ក្រុមហ៊ុន​ Apple គ្រោង​នឹង​ផលិត​រថយន្ត​ដើរ​ដោយ​ថាមពល​​អគ្គិសនី​ដ៏​ទំនើប​មួយ​នៅ​ឆ្នាំ ២០២០ ដើម្បី​ប្រជែង​នឹង​ក្រុមហ៊ុន​ផលិត​រថយន្ត​ល្បី​ៗ​ចំនួន​ពីរ​របស់​អាមេរិក​គឺ Tesla Motors និង General Motors។ នេះ​បើ​យោង​តាម​​សារព័ត៌មាន Bloomberg។

​បើ​តាម​ប្រភព​ដែល​បាន​ដឹង​ពី​គម្រោង​ផលិត​រថយន្ត​​របស់ Apple ​ប្រាប់​ទៅ Bloomberg ថា ​​ក្រុមហ៊ុន​មួយ​នេះ​នឹង​ត្រូវ​ចំណាយ​ពេល​រហូត​ដល់​ទៅ ៥ឆ្នាំ​​ ទើប​អាច​សម្រេច​គម្រោង​ផលិត​រថយន្ត​ដើរ​ដោយ​ថាមពល​អគ្គិសនី​ ដើម្បី​​​ប្រជែង​នឹង​​ Tesla និង​ GM បាន​។

ដើម្បី​ឱ្យ​គម្រោង​នេះ​ទទួល​បាន​ជោគជ័យ​នៅ​ក្នុង​​ឆ្នាំ ២០២០ Apple បាន​​ជួល​​បុគ្គលិក​មាន​ជំនាញ​ផ្នែក​​រថយន្ត​​ ២០០នាក់។ ប៉ុន្តែ​​គម្រោង​ផលិត​រថយន្ត​នេះ​នឹង​ត្រូវ​​លុប​ចោល​​ឬ​ពន្យារ​ពេល​​ ប្រសិន​បើ​ថ្នាក់​ដឹក​នាំ​ជាន់​ខ្ពស់​របស់​ Apple មិន​ពេញ​ចិត្ត​ នៅ​ពេល​ដែល​គម្រោង​នេះ​ដំណើរ​ការ​មិន​​សូវ​ល្អ។​​

ចំពោះ​ដំណើរ​ការ​ស្វះ​ស្វែង​រក​កម្លាំង​​បន្ថែម  Apple ត្រូវ​បាន​ក្រុមហ៊ុន A123 Systems, LLC  ដែល​ល្បី​ឈ្មោះ​ផ្នែក​ផលិត​ថ្ម​និង​អាគុយ​ប្រភេទ ​Lithium-ion ​ប្តឹង​ថា​ Apple បាន​​​លួច​​​ជួល​បុគ្គលិក​​របស់​ខ្លួន​ចំនួន ៥រូប​ ហើយ​​ក៏​កំពុង​តែ​ព្យាយាម​ជួល​បុគ្គលិក​ជំនាញ​ផ្នែក​ថ្ម​និង​អាគុយ​​បន្ថែម​ទៀត​ពី​ក្រុមហ៊ុន​ចំនួន ៥ (LG Chem Ltd, Samsung Electronics Co., Panasonic Corp., Toshiba Corp. និង ក្រុមហ៊ុន Johnson Controls Inc., ) ដើម្បី​ផលិត​អាគុយ​ ដែល​មាន​ស្តង់​ដារ​​ដូច​ខ្លួន​៕

ចាំ​មើល​ថា តើ​គម្រោង​ផលិត​រថយន្ត​ដើរ​ដោយ​ថាមពល​អគ្គិសនី​របស់ Apple ​នៅ​ឆ្នាំ ២០២០ អាច​នឹង​​សម្រេច​ដូច​គោល​ដៅ​ ដែល​បាន​គ្រោង​ទុក​ដែរ​ឬ​ទេ? ​

អាន៖ ប្រើ​​ឡាន​​​ទំនើប​​​យូរ​ហើយ​ តិច​អត់​ដឹង​គេ​ផលិត​សំបក​​កង់​​​ម៉េច​?

ប្រែ​សម្រួល៖ ប៉ែត ផាន់និត

ប្រភព៖ bloomberg