លទ្ធផលជំរុញការផលិតភាពយន្តចេញហើយ ក្រោយសម្ដេច ហ៊ុន សែន ដាក់បញ្ជា!

2015-01-21 12:37:55
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្រសួងពាក់ព័ន្ធចំនួន ៦ បានអនុម័តគោលការណ៍ ៥ ចំណុចជួយជំរុញការផលិតខ្សែភាពយន្តខ្មែរ ដើម្បីឈានទៅកាន់បន្ថយការចម្លងស្នាដៃពីបរទេស។ ការធ្វើនេះក្រោយពី សម្ដេច ហ៊ុន សែន ចេញបញ្ជាឱ្យផ្នែកពាក់ព័ន្ធរៀបវិស័យភាពយន្តខ្មែរឱ្យដំណើរការទៅមុខកាន់តែប្រសើរ។

ប្រធាននាយកដ្ឋានភាពយន្ត និង ផ្សព្វផ្សាយវប្បធម៌ នៃក្រសួងវប្បធម៌ និង វិចិត្រសិល្បៈ លោក ស៊ិន ចន្ទសាយ៉ា បានចូលរួមអនុម័តគោលការណ៍ទាំង ៥ ខាងលើប្រាប់ថា កិច្ចប្រជុំមានក្រសួងសេដ្ឋកិច្ច និង ហិរញ្ញវត្ថុ ជាអ្នកដឹកនាំកិច្ចប្រជុំអន្តរក្រសួង ដោយមានការចូលរួមពី ក្រសួងព័ត៌មាន ក្រសួងវប្បធម៌ និង វិចិត្រសិល្បៈ ក្រសួងអប់រំយុវជន និង កីឡា ក្រសួងពាណិជ្ជកម្ម ក្រសួងធម្មការ និង កិច្ចការសាសនា ក្រសួងទេសចរណ៍ និង ស្ថាប័នពាក់ព័ន្ធមួយចំនួនទៀត ព្រមព្រៀងលើគោលការណ៍ ៥ ចំណុចដើម្បីជួយដល់ផលិតករកំពុងជួបប្រទះបញ្ញាផលិតកុន រួមនឹងជួយលើកកម្ពស់វិស័យភាពយន្តជាតិ។

សកម្មភាពថតភាពយន្តរបស់ផលិតករខ្មែរ កាលពីពេលថ្មីៗ

គោលការណ៍ទាំង ៥ មានដូចជា៖

ទី ១ រដ្ឋនឹងបង្កើតមូលនិធិបដិភាគមួយដើម្បីជួយអភិវឌ្ឍសិល្បៈខ្មែរ ដោយរដ្ឋជួយដល់ផលិតករ និង ការផលិតកម្មវិធីក្នុងស្រុក។

ទី ២ រដ្ឋលើកទឹកចិត្ត និង គាំទ្ររាល់ការផលិតស្នាដៃក្នុងស្រុក ដើម្បីឈានទៅកាត់បន្ថយការចម្លងស្នាដៃពីបរទេស។

ទី ៣ រដ្ឋនឹងមិនយកពន្ធទេ រាល់ការទិញសម្ភារៈបច្ចេកទេសមកពីបរទេស។

ទី ៤ ពន្ធអាករ ១០ % រដ្ឋព្យួរទុកដដែល

ទី ៥ រដ្ឋនឹងសម្របសម្រួលទីតាំង និង រមណីយដ្ឋាននានា ដល់ផលិតករ ដើម្បីងាយស្រួលដល់ការថតខ្សែភាពយន្ត។

លោក ស៊ិន ចន្ទសាយ៉ា បន្តគោលការណ៍ទាំង ៥ ចំណុចដែលក្រសួងពាក់ព័ន្ធបានអនុម័ត បានដាក់ឆ្លងទៅសម្ដេច ហ៊ុន សែន រួចហើយ។ ក្នុងនោះប្រមុខរាជរដ្ឋាភិបាលកម្ពុជា ក៏បានយល់ព្រមចំណុចទាំងនោះផងដែរ។

ប្រធាននាយកដ្ឋានរូបនេះបង្ហាញជំនឿថា គោលការណ៍ទាំង ៥ ចំណុចខាងលើនឹងជួយសម្រួលការងារផលិតករបានច្រើន រួមនឹងការជួយលើកកម្ពស់វិស័យភាពយន្តខ្មែរថែមទៀត។

ពាក់ព័ន្ធនឹងគោលការណ៍ ៥ ចំណុច លោក ឆាយ បូរ៉ា ផលិតករ និង ជាចាងហ្វាងផលិតកម្ម ដើមត្នោត ហើយជាប្រធានសមាគមផលិតភាពយន្តខ្មែរ បានសាទរចំណុចសំខាន់ទាំង ៥ ខាងលើ។ ក៏ប៉ុន្តែលោកចង់ឱ្យផលិតករចូលរួមជជែកបន្ថែមទៀតជាមួយក្រសួងពាក់ព័ន្ធនានា ដើម្បីធ្វើយ៉ាងឱ្យវិស័យភាពយន្តខ្មែរទាំងមូលកាន់តែប្រសើរឡើង។

លោក ឆាយ បូរ៉ា បញ្ជាក់ដូច្នេះថា៖ "យើងគ្រាន់តែដឹងគោលការណ៍ចម្បងៗ តែយើងអត់ដឹងចំណុចលម្អិតមួយៗឱ្យច្បាស់ទេ។ ដូច្នេះហើយខ្ញុំចង់ឱ្យមានវេទិកាមួយទៀតជជែកជាមួយផលិតករនានា ដើម្បីឱ្យស៊ីជម្រៅជាងនេះ"។

ក្រុមផលិតករលើកឡើងពីបញ្ហាពន្ធកាន់ទុក ថ្ងៃសម្ពោធរឿង បង្គោលគ្រាក់សង្កត់វិញ្ញាណ នាពេលថ្មីៗ

ដោយឡែក លោក ប៉ុល វិបូ ផលិតករ និង ជាចាងហ្វាងផលិតកម្ម Angkor Picture បង្ហាញអារម្មណ៍សប្បាយរីករាយពេលដឹងរដ្ឋាភិបាលញាប់ដៃញាប់ជើង ដោយបានអនុមតិចេញជាគោលការណ៍ទាំង ៥ ឡើង។

លោកបានលើកឡើងថា៖"ក្នុងចំណោមគោលការណ៍ទាំង៥ មានពីរចំណុចដែលខ្ញុំសប្បាយចិត្តបំផុតគឺ រឿងសម្រួលទីតាំងថត និងការទិញសម្ភារៈបច្ចេកទេសពីបរទេសដោយមិនបង់ពន្ធ ល្អមែនទេន។ ពីរចំណុចទៀតខ្ញុំមិនទាន់ហ៊ានថាទេ ព្រោះមិនទាន់ដឹងលម្អិត ហើយចំណុចមួយទៀតរឿង ពន្ធ ១០ ភាគរយខ្ញុំលែងនិយាយហើយ ព្រោះរដ្ឋគាត់តម្រូវអ៊ីចឹង"។

ផលិតកររូបនេះ បានថ្លែងអំណរគុណជាខ្លាំងដល់រាជរដ្ឋាភិបាលកម្ពុជា ដោយបានយកចិត្តទុកដាក់លើវិស័យភាពយន្ត ក៏ដូចជាទុក្ខលំបាកផលិតករ។ ទន្ទឹមនឹងនេះ លោកក៏ស្នើដល់រាជរដ្ឋាភិបាលពង្រីកដែនអាជីវកម្មភាពយន្តខ្មែរនៅតាមបណ្ដាខេត្តឱ្យបានច្រើនថែមទៀត។

កាលពីចុងឆ្នាំ ២០១៤ កន្លងទៅ ក្នុងសម័យប្រជុំពេញអង្គគណៈរដ្ឋមន្ត្រី ប្រមុខរាជរដ្ឋាភិបាលកម្ពុជា សម្ដេច ហ៊ុន សែន បានណែនាំឱ្យក្រសួង និង ផ្នែកពាក់ព័ន្ធ ធ្វើយ៉ាងណារិះរកវិធីជំរុញលើកទឹកចិត្តដល់ការផលិតខ្សែភាពយន្ត និង សិល្បៈខ្មែរ ទាំងបរិមាណ និងគុណភាព ក្នុងគោលដៅកាត់បន្ថយ ការនាំចូលសិល្បៈភាពយន្តពីបរទេស៕

អានអត្ថបទបន្ត៖កូនប្រុសរបស់អធិរាជសំឡេងមាស ស៊ីន ស៊ីសាមុត ទទួលមរណភាពមុននេះ!

អានអត្ថបទបន្ត៖ វណ្ណា ពិសិដ្ឋ មានអនុស្សាវរីយ៍ ជូរចត់បំផុតពេលរួមការងារ

អានអត្ថបទបន្ត៖ ដឹងថា ករុណា ពេជ្រ បានលុយមកពីណាខ្លះ ដើម្បីទិញផ្ទះវិឡា

អត្ថបទ៖ អ៊ីង សុឡា