ការ​លក់​អាល់ប៊ុម​តែ​មួយ​មុខ មិន​អាច​ឲ្យ​តារា​ចម្រៀង​ល្បី​ៗ​លំដាប់​ពិភពលោក​រក​ចំណូល​បាន​រហូត​ដល់​រាប់​រយ​លាន​ដុល្លារ​ឡើយ​ក្នុង​មួយ​ឆ្នាំ​ៗ។ ប្រភព​ចំណូល​ធំ​មួយ​ទៀត​របស់​ពួក​គេ គឺ​ការ​ប្រគំ​តន្ត្រី​ទេសចរណ៍។ ក្នុង​ចំណោម​តារា​ចម្រៀង​ជា​ច្រើន​ដែល​បាន​បញ្ចប់​ការ​ប្រគំ​តន្ត្រី​ទេសចរណ៍​ចុង​ក្រោយ​នៅ​ឆ្នាំ​២០១៤ គេ​បាន​រក​ឃើញ​តារា​ចម្រៀង ១០​រូប ដែល​អាច​រក​ចំណូល​បាន​ច្រើន​ជាង​គេ​ ពី​ការ​ប្រគំ​តន្ត្រី​ទេសចរណ៍​នេះ។ ទស្សនា​ខាង​ក្រោម​នេះ​ទាំង​អស់​គ្នា ថា​តើ​តារា​ចម្រៀង ឬ​ក្រុម​ចម្រៀង​មួយ​ក្រុម​ណា​អាច​រក​ចំណូល​បាន​ច្រើន​ជាង​គេ៖​

១0. Bruno Mars៨៤​លាន​ដុល្លារ

នៅ​ឆ្នាំ​២០១៤ Bruno Mars បាន​ទៅ​សម្ដែង​ចំនួន ៧៦​ប្រទេស​ សម្រាប់​ការ​ផ្សព្វផ្សាយ​អាល់ប៊ុម " Unorthodox Jukebox”។ ការ​ប្រគំ​តន្ត្រី​ទេសចរណ៍​របស់​ម្ចាស់​បទ "Lazy Song” ​រូប​នេះ មាន​ឈ្មោះ "The Moonshine Jungle Tour” ដែល​បាន​ចាប់​ផ្ដើម​ពី​ខែ​មិថុនា ឆ្នាំ​២០១៣ រហូត​ដល់​ខែ​តុលា ឆ្នាំ​២០១៤។ សរុប​ការ​លក់​សំបុត្រ​ទាំង​អស់​បាន​ចំនួន ៩៧៤ ៨១៧​សន្លឹក ដោយ​តម្លៃ​សំបុត្រ​ជា​មធ្យម​គឺ ៨៦ដុល្លារ។

៩. Paul McCartney៨៤,៥​លាន​ដុល្លារ

បើ​ទោះ​ជា​មាន​វ័យ ៧២ឆ្នាំ​ហើយ​ក៏​ដោយ ប៉ុន្តែ​តារា​ចម្រៀង​អង់គ្លេស  Paul McCartney នៅ​តែ​អាច​រក​ចំណូល​បាន​ច្រើន ពី​ការ​ប្រគំ​តន្ត្រី "Out There Tour” របស់​ខ្លួន​កាល​ពី​ឆ្នាំ​មុន។ ការ​ប្រគំ​តន្ត្រី​របស់​តារា​ចម្រៀង និង​តន្ត្រីករ​រូប​នេះ បាន​ចាប់​ផ្ដើម​ក្នុង​ខែ​ឧសភា ឆ្នាំ​២០១៣ ដល់​ខែ​វិច្ឆិកា ឆ្នាំ​២០១៤។ សរុប​ទាំង​អស់ Paul McCartney បាន​ប្រគំ​តន្ត្រី​ចំនួន ៣២ដង នៅ​ទីក្រុង​ផ្សេង​ៗ នៅ​អាមេរិក​ខាង​ជើង អាមេរិក​ខាង​ត្បូង ប្រេស៊ីល និង​ជប៉ុន​ ជា​ដើម។

៨. Eagles ៨៦,៥​លាន​ដុល្លារ

ការ​ប្រគំ​តន្ត្រី "The History of the Eagles Tour” របស់​ក្រុម Eagles បាន​ចាប់​ផ្ដើម​នៅ​ឆ្នាំ​២០១៣ រហូត​ដល់​ឆ្នាំ​២០១៤ ដោយ​បាន​ប្រគំ​ចំនួន ៦១លើក។ ​សំបុត្រ​ចូល​ទស្សនា​ជា​មធ្យម​មាន​តម្លៃ ១៣៨ដុល្លារ។ ក្រោយ​ពី​បញ្ចប់​ការ​សម្ដែង​នៅ​អាមេរិក​ខាង​ជើង នៅ​ឆ្នាំ​ថ្មី​នេះ​ពួក​គេ​នឹង​ទៅ​សម្ដែង​នៅ​អូស្ត្រាលី​ម្ដង។

៧. Lady Gaga ៨៨,៧​លាន​ដុល្លារ

ការ​ប្រគំ​តន្ត្រី "ArtRave” របស់ Lady Gaga សម្រាប់​ផ្សព្វផ្សាយ​អាល់ប៊ុម "Artpop” បាន​ចាប់​ផ្ដើម​ពី​ខែ​ឧសភា ដល់​ខែ​វិច្ឆិកា ឆ្នាំ​២០១៤ ដោយ​បាន​ប្រគំ​ចំនួន ៨៤ដង។ សំបុត្រ​ចូល​ទស្សនា​មាន​តម្លៃ​ជា​មធ្យម​ចំនួន ៩៣​ដុល្លារ និង​លក់​ដាច់​ជាង ៩សែន​សន្លឹក។

៦. Michael Buble១០៥,១​លាន​ដុល្លារ

តារា​ចម្រៀង​កាណាដា Michael Buble បាន​ប្រគំ​តន្ត្រី​ចំនួន ១០៣​លើក សម្រាប់​ការ​ប្រគំ​តន្ត្រី​ទេសចរណ៍​ឈ្មោះ "To Be Loved Tour” នៅ​អឺរ៉ុប អាមេរិក​ខាង​ជើង និង​នៅ​អាមេរិក​ខាង​ត្បូង។ តម្លៃ​សំបុត្រ​ចូល​ទស្សនា​ការ​ប្រគំ​តន្ត្រី​របស់​តារា​រូប​នេះ​ជា​មធ្យម​គឺ ១០២ដុល្លារ។ នៅ​ឆ្នាំ​២០១៥​នេះ Michael Buble នឹង​បន្ត​សម្ដែង​នៅ​​អាហ្វ្រិក និង​អាស៊ី​វិញ​ម្ដង។

៥. Beyonce និង Jay Z ១០៩,៧​លាន​ដុល្លារ

ក្នុង​រយៈ​ពេល​ពីរ​ខែ ពី​ខែ​មិថុនា ដល់​ខែ​សីហា ឆ្នាំ​២០១៤ តារា​ចម្រៀង​ប្ដី​ប្រពន្ធ Jay Z និង Beyonce បាន​ប្រគំ​តន្ត្រី​ទេសចរណ៍ "On the Run Tour” ២១​លើក ដែល​ការ​ប្រគំ​តន្រ្តី​មួយ​លើក​អាច​រក​ចំណូល​បាន​ខ្ទង់ ៥លាន​ដុល្លារ។ តម្លៃ​សំបុត្រ​ជា​មធ្យម​សម្រាប់​ការ​ប្រគំ​តន្ត្រី​របស់​ពួក​គេ​គឺ ១១១ដុល្លារ។

៤. Katy Perry ១៥៣,៣​លាន​ដុល្លារ

ការ​ប្រគំ​តន្ត្រី "The Prismatic Tour” របស់​តារា​ចម្រៀង Katy Perry គឺ​ជា​ការ​ប្រគំ​តន្ត្រី​ដែល​អាច​រក​ចំណូល​ខ្ពស់​បំផុត​ក្នុង​ចំណោម​ការ​ប្រគំ​តន្រ្តី​របស់​តារា​ចម្រៀង​ស្រី​នៅ​ឆ្នាំ​២០១៤។ តារា​ចម្រៀង​ម្ចាស់​បទ "Roar” បាន​សម្ដែង​លើ​ឆាក​តន្ត្រី​ចំនួន ១០៦កន្លែង និង​លក់​សំបុត្រ​ដាច់​អស់​លើស​ពី ១,៤លាន​សន្លឹក ដោយ​តម្លៃ​សំបុត្រ​ជា​មធ្យម​គឺ ១០៨ដុល្លារ។ នៅ​ឆ្នាំ​២០១៥​នេះ Katy Perry នឹង​ចាប់​ផ្ដើម​ការ​ប្រគំ​តន្ត្រី​ទេសចរណ៍​ទៀត ចាប់​ពី​ខែ​កុម្ភៈ។

៣. The Rolling Stones ១៦៥,១​លាន​ដុល្លារ

ក្រុម​តន្ត្រី Rolling Stones ដែល​ល្បីល្បាញ​តាំង​ពី​អំឡុង​ទសវត្ស ៦០ នៅ​តែ​ទទួល​បាន​ការ​គាំទ្រ​ខ្លាំង​ដដែល​ក្នុង​ការ​ប្រគំ​តន្ត្រី​ពួក​គេ កាល​ពី​ខែ​កុម្ភៈ ដល់​ខែ​វិច្ឆិកា ឆ្នាំ​២០១៤។ ក្នុង​ការ​ប្រគំ​តន្ត្រី​តែ ២៥លើក​ ពួក​គេ​អាច​រក​ចំណូល​បាន​ដល់​ទៅ ១៦៥លាន​ដុល្លារ ដោយ​តម្លៃ​សំបុត្រ​ជា​មធ្យម​គឺ ១៩១ដុល្លារ។

២. Justin Timberlake ១៨៤,៧​លាន​ដុល្លារ

ការ​ប្រគំ​តន្ត្រី " 20/20 Experience World Tour” របស់ Justin Timberlake បាន​ចាប់​ផ្ដើម​ពី​ខែ​វិច្ឆិកា ឆ្នាំ​២០១៣ ដល់​ថ្ងៃ​ទី​២ ខែ​មករា ឆ្នាំ​២០១៥ ដោយ​បាន​ប្រគំ​ដល់​ទៅ​១០៣លើក។ សំបុត្រ​ចូល​ទស្សនា​ជា​មាន​តម្លៃ​ជា​មធ្យម ១១៧ដុល្លារ។

១. One Direction ២៨២,២​លាន​ដុល្លារ

ការ​ប្រគំ​តន្ត្រី "Where We Are Tour" របស់​ក្រុម​ចម្រៀង​អង់គ្លេស One Direction បាន​បំបែក​កំណត់ត្រា​ជា​ការ​ប្រគំ​តន្ត្រី​រក​ចំណូល​បាន​ខ្ពស់​បំផុត​នៅ​ឆ្នាំ​២០១៤។ ក្នុង​ការ​ប្រគំ​តន្ត្រី​ចំនួន ៦៩លើក ពួក​គេ​អាច​លក់​សំបុត្រ​អស់​ជាង ៣លាន​សន្លឹក ដោយ​សំបុត្រ​មួយ​សន្លឹក​មាន​តម្លៃ​ជា​មធ្យម ៨២ដុល្លារ ៕

 ចុច​អាន៖ប្រជុំ​ម៉ូដ​រ៉ូប​ចិត្ត​ល្អ​ អត់​សំចៃ​ដែល​តារា​ល្បី​ហ៊ាន​ស្លៀក​ ​ឆ្នាំ​២០១៤