តោស្ទុះឱបអ្នកជួយសង្គ្រោះជីវិត មើលទៅគួរឲ្យរំភើបចិត្ត

2015-01-25 15:40:24
ចំនួនមតិ 0 | ចំនួនចែករំលែក 0

ចន្លោះមិនឃើញ

តោញីមួយក្បាលហាក់សម្ដែងការដឹងគុណខ្លាំងពេកក្រៃចំពោះអ្នកជួយសង្គ្រោះជីវិតខ្លួន ព្រោះរាល់ពេលដែលគេមកលេង តោនេះតែងស្ទុះឱបដោយកាយវិការរីករាយ និងនឹករលឹក។ តោដ៏គួរអាណិតនេះឈ្មោះ Sirga ត្រូវហ្វូងបោះបង់ចោលកំព្រាម្នាក់ឯង តែបុរសចិត្តធម៌ឈ្មោះ Valentin Gruener ជួយសង្គ្រោះ រើសមកចិញ្ចឹមក្នុងអង្គការមួយ។

វីដេអូនេះ មើលទៅគួរឲ្យរំជួលចិត្តយ៉ាងខ្លាំង ក្នុងទិដ្ឋភាពតោហក់មកឱបអ្នកជួយយ៉ាងពេញទំហឹង ដោយទឹកមុខដូចជាញញឹម និងសប្បាយរីករាយ។ វីដេអូមិត្តភាពចាក់ទឹកមិនលិចរវាងតោ Sirga និងលោក Valentin Gruener បានល្បីល្បាញយ៉ាងខ្លាំងក្នុងឆ្នាំ២០១៤ ដែលមានអ្នកទស្សនាលើយូធូប ជិត ១០លានដង។

http://youtu.be/m7ZiTr1EUgY

មិត្តភាពមិនអាចកាត់ផ្ដាច់បានរវាងតោ និងមនុស្សនេះ កើតឡើងនៅពេលតោ Sirga ធ្លាក់ខ្លួនត្រូវហ្វូងបោះបង់ចោលកណ្ដោចកណ្ដែងតែម្នាក់ឯង និងប្រឈមមុខជាមួយសេចក្ដីស្លាប់នៅទីវាលដ៏ធំធេង។ សំណាងល្អ លោក Valentin Gruener បានជួយសង្គ្រោះ និងយកមកចិញ្ចឹមនៅក្នុងអង្គការការពារសត្វព្រៃ Modisa នៅប្រទេសបុតស្វាន់ណា។

ពេលវេលាចេះតែកន្លងទៅ ភាពស្និទ្ធស្នាលក៏កាន់តែខ្លាំងឡើង ហើយរាល់ពេលលោក Valentin បើកទ្វារទ្រុង តោញីតែងលោតមកឱបដោយការនឹករលឹក។ រហូតមកដល់ពេលនេះ មានរយៈពេល ៣ឆ្នាំហើយ តោកំព្រាបានឡើងទម្ងន់រហូតដល់ ១៤០គីឡូក្រាម។ ដើម្បីចិញ្ចឹមជីវិតខ្លួនឯងទៅថ្ងៃក្រោយ តោគួរឲ្យអាណិតនេះ ត្រូវបុរសចិត្តធម៌បង្រៀនឲ្យចេះប្រមាញ់ចំណីដោយខ្លួនឯង។ សាច់រឿងដ៏រំជួលចិត្តរវាងតោ Sirga និងលោក Valentin ត្រូវគេចងក្រងជាឯកសារ និងគ្រោងផលិតចេញជាខ្សែភាពយន្តផងដែរ៕

ចុចអាន៖ តាមពិត កំពូលអ្នកថតត្រូវខ្លាឃ្មុំដេញ គឺជារូបកាត់ត

ប្រែសម្រួល៖ គង់ វិសាល ប្រភព៖ mirror