និស្សិតកសិកម្មមែន ប៉ុន្តែស្នាដៃសិល្បៈមិនណយទេ អ្នកប៉ៃលិនរូបនេះ

សៅរ៍, 24 មករា 2015 13:01
ចំនួនមតិ 0 | ចំនួនចែករំលែក 0

ចន្លោះមិនឃើញ

និស្សិតទើបបញ្ចប់ការសិក្សាជំនាញកសិកម្មលោក សួន វណ្ណនី (ឈ្មោះហៅក្រៅ Nam Bank) អត់ទៅធ្វើការងារតាមជំនាញទេ ប៉ុន្តែមកនិពន្ធបទចម្រៀងបង្ហោះតាម Youtube ធ្វើឲ្យមានការចាប់អារម្មណ៍ ដែលបទស្នាដៃដំបូងរបស់លោកមានចំណងជើងថា "បំភ្លេចបងចុះ"។

វណ្ណនី វ័យ ២៦ឆ្នាំ ថ្លែងថា បទខាងលើនេះ លោកនិពន្ធថ្មីដោយខ្លួនឯងសុទ្ធសាធ មិនមានចម្លងពីខាងណាឡើយ និងច្រៀងខ្លួនឯងទៀត ហើយថា ការងារនេះ គឺជាចំណូលចិត្ត និងជានិស្ស័យរបស់លោកតាំងពីតូចៗមកម្ល៉េះ។ "និយាយទៅតាំងពីតូចៗម្ល៉េះបងខ្ញុំចូលចិត្តសិល្បៈណាស់ ដោយសារនៅស្រុកភូមិខ្ញុំហៅថាភូមិសិល្បៈ មានពូមីងបងៗអី គាត់ចេះជំនាញសិល្បៈច្រើន ក៏ចេះតែសួរពួកគាត់ថាអាហ្នឹងគេធ្វើម៉េចអីម៉េច ផ្សំនឹងយើងមានទេពកោសល្យផង យូរៗក៏ចេះទៅ!”។

ដោយសារនិស្ស័យ និងជំនាញផង វណ្ណនី ត្រូវបានចាត់បញ្ចូលក្នុងក្រុមសិល្បៈប្រចាំមហាវិទ្យាល័យទៀត។ ក្រៅពីនេះលោក ក៏បានជួយបង្រៀនសិស្សប្អូនរបស់លោកមួយចំនួនអំពីការលេងហ្គីតាដែរ។ បើទោះមាននិស្ស័យ និងទេពកោសល្យក្នុងការតែងនិពន្ធបទចម្រៀង ប៉ុន្តែយុវជនវ័យ ២៦ឆ្នាំរូបនេះ ប្រាប់ថា លោកទើបតែចាប់ផ្ដើមនិពន្ធបទចម្រៀងក្រោយការសិក្សាឈានដល់ឆ្នាំទី៤ប៉ុណ្ណោះ។

វណ្ណនី ថ្លែងថា លោកនៅសល់បទចម្រៀងជាង១០បទទៀត ត្រៀមបញ្ចេញបន្តបន្ទាប់នាពេលខាងមុខ។ វិលមកគោលបំណងនៃការបញ្ចេញស្នាដៃសិល្បៈនេះ គឺលោកគ្រាន់តែធ្វើតាមនិស្ស័យ និងដើម្បីឲ្យមិត្តភ័ក្ដិបងប្អូនបានស្ដាប់កម្សាន្ត។ ម្យ៉ាងក៏ចង់ រួមចំណែកជំរុញការផលិតបទចម្រៀងថ្មីៗដោយខ្លួនឯង មិនចម្លងពីគេដែរ។

វិលមកសំណួរថាតើ ទៅថ្ងៃមុខលោកប្រាថ្នាការងារសិល្បៈអាជីពឬអត់? វណ្ណនី ព្រលយថា បច្ចុប្បន្នលោកកំពុងគ្រប់គ្រងជំនួញគ្រួសារនៅប៉ៃលិន ប៉ុន្តែក៏មិនទាត់ចោលដែរ បើឱកាសមកដល់។ "ខ្ញុំអត់ចង់និយាយថាម៉េចទេនាពេលនេះ ប៉ុន្តែបើអ្វីៗដើរទៅផ្លូវហ្នឹង(សិល្បករអាជីព) ចរចាគ្នាបានបង(សើច)!។

លោក សួន វណ្ណនី នៅប្រាប់ថា លោកក៏ទើបជាប់ក្នុងការធ្វើតេស្ដសមត្ថភាពជាមួយផលិតកម្មក្នុងស្រុកមួយដែរ ក្នុងចំណោមបេក្ខជន ២២នាក់។ ប៉ុន្តែមិនបានចូលរួមទៅវិញ ដោយសាររាំងស្ទះដោយកិច្ចការមួយចំនួន។ វណ្ណនី មានស្រុកកំណើតនៅខេត្តប៉ៃលិន ហើយឪពុកម្ដាយរបស់លោកសុទ្ធជាមន្ត្រីរាជការ។ លោក មានបងប្អូនចំនួន ៥នាក់(ស្រី២ប្រុស៣) លោកជាកូនពៅ។ អ្នកស្រុកប៉ៃលិនរូបនេះ ប្រាប់ថា ក្នុងចំណោមបងប្អូនរបស់លោកទាំងអស់សុទ្ធតែមានទេពកោសល្យសិល្បៈ ប៉ុន្តែមិនមាននរណាប្រឡូកចូលសិល្បៈទេ គឺសុទ្ធជាធ្វើការ និងធ្វើជំនួញ៕

តោះ...ស្ដាប់ស្នាដៃទី១របស់ វណ្ណនី យ៉ាងណាដែរប៉ុណ្ណឹង!

http://youtu.be/9WcAuR0Ww-U

អត្ថបទ៖ ទារិកា