អតីតតារាសម្ដែងម្នាក់លើកទាំងគ្រួសារពីអាមេរិក មកដើរចែកទានពេញស្រុកខ្មែរ
- 2015-01-28 18:35:24
- ចំនួនមតិ 0 | ចំនួនចែករំលែក 0
អតីតតារាសម្ដែងម្នាក់លើកទាំងគ្រួសារពីអាមេរិក មកដើរចែកទានពេញស្រុកខ្មែរ
ចន្លោះមិនឃើញ
អតីតតារាសម្ដែងទសវត្សរ៍ទី៩០ម្នាក់ គឺអ្នកនាង ណិប កេសី បានលើកទាំងគ្រួសារមានស្វាមី និងបុត្រាបុត្រីពីរនាក់ ជិះយន្តហោះពីអាមេរិកមកស្រុកខ្មែរក្នុងបំណងតែមួយគត់ គឺមកចែកទានដល់ជនក្រីក្រ។
“ខ្ញុំមករៀងរាល់ឆ្នាំ ប៉ុន្តែឆ្នាំមុនៗគឺខ្ញុំមកធ្វើបុណ្យ តែលើកនេះ គឺអត់ធ្វើបុណ្យទេ គឺមកចែកទានតែម្ដង ហើយខ្ញុំបានទៅច្រើនកន្លែងហើយ គឺចង់ជួយអ្នកក្រីក្រពិតប្រាកដតាមលទ្ធភាពដែលខ្ញុំអាចជួយបាន!”។ អ្នកនាង ណិប កេសី ថ្លែង។
អតីតតារាសម្ដែងរូបនេះបានមកដល់ប្រទេសកម្ពុជាកាលពីថ្ងៃទី១៦ មករា ២០១៥នេះ។ រយៈពេលពីរសប្ដាហ៍មកនេះ អ្នកនាង កេសី បានធ្វើសកម្មភាពសប្បុរសមួយចំនួនដូចជា ផ្ដល់អណ្ដូងទឹកចំនួន២ សៀវភៅ ១៥០ក្បាល និងកៅអីសម្រាប់អង្គុយមួយចំនួនទៀតទៅឲ្យកុមារៗ និងប្រជាពលរដ្ឋក្រីក្រក្នុងភូមិមួយរបស់ខេត្តសៀមរាប។ ជំនួយនេះគឺតាមគម្រោងទឹកស្អាតរបស់លោក សាវិន ភីលីប។
បន្តមកទៀត អ្នកនាង កេសី បាននាំអំណោយសប្បុរសផ្ទាល់ខ្លួនទៀតទៅជូនប្រជាពលរដ្ឋក្រីក្រចំនួន ៦គ្រួសារនៅសង្កាត់ព្រែកប្រា។ "ខ្ញុំទៅតាមបងប្រុសខ្ញុំណែនាំ គាត់ថាទាំង៦គ្រួសារនោះក្រីក្រណាស់ រាល់ថ្ងៃគឺពឹងតែលើរបររាវខ្ចៅខ្យងក្នុងបឹងឆ្ងាយៗប៉ុណ្ណឹង ដល់ទៅផ្ទាល់គឺមែន ពួកគាត់មហាក្របំផុត អីចឹងខ្ញុំសម្រេចជូនគាត់ ១គ្រួសារ១៥ម៉ឺនរៀល"។
អ្នកនាង ណិប កេសី និងកូនទាំងពីរ
សកម្មភាពចុងក្រោយមួយកាលពីម្សិលមិញនេះ គឺអ្នកនាង និងក្រុមគ្រួសារបានទៅតំបន់សំរាមស្ថិតក្នុងសង្កាត់ជើងឯក។ កន្លែងនេះ គឺព្រះសង្ឃមួយអង្គនៅវត្តបទុមណែនាំ " លោកឃើញខ្ញុំចូលចិត្តធ្វើទាន តេជគុណ ក៏ប្រាប់ខ្ញុំឲ្យទៅកន្លែងរើសសំរាមទៅ ហ៊ឺ...ទៅដល់ក្ដុកក្ដួលណាស់ ទីនោះមានក្លិនស្អុយ ឆ្អេះឆ្អាប តែពួកគេញុំាហ្នឹងគេងហ្នឹង...ខ្ញុំបានជួយពួកគាត់ ៥០គ្រួសារ ក្នុង១គ្រួសារ ៣ម៉ឺនរៀល"។
មិនអស់នៅឡើយ អ្នកនាង ណិប កេសី បញ្ជាក់ថា អ្នកនាង និងគ្រួសារនឹងទៅចែកទានបន្តទៀតនៅតំបន់ភ្នំតាម៉ៅ ទន្លេបាទី នៅថ្ងៃនេះ មុនអ្នកនាងចាកចេញទៅវិញនៅថ្ងៃស្អែក។ សកម្មភាពចែកទាននេះ មិនរាប់បញ្ចូលសកម្មភាពតូចៗរាល់ថ្ងៃនៅឡើយទេ។ អ្នកនាង ថ្លែងថា រាល់ពេលដែលអ្នកនាងចេញទៅណា ញុំាអីនៅកន្លែងណា ឲ្យតែជួបអ្នកសុំទានអ្នកនាងដាក់ទានឲ្យទាំងអស់ មានប៉ុន្មាននាក់ដាក់ប៉ុណ្ណឹង គឺដាក់ទាល់តែគ្រប់គ្នា។
អ្នកនាង ណិប កេសី ចូលរួមពិធីកាត់ចំណងដៃ ឆ័យលី ដាឡែន
អ្នកនាង ណិប កេសី គឺជាអតីតជ័យលាភីលេខ៣ក្នុងការប្រឡងមួយរៀបចំដោយទស្សនាវដ្ដីជីវិតកម្សាន្ត។ បន្តមកនៅឆ្នាំ ១៩៩៥ អ្នកនាងបានចូលក្នុងការងារសម្ដែង ដោយបានសម្ដែងភាពយន្ត ខារ៉ាអូខេ រួមទាំងដើរម៉ូដទៀត។ អ្នកនាងធ្លាប់សម្ដែងក្នុងរឿងជាច្រើនដូចជា "រំដួលទងមាស" និង"បិសាចចម្លែក" សុទ្ធជារឿងដែលអ្នកនាងទទួលបានការគាំទ្រច្រើន។ ដោយឡែកខាងចម្រៀងខារ៉ាអូខេវិញ អ្នកនាងបញ្ជាក់ថា គ្រប់ផលិតកម្មក្នុងស្រុកខ្មែរ អ្នកនាងធ្លាប់សម្ដែងឲ្យទាំងអស់។
អ្នកនាង ណិប កេសី បានរៀបការជាមួយអាណិកជនខ្មែរ-អាមេរិកនៅឆ្នាំ១៩៩៩ លុះឆ្នាំ ២០០០អ្នកនាង បានចាកចេញទៅរស់នៅសហរដ្ឋអាមេរិក បច្ចុប្បន្ននៅក្នុងរដ្ឋ ម៉ារីលែន។ មកទល់នឹងពេលនេះ អ្នកនាង ទទួលបានបុត្រាបុត្រីចំនួនពីររូប គឺកូនស្រីច្បងឈ្មោះ Magaret អាយុ ១៤ឆ្នាំ និងកូនប្រុសពៅឈ្មោះ Vin Cene អាយុ ១០។ អ្នកនាង កេសី សុំសិទ្ធិមិននិយាយលំអិតពីស្វាមី៕
សកម្មភាពសប្បុរសនានារបស់អ្នកនាង ណិប កេសី(រូបភាពផ្ដល់ដោយអ្នកនាង ណិប កេសី)
អត្ថបទ៖នារីជនជាតិដើមទំពួនកាន់តែស្អាត និង ចាប់អារម្មណ៍សិល្បៈកាន់តែច្រើន!
អត្ថបទ៖ ទារិកា