៤ ហេតុផលងាយៗ បុរសដាច់ចិត្តហ៊ានហាមាត់ថា ស្រលាញ់

2015-02-09 19:06:16
ចំនួនមតិ 0 | ចំនួនចែករំលែក 0

ចន្លោះមិនឃើញ

នារីច្រើនតែត្រូវបានបុរសសារភាពស្នេហ៍ តែមិនមែននៅសុខៗបុរសព្រមនិយាយពាក្យថា ស្រលាញ់ឡើយ លុះត្រាតែមានហេតុផលពិសេសណាមួយទើបបណ្ដាលចិត្តឲ្យបុរសហ៊ានរហូតនិយាយពាក្យថា ស្រឡាញ់ទៅកាន់នារីម្នាក់នោះបាន។ អីចឹង សាកអានអត្ថបទខាងក្រោមនេះ លមើល ពីមូលហេតុដែលធ្វើឲ្យបុរសហ៊ានសារភាពថា ស្រលាញ់៖

រូបតំណាង

ឌឺដងដាក់គ្នា បើតាម លោក រម្យ អតីតនិស្សិតសាកលវិទ្យាល័យភូមិន្ទភ្នំពេញជំនាញគណិតវិទ្យា ប្រាប់ថា មូលហេតុដែលធ្វើឲ្យលោកហ៊ាននិយាយពាក្យថា ស្រឡាញ់មិត្តស្រី ដោយសារដំបូងឡើយមកពីរូបនាងចូលចិត្តប្រកែកជាមួយលោកពេកហើយតែងតែឈ្លោះគ្នាជានិច្ច។ ភាពឌឺដងបែបលេងសើចនេះហើយ ដែលធ្វើឲ្យលោកតែងនឹករហូតបាត់មុខមិនបាន ព្រោះពេលបានប្រកែកជាមួយនាងទើបធ្វើឱ្យលោកញ៉ាំបាយចូល។

ឆ្លាតហើយពូកែ

ចំពោះ យុវជន សុខនាង អាយុ ២២ ឆ្នាំ បុគ្គលិកនៅធនាគារ ABA និយាយថា ភាពឆ្លាតពូកែរបស់មិត្តស្រីលោក បានធ្វើឲ្យសុខនាងលង់ស្រលាញ់ហើយជំរុញឲ្យត្រូវតែនិយាយសារភាពស្នេហ៍ទៅកាន់នាងខានតែបាន។ លោកបន្តថា នាងតែងមានយោបល់ល្អៗព្រមទាំងគំនិតប្លែកៗនៅពេលប្រជុំម្ដងៗ ។ នាងឆ្លាតហើយពូកែអាចដោះស្រាយបញ្ហានានា ដែលកើតឡើងបានយ៉ាងស្រួល ហើយមិនសូវសុំជំនួយច្រើនពីមនុស្សជុំវិញឡើយ ។

យកចិត្តទុកដាក់ មានសន្តានចិត្តល្អ

សម្រាប់ លោក ភារម្យ អាយុ ២៧ ឆ្នាំ អាជីវករលក់សំលៀកបំពាក់និយាយថា កាលដែលលោកដាច់ចិត្តរហូតដល់សារភាពស្នេហ៍ប្រាប់ទៅមិត្តស្រីខ្លួន មកពីនៅពេលលោកមានបញ្ហា នាងតែងតែយកចិត្តទុកដាក់ ជួយផ្ដល់គំនិតយោបល់ និង ខ្វល់ខ្វាយច្រើន។ លោកបន្តថា បុរសនៅពេលមាននារីមកយកចិត្តនិង សួរសុខទុក្ខពេលគ្រាមានបញ្ហា គឺជាមន្តស្នេហ៍ដែលជំរុញឲ្យបុរសព្រមហារមាត់និយាយថា ស្រលាញ់។

កំប្លែងលេង

សុភក្រ្ត អតីតនិស្សិតសាកលវិទ្យាល័យភូមិន្ទភ្នំពេញ ជំនាញសង្គមវិទ្យា ប្រាប់ថា បុរសភាគច្រើនតែងតែចូលចិត្តនារីណាដែលមានភាពស្រស់ស្រាយ និងចេះធ្វើឲ្យបរិយាកាសសប្បាយរីករាយ ចំពោះលោកក៏អ៊ីចឹងដែរ។ លោកលង់ស្រលាញ់មិត្តស្រីព្រោះនាងតែងធ្វើឲ្យលោកសប្បាយចិត្ត នាងនិយាយកំប្លែង លេងសើចឲ្យមនុស្សជុំវិញសប្បាយរីករាយ។ សុភក្រថា មានពេលខ្លះនៅសុខៗលោកអស់សំណើចម្នាក់ឯងនឹងពាក្យនាងនិយាយក៏មាន៕