ដល់ពេលតារាប្រុសពីរដួង ធារ៉ាត់ និង ចេក ចាប់ដៃគ្នា

2015-02-13 17:23:50
ចំនួនមតិ 0 | ចំនួនចែករំលែក 0

ចន្លោះមិនឃើញ

តារាចម្រៀងប្រុសពីរដួងគឺលោក សុគន្ធ ធារ៉ាត់ តារាចម្រៀងមកពីផលិតកម្ម Spider និងលោក សុខ រតនៈ ហៅ ចេក អតីតតារាចម្រៀងផលិតកម្ម Rock បានចាប់ដៃគ្នាជាលើកដំបូង ក្នុងបេសកកម្មផ្ដល់រសជាតិថ្មីប្លែកដល់ទស្សនិកជន។

“ខ្ញុំក៏រាងបាត់មុខយូរ ឯបងចេកក៏ដូចគ្នា រវល់ទៅអូស្ត្រាលីមួយរយៈ ដល់គាត់មកវិញ ពួកខ្ញុំក៏ចាប់ដៃគ្នា ដើម្បីឲ្យប្លែកអីចឹងណាបង យើងចាប់ផ្ដើមមានអ្នករាំអម និងលេងស្ទិលសំលៀកបំពាក់ប្លែកៗទៀត បើយើងឈរច្រៀងៗដូចមុន អត់មានអ្នករាំអមអី គេលែងមើលហើយបងអើយ!"។

លោក សុគន្ធ ធារ៉ាត់ និងដៃគូលោក ចេក

ការផ្លាស់ប្ដូរថ្មីនេះ គឺក្រោយពួកគេទាំងពីរបានបែកបាក់ក្រុម និងផលិតកម្មរៀងខ្លួន។ លោក សុគន្ធ ធារ៉ាត់ បានបែកក្រុម "My Love" របស់ខ្លួន បន្ទាប់ពីសមាជិកម្នាក់(កូននាយកុយ)ក្នុងចំណោម៥នាក់បានស្លាប់ក្នុងករណីគ្រោះថ្នាក់ចរាចរណ៍រថយន្តលោក ខេមរៈ សិរីមន្ត ប៉ះជាមួយរថយន្តដឹកកុងតឺន័រកាលឆ្នាំ ២០១៣។ ឯម្ចាស់បទ "សេដ្ឋីស្រុកស្រែ" ក្លាយជាតារាចម្រៀងគ្មានទ្រនំ ក្រោយផលិតកម្ម Rock បញ្ឈប់ការផលិតបទចម្រៀង។ ម្យ៉ាងក៏ជាការចង្អុលបង្ហាញរបស់ឌីជេក្ដិប ជារៀមច្បងបង។

"ឌីជេក្ដឹប និយាយទៅគាត់ដូចជាបងដែរ គាត់ថាឲ្យចេញច្រៀងតែឯងទៅ ហើយគាត់បានជួយនិពន្ធឲ្យបានចំនួន២បទដែរ។ ក្រោយមកខ្ញុំក៏បានមកចាប់ដៃគ្នាជាមួយបង ចេក ទៀត ឃើញថាមានការគាំទ្រច្រើនមែន អីចឹងគិតថានឹងប្រឹងប្រែងបន្ថែមទៀត"។ ធារ៉ាត់ បន្ថែម។

សមិទ្ធផលក្រោយការចាប់ដៃគ្នានៅគ្រានេះ សុគន្ធ ធារ៉ាត់ និងលោក ចេក ទើបបានបញ្ចេញបទចម្រៀងមួយបទជាមួយស្ទិលប្លែកភ្នែក ទាំងការធ្វើខ្លួនស្លៀកពាក់ និងបញ្ចូលចង្វាក់រ៉េបទៀត។ បទនោះ មានចំណងជើងថា "ស្រីខ្មែរគ្រប់បែប"។បទនេះ គឺឆ្លុះបញ្ចាំងសង្គមបច្ចុប្បន្នពីស្ត្រីខ្មែរយើងឥឡូវមានគ្រប់បែប មានតាំងពីស្អាតតាមបែបធម្មជាតិ ខ្លះលេងស្ទិលកូរ៉េ ខ្លះទៀតដូចអឺរ៉ុប។

បន្ទាប់ពីបទ "ស្ត្រីខ្មែរស្អាតគ្រប់បែប" ធារ៉ាត់ និងចេក ត្រៀមបញ្ចេញបទថ្មីៗបន្តបន្ទាប់ទៀតក្នុងពេលឆាប់ៗទៀត។ មិនត្រឹមតែជាតារាចម្រៀង ប៉ុន្តែលោក សុគន្ធ ធារ៉ាត់ ក៏អាចនិពន្ធទំនុកច្រៀង និង Melodyបានថែមទៀត ខណៈបច្ចុប្បន្នលោកកំពុងសិក្សានៅសាកលវិទ្យាល័យភូមិន្ទវិចិត្រសិល្បៈ ផ្នែកនាដ្ដសាស្ត្រឆ្នាំទី៣ និងជានិស្សិតច្បាប់ឆ្នាំទី១នៅសាកលវិទ្យាល័យភូមិន្ទនីតិសាស្ត្រ និងវិទ្យាសាស្ត្រសេដ្ឋកិច្ចថែមទៀត។

សុគន្ធ ធារ៉ាត់ បានចូលសិល្បៈអំឡុងឆ្នាំ ២០១២ ដោយបង្កើតក្រុម "My Love” បន្តមកទៀតក្លាយជាតារាចម្រៀងផលិតកម្ម Spider ដែលកន្លងមកធ្លាប់បានធ្វើឲ្យមានការចាប់អារម្មណ៍ក្នុងបទមួយចំនួនដូចជា "ខ្ញុំទើបតែមានស្នេហា" និងបទ "សិចស៊ីអីយ៉ាងនេះ" ជាដើម។ ធារ៉ាត់ ថ្លែងថា លោកបានមកដល់ថ្ងៃនេះ ដោយសារការបណ្ដុះបណ្ដាលរបស់លោក គួច ខេវិន៕