ព្រះមហាក្សត្រអាស៊ាន ២អង្គ ជាកំពូលស្ដេចមានជាងគេលើលោក

2014-09-15 19:35:58
ចំនួនមតិ 0 | ចំនួនចែករំលែក 0

ចន្លោះមិនឃើញ

បើតាមការចាត់ថ្នាក់របស់ទស្សនាវដ្ដី Forbes បានឲ្យដឹងថា ប្រទេសក្នុងតំបន់អាស៊ានមានមហាសេដ្ឋីទឹកប្រាក់ពាន់លានដុល្លារដល់ទៅ ១១៧នាក់ ប៉ុន្តែក្នុងចំណោមនេះ មិនរាប់បញ្ចូលព្រះមហាក្សត្រ ឬមេដឹកនាំនៃប្រទេសនីមួយៗទេ។ បើគិតពីស្ដេចដែលមានព្រះរាជទ្រព្យច្រើនបំផុតលើលោកវិញ ព្រះមហាក្សត្រពីរអង្គក្នុងតំបន់អាស៊ានបានជាប់ចំណាត់ថ្នាក់កំពូលគេ ជាមួយទ្រព្យសម្បត្តិដ៏មហាសាល ដែលក្នុងនោះរួមមាន៖

១. Bhumibol Adulyadej ព្រះមហាក្សត្រនៃព្រះរាជាណាចក្រថៃ

(រូបភាពផ្ដល់សិទ្ធិដោយ AFP)

ព្រះអង្គគឺជាព្រះមហាក្សត្រដែលគ្រងរាជ្យបល្ល័ង្ក ៦៨ឆ្នាំមកហើយ យូរជាងគេបំផុតក្នុងប្រវត្តិសាស្ត្ររបស់ប្រទេសថៃ។ ទ្រព្យសម្បត្តិរបស់ព្រះមហាក្សត្រដែលមានព្រះជន្ម ៨៧វស្សានេះ គឺជាព្រះរាជទ្រព្យនៃត្រកូលក្សត្រ និងបានមកពីការវិនិយោគ។

ព្រះអង្គមានកម្មសិទ្ធិដីជាង ១៣ គីឡូម៉ែត្រក្រឡានៅរាជធានីបាងកក និងជាង៥៣គីឡូម៉ែត្រក្រឡាទៀតនៅពាសពេញប្រទេស។ ព្រះអង្គក៏មានភាគហ៊ុន ៣២ភាគរយនៅក្នុងក្រុមហ៊ុនស៊ីម៉ង់ Siam Cement ស្មើនឹងទឹកប្រាក់ ១២,៦ ពាន់លានដុល្លារ ដែលត្រូវនឹង ២៣ភាគរយនៃទ្រព្យសរុបរបស់ធនាគារពាណិជ្ជកម្មថៃ។

ក្រៅពីនេះ ព្រះអង្គនៅមានភាគហ៊ុនក្នុងក្រុមហ៊ុនផ្សេងៗទៀត ដូចជាក្រុមហ៊ុនសាងសង់ ក្រុមហ៊ុនធានារ៉ាប់រង និងក្រុមហ៊ុនទូរគមនាគមន៍ជាដើម។ លើសពីនេះទៅទៀត ព្រះអង្គគឺជាម្ចាស់ពេជ្រច្នៃធំជាងគេលើលោក ដែលមានតម្លៃចន្លោះពី ៤ ទៅ ១២ លានដុល្លារ។

ព្រះរាជទ្រព្យ និងការវិនិយោគទាំងនេះ បានធ្វើឲ្យព្រះមហាក្សត្រ Bhumibol Adulyadej មានទ្រព្យសម្បត្តិសរុប ៣០ពាន់លានដុល្លារ។

២. Hassanal Bolkiah ស្ដេចនៃព្រះរាជាណាចក្រព្រុយណេ

(រូបភាពផ្ដល់សិទ្ធិដោយ AFP)

ព្រះអង្គបានឡើងគ្រងរាជ្យ តាំងពីឆ្នាំ១៩៦៨ បន្តពីព្រះបិតា និងជាព្រះមហាក្សត្រទី២៩ របស់ប្រទេសព្រុយណេ។ ព្រះអង្គគឺជាព្រះមហាក្សត្រ ជានាយករដ្ឋមន្ត្រី និងជាមេបញ្ជាការជាន់ខ្ពស់នៃកងកម្លាំងការពារជាតិព្រុយណេផងដែរ។ បច្ចុប្បន្ន ព្រះអង្គមានព្រះជន្ម ៦៨ ព្រះវស្សា។

តាមគេហទំព័រ The Richest ស្តេចស៊ុលតង់នៃប្រទេសតូចជាងគេទី២ នៅអាស៊ាន មានរថយន្តលំដាប់ថ្លៃៗគ្រប់ប្រភេទដូចជា Rolls Royces, Mercedes-Benzes, Ferraris, Lamborghinis, BMWs និងម៉ាកល្បីៗផ្សេងទៀត សរុបប្រមាណ ៧ ពាន់គ្រឿង។ រថយន្តដែលថ្លៃជាងគេ គឺ Rolls Royce ស្រោបមាសដែលមានតម្លៃ ១៤ លានដុល្លារ ថ្លៃជាងគេបំផុតលើលោក។

ប្រភពទ្រព្យសម្បត្តិដ៏មហាសាលរបស់ព្រះអង្គបានមកពីរ៉ែប្រេង ដែលធ្វើឲ្យព្រះអង្គមានព្រះរាជទ្រព្យសរុប ២០ពាន់លានដុល្លារ៕

ចុចអាន៖ កំពូលមហាសេដ្ឋីអាហ្វ្រិកទាំង១០ ប្រចាំឆ្នាំ២០១៤

ដោយ៖ គង់ វិសាល ប្រភព៖ therichest