ច្បាស់ការហើយ...ពេជ្រ សោភា ចូលរោងការខែកុម្ភៈ!

2015-01-27 21:50:31
ចំនួនមតិ 0 | ចំនួនចែករំលែក 0

ចន្លោះមិនឃើញ

ប្រភពព័ត៌មានច្បាស់ការមួយ បានប្រាប់មក Sabay ថាកញ្ញា ពេជ្រ សោភា តារាចម្រៀងរបស់ផលិតកម្មរស្មីហង្សមាស នឹងចូលរោងការនៅដើមខែក្រោយនេះហើយ គឺនៅថ្ងៃព្រហស្បតិ៍ ទី៥ កុម្ភៈ ២០១៥។

ប្រាប់ច្បាស់ដូច្នេះ ប្រភពថ្លែងថា ខ្លួនគេទទួលបានលិខិតអញ្ជើញពីតារាស្រីរបស់ហង្សមាសរួចហើយ ប៉ុន្តែមិនច្បាស់ថាភ្ញៀវកិត្តិយសប៉ុន្មានតុនឹងត្រូវអញ្ជើញនោះទេ។ តាមព័ត៌មានពីលិខិតអញ្ជើញដែលប្រភពផ្ដល់ឲ្យ កូនកំលោះរបស់នាងមានឈ្មោះថា ឡៅ ឆលី ឯកូនស្រីឈ្មោះ ស៊ូ សោភា ដែលគេដឹងថាជាឈ្មោះដើមរបស់ ពេជ្រ សោភា។

ពិធីពិសាភោជនីយអាហារជប់លៀងមង្គលការរបស់ ពេជ្រ សោភា នឹងធ្វើនៅមជ្ឈមណ្ឌលសន្និបាត និងពិព័រណ៍កោះពេជ្រអគារ C។ បើទោះមានព័ត៌មានច្បាស់ពីប្រភពខាងលើផ្ដល់ឲ្យ Sabay ក៏ដោយ ប៉ុន្តែតារាស្រីដែលធ្លាប់មានប្រវត្តិកម្សត់កម្ររូបនេះ មិនព្រមឆ្លើយលម្អិតទេ។ ពេជ្រ សោភា គ្រាន់តែទទួលស្គាល់ថា នាងជិតរៀបការមែន ប៉ុន្តែមិនទាន់ច្បាស់ថ្ងៃទេ។

"ចា៎...មែន ប៉ុន្តែអត់ទាន់ច្បាស់ថាថ្ងៃណាទេ តិចច្រឡំណា...(សើច)"។ និយាយបានតែប៉ុណ្ណេះ សោភា ប្រាប់ថាជាប់រវល់ រួចក៏បិទទូរសព្ទបន្ទាប់ពីជួបនឹងសំណួរសួរពីអត្តសញ្ញាណអនាគតស្វាមីកញ្ញា។

នៅមុនដល់ថ្ងៃដើរចែកធៀបការនាពេលនេះ ពេជ្រ សោភា បានភ្ជាប់ពាក្យរួចហើយតាំងពីពាក់កណ្ដាលខែមេសា ២០១៤។ កាលណោះ ភ្លាមៗមិនសូវមាននរណាដឹងទេថា នាងភ្ជាប់ពាក្យឡើយ រហូតទាល់តែព័ត៌មានធ្លាយចេញលើបណ្ដាញសង្គម។

ពេជ្រ សោភា និងគូដណ្ដឹង ក្នុងថ្ងៃភ្ជាប់ពាក្យកាលពីពាក់កណ្ដាលឆ្នាំ ២០១៤(រូបថត៖ FB)

បន្ទាប់ពីបែកធ្លាយ កញ្ញា ពេជ្រ សោភា ក៏បានចេញមុខមកទទួលស្គាល់ថា នាងពិតជាបានភ្ជាប់ពាក្យមែនក្រោយបានសេពគប់មើលចិត្តថ្លើមគ្នា៣-៤ឆ្នាំរួចមក។ ប៉ុន្តែមិនព្រមប្រាប់ពីអត្តសញ្ញាណគូដណ្ដឹងឡើយ។ យ៉ាងក៏ដោយ ព័ត៌មានបានបែកធ្លាយចេញមកទៀតថា គូដណ្ដឹងរបស់នាង មានឈ្មោះ លី ដូចនឹងឈ្មោះកូនកំលោះរបស់នាងនៅពេលនេះ ហើយលោកមានវ័យជាង ៣០ឆ្នាំ។

តាមព័ត៌មានបន្តទៀត លោក លី គឺជាអាណិកជនរស់នៅសហរដ្ឋអាមេរិក ហើយក៏ជាបុគ្គលមានមុខមាត់ម្នាក់ដែរនៅក្នុងប្រទេសកម្ពុជាដែរត្បិតលោករស់នៅសហរដ្ឋអាមេរិកមែន ព្រោះនៅទីនោះ លោកគឺជាមន្ត្រីអន្តោប្រវេសន៍ប្រចាំការនៅប្រលានយន្តហោះមួយក្នុងក្រុងហ្វីឡាដែលហ្វៀផង។

កញ្ញា ពេជ្រ សោភា ធ្លាប់បានភ្ជាប់ពាក្យរួចម្ដងហើយជាមួយបុរសជាអាណិកជនខ្មែរដែរឈ្មោះ ប៊ុន ចន ប៉ុន្តែហៀបនឹងដល់ថ្ងៃចូលរោងការទៅហើយ ពួកគេបានបែកគ្នាវិញ៕