចេញ​ឈ្មោះ។ ​

​​​ក្រុមហ៊ុន​បច្ចេកវិទ្យា​យក្ស​កូរ៉េខាងត្បូង​​អាច​នឹង​បញ្ចេញ​ទូរសព្ទ​កំពូល​​ជំនាន់​ក្រោយ​របស់​ខ្លួន​​គឺ​ Galaxy S6 ​​ពីរ​ម៉ូដែល​​​នៅ​សមាជ​ទូរសព្ទ​ពិភពលោក​ (MWC) ​នៅ​ខែ​មិនា​ខាងមុខ។

Galaxy Alpha ​​ទូរសព្ទ​ដំបូង​របស់​ Samsung ​ដែល​រចនា​គែម​ដោយ​លោហធាតុ

​​​​​ម៉ូដែល​ទី​មួយ​អាច​​ផលិត​ដោយ​ស្រោប​លោហធាតុ​ ខុស​ប្លែក​ពី​ត្រកូល​ Galaxy ​មុន​ៗ​ដែល​ធ្វើ​ពី​ប្លាស្ទិក។ ​​តែ​គេ​មិន​ច្បាស់​ថា ​​តើ​ Samsung ​នឹង​ស្រោប​ទៅ​លើ​តួ​ទាំង​មូល​ដូច​ iPhone ​ឬ​ស្រោប​តែ​គែម​ដូច​ Galaxy Alpha។

​​ម៉ូដែល​ទី​ពីរ​​គឺ​ជា​ប្រភេទ​ទូរសព្ទ​អេក្រង់​​កោង​បញ្ឆិត​​​ដូច​ Galaxy Note Edge ​ដែរ។ ​​អេក្រង់​បញ្ឆិត​នេះ​​ល្អ​ត្រង់​ថា ​វា​​​អាច​​​ដំណើរការ​ដោយ​ Touch ​​នៅ​ចំហៀង​​​​មិន​​ចាំបាច់​ Touch ​ទៅ​លើ​ Main Screen ​ដើម្បី​បញ្ជា​ ​ហើយ​វា​ក៏​អាច​​បង្ហាញ​ Notification ​និង​ការ​ Update ​ទៅ​លើ​ App​​ មួយ​ចំនួន​នៅ​ត្រង់​នោះ​ផ្ទាល់​ដែរ។

Note Edge ​អេក្រង់​បញ្ឆិត​របស់​ Samsung ​ដែល​ចេញ​ចុង​ឆ្នាំ​ ២០១៤​

​​ក្នុង​ឆ្នាំ​ថ្មី​នេះ​ ​អ្វី​ដែល​ក្រុមហ៊ុន​​ទូរសព្ទ​លេខ​ ១ ​ក្នុង​លោក​នេះ​មិន​មើល​រំលង​គឺ​ ​Smartwatch ​ អេក្រង់​មូល​ស្រដៀង​​នឹង​​ Moto 360 Smartwatch ​​ដែល​ទទួល​ការ​សរសើរ​ពី​អ្នក​ជំនាញ​ជា​ច្រើន​ទៅ​លើ​ការ​រចនា​ម៉ូដ​ថា ​ស្អាត។ ​​

Moto 360 អេក្រង់​មូល​ដែល​ Samsung ​អាច​នឹង​បញ្ចេញ​ម៉ូដ​ស្រដៀង​គ្នា

​ពាក់​ព័ន្ធ​នឹង​គម្រោង​ទាំង​អំបាលម៉ាន​ខាង​លើ​នេះ​ អ្នក​នាំ​ពាក្យ​របស់​ Samsung ​​បាន​សុំ​ដក​ខ្លួន​មិន​ធ្វើ​ការ​បកស្រាយ​​អ្វី​ឡើយ។

កន្លង​មក​ ​ក៏​ធ្លាប់​មាន​ការ​បញ្ជាក់​ពី​ចំនួន​ចេញ​លក់​​ Smartphone ​កំពូល​របស់​ Samsung ​​ថា ​នឹង​កាត់​បន្ថយ​ដើម្បី​ផ្តោត​ទៅ​លើ​គុណភាព​ និង​ការ​រចនា​សម្រាប់​ឆ្នាំ​ថ្មី​​នេះ​ដែរ ​តែ​​អ្វី​ៗ​ស្ថិត​នៅ​​ជា​មន្ទិល​នៅ​ឡើយ។ ​​ចាំ​មើល​ទាំង​អស់​គ្នា​​ថា ​អ្វី​ដែល​រៀបរាប់​ខាង​លើ​គឺ​ជា​គម្រោង​របស់​ Samsung ​មែន​ឬ​យ៉ាង​ណា ​ហើយ​ថា ​​វាអាច​ជួយ​រក​ចំណែក​ទីផ្សារ​ឲ្យ​​ Samsung បាន​ខ្លាំង​វិញ​ឬ​អត់​​នៅ​ឆ្នាំ​នេះ៕

អាន៖ Apple Watch ដ៏​ប្រណិត​គ្មាន​ពីរ​លើ​លោក​នឹង​ចេញ​នៅ​ខែ​មីនា​នេះ តម្លៃ​…

​​​ប្រែ​សម្រួល៖ ​សីហា ប្រភព៖​ Businessinsider