ចូលផ្ទះសំណាក់ក្រោមអាយុ១៨ឆ្នាំ នឹងត្រូវរឹតបន្តឹងនៅថ្ងៃបុណ្យនៃក្តីស្រលាញ់
- 2015-02-11 13:56:34
- ចំនួនមតិ 0 | ចំនួនចែករំលែក 0
ចូលផ្ទះសំណាក់ក្រោមអាយុ១៨ឆ្នាំ នឹងត្រូវរឹតបន្តឹងនៅថ្ងៃបុណ្យនៃក្តីស្រលាញ់
ចន្លោះមិនឃើញ
“ក្រសួងនឹងមានចេញជាគោលការណ៍ជូនដល់ម្ចាស់ផ្ទះសំណាក់ និងម្ចាស់អូតែល ថាអ្នកណាដែលមានអាយុក្រោម ១៨ ឆ្នាំមិនអាចមកជួលបន្ទប់ ដោយគ្មានអាណាព្យាបាល ឬឪពុកម្តាយមកជាមួយនោះទេ”។ ទាំងនេះ ជាការលើកឡើងរបស់លោកជំទាវ អ៊ឹង កន្ថាផាវី រដ្ឋមន្ត្រីក្រសួងកិច្ចការនារី ដែលបានថ្លែងកាលពីពេលថ្មីៗ នេះទាក់ទងនឹងការទប់ស្កាត់ភាពមិនប្រក្រតីមួយចំនួននៅថ្ងៃទិវានៃក្តីស្រលាញ់។
លោកជំទាវបានបន្ថែមថា បើទោះជាចលនាផុលផុសនៅថ្ងៃទិវានៃក្តីស្រលាញ់នៅ ប៉ុន្មានឆ្នាំចុងក្រោយនេះបានថមថយច្រើនក្តី។ ប៉ុន្តែប្រសិនបើម្ចាស់ផ្ទះសំណាក់ និងសណ្ឋាគារមិនអនុវត្តទៅតាមគោលការណ៍ខាងលើទេ នឹងត្រូវប្រឈមចំពោះមុខច្បាប់ ។ លោកជំទាវថា ចលនាអប់រំសង្គម ត្រូវការពេលវេលាច្រើន ជាមួយនឹងសកម្មភាពឆ្លើយតប ឲ្យយុវជនចេះថ្លឹងថ្លែង។
កាលពីថ្ងៃម្សិលមិញក្រសួងអប់រំយុវជន និងកីឡាបានផ្សព្វផ្សាយនូវវិធានការចំនួន៤ចំណុចដល់សាធារណៈជន ពិសេសអាណាព្យាបាល ឪពុកម្តាយ ដើម្បីចួូលរួមទប់ស្កាត់រួបភាពមិនល្អនៅថ្ងៃទិវានៃក្តីស្រលាញ់។
រាល់ឆ្នាំមានការកត់សំគាល់ថា យុវវ័យមួយចំនួនបានយល់ច្រឡំ ថាថ្ងៃទី១៤ ខែកុម្ភៈ ដែលជា “ទិវាថ្ងៃនៃ ក្តីស្រលាញ់” នោះ គឺជា “ថ្ងៃបុណ្យសង្សារ” ដែលភាគច្រើនគូសង្សារតែងតែទិញផ្កាកុលាប ឬក៏វត្ថុអនុស្សាវរីយ ជូនទៅវិញទៅមក ហើយសិស្សានុសិស្សវ័យក្មេងមួយចំនួនបានភ្លើតភ្លើនតាមការអូសទាញលួងលោម រហូតនាំឲ្យខូចខ្លួនប្រាណ បាត់បង់កិត្តិយស សេចក្តីថ្លៃថ្នូរ របស់ក្រុមគ្រួសារ និងធ្វើ ឲ្យអាប់ឱនដល់ទំនៀមទម្លាប់ ប្រពៃណីជាតិខ្មែរក៏មាន៕
https://www.youtube.com/watch?v=0GcWMXdhQTo&feature=youtu.be
(ទិដ្ឋភាពកាលពីឆ្នាំមុន)
អត្ថបទ៖មៃ សុខលីម