តារាសម្ដែងជើងចាស់ នារី រ័ត្នគន្ធា ចង់រត់ចោលអាមេរិក

2015-01-30 15:21:45
ចំនួនមតិ 0 | ចំនួនចែករំលែក 0

ចន្លោះមិនឃើញ

តារាសម្ដែងជើងចាស់អ្នកនាង នារី រ័ត្នគន្ធា ដែលមានរូបរាងទ្រលុកទ្រលន់ បានលេចមុខជាថ្មីមកប្រទេសកម្ពុជាបន្ទាប់ពីការចាកចេញអស់ ១៣ឆ្នាំ។អ្នកនាងប្រាប់ថា នឹងមិនស្លាប់ចោលឆ្អឹងលើដីស្រុកអាមេរិកឡើយ ត្រូវតែមកស្រុកកំណើតវិញឲ្យបាន។

“នៅទីនោះឯកាណាស់...ខ្ញុំមិននៅទីនោះរហូតទេ រឿងត្រឡប់មកប្រទេសយើងវិញ គឺដឹងតែមកហើយ គ្រាន់តែមិនដឹងថាអាចមកឆាប់ៗនេះ ឬពេលណា និយាយទៅខ្ញុំមិនស្លាប់ចោលឆ្អឹងនៅទីនោះទេ!”។

អ្នកនាង រ័ត្នគន្ធា បានចាកចេញទៅរស់នៅសហរដ្ឋអាមេរិកតាំងពីឆ្នាំ ២០០១ បន្ទាប់ពីបានអាពាហ៍ពិពាហ៍ជាមួយស្វាមីឈ្មោះ ផល្លី ជាទាហានធ្វើការលើកប៉ាល់។ បច្ចុប្បន្នអ្នកនាង និងស្វាមីរួមទាំងកូនៗទាំងពីរ កំពុងរស់នៅក្នុងរដ្ឋអាយលែន និងមានមុខរបរបើកហាងមួយយីហោ "នារី រ័ត្នគន្ធា New Collection” មានលក់សំលៀកបំពាក់ខ្មែរ និងវត្ថុបុរាណខ្មែរ។

អ្នកនាងប្រាប់ថា អ្នកនាងឯកាណាស់ ក្នុងនោះក្រៅពីស្វាមី និងកូនៗ អ្នកនាងគ្មានសាច់ញាតិណាផ្សេងឡើយ ហើយក្នុងរដ្ឋនោះ ក៏មិនសូវឃើញមានបងប្អូនខ្មែរយើងរស់នៅដែរ។ ជីវិតបែបនេះ អ្នកនាងយល់ថា ត្រមង់ត្រមោចពេកណាស់។ "ដូចអត់សូវមានខ្មែរទេ ខ្ញុំខ្មែរតែឯង ហ៊ឺ Lonely ណាស់"។

ក្រៅតែពីមិនមានសាច់ញាតិ នៅមានការប្រឈមមួយទៀត គឺប្រើប្រាស់ភាសា ដែលធ្វើឲ្យអ្នកនាងកាន់តែដាច់ឆ្ងាយពីគេឯង ខណៈអ្នកនាងប្រាប់ថា ចេះត្រឹមបន្តិចបន្តួច។ ដូច្នេះហើយ មិនយូរមិនឆាប់នឹងមកត្រឡប់មករស់នៅកម្ពុជាដីកំណើតវិញ។ ទន្ទឹមនឹងការបង្ហើបចង់មករស់នៅស្រុកកំណើតវិញ អតីតសិស្សវិទ្យាល័យបឹងត្របែករូបនេះ បន្លឺទៀតថានឹងចូលសិល្បៈវិញ បើបងប្អូននៅតែគាំទ្រ។

“មានអីបើពុកម៉ែបងប្អូននៅតែគាំទ្រ ខ្ញុំក៏មិនចង់ចោលសិល្បៈរហូតដែរ សម្ដែងតួម៉ែក៏បាន តួយាយក៏បានដែរ បំណាច់នឹងស្រឡាញ់ទៅហើយ(សើច)"។

អ្នកនាង រ័ត្នគន្ធា បានមកដល់កម្ពុជាកាលពីសប្ដាហ៍មុន ដែលនេះគឺជាដំណើរលើកទី៤ រាប់ត្រឹមឆ្នាំ ២០១១មក។ មកលើកនេះ អ្នកនាង ថា មានគោលបំណងសំខាន់ៗ៣ ទី១មកធ្វើបុណ្យឆ្លងចេតិយឪពុកនៅវត្តមួយនាស្រុកកណ្ដាលស្ទឹង។ ទី២ មកនាំទំនិញមួយចំនួនទៅលក់ និងទី៣ គឺមកលេងក្រុមគ្រួសារ។

នារី រ័ត្នគន្ធា គឺជាតារាសម្ដែងល្បីឈ្មោះជំនាន់អ្នកនាង អម្ពរ ទេវី និងសុខ ស្រីមុំ ដែលមុនទៅសហរដ្ឋអាមេរិក អ្នកនាងធ្លាប់បានសាងស្នាដៃក្នុងរឿងជាច្រើនដូចជា "កំលោះឆ្នាំ ៩១" "បុប្ផាភ្នំពេញ" និងរឿង "ផ្លូវបែកជាបី" ជាដើម។ តារាជើងចាស់រូបនេះ ទទួលថាខ្លួនរាងមានព្រលឹង(ធាត់)បន្តិច ប៉ុន្តែអ្នកនាង យុគ ចិន្ដា ដែលបានធ្វើសម្ភាសន៍ លាន់ថា អ្នកនាង រ័ត្នគន្ធា ដូចអត់ចាស់សោះ។

ចុះប្រិយមិត្តមើលឃើញយ៉ាងម៉េច ស្អាត ហើយនៅតែក្មេង?

អត្ថបទ៖ ទារិកា