ការកម្សាន្តទំនើបដំបូងគេនៅកម្ពុជា អាចឲ្យអ្នកទទួលបទពិសោធន៍ប្លែកអារម្មណ៍លើផ្ទៃសាគរដ៏ល្វឹងល្វើយ

2015-02-20 17:15:30
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្នុងសម័យកាលតម្រូវការកម្សាន្តបែបទំនើបៗកំពុងកើនឡើង ឥឡូវនេះប្រិយមិត្តដែលធ្វើដំណើរទៅលម្ហែនៅតំបន់ឆ្នេរកម្ពុជា អាចទទួលយកបទពិសោធន៍សំកាំងខ្លួនលើអាកាសកណ្ដាលសាគរមួយដែលមានឈ្មោះថា Flyboard រៀបចំដោយ ULTIMATE FLYBOARD EXPERIENCE មានទីតាំងនៅឆ្នេរអូត្រេះ ខេត្តព្រះសីហនុ។

លោក Florian Lee Tea អ្នករៀបចំឲ្យសេវាកម្មឧបករណ៍កម្សាន្តជំនាន់ថ្មីនៅឆ្នេរកម្ពុជាមួយនេះ រៀបរាប់ប្រាប់ទស្សនាវដ្ដី Sabay ថា Flyboard នេះបានបើកដំណើរការតាំងពីថ្ងៃទី១វិច្ឆិកាចុងឆ្នាំ២០១៣មកម៉្លេះ។ Flyboard ជាម៉ាស៊ីនមួយប្រភេទពាក់នឹងខ្នង មានសមត្ថភាពអាចរុញមនុស្សឲ្យហោះផុតពីផ្ទៃទឹក ក្រោមការបញ្ជាម៉ាស៊ីននោះ។

Florain ថាវត្តមានដំបូងគេរបស់ Flyboard នៅកម្ពុជាដើមឡើយ ពុំសូវទទួលបានការចាប់អារម្មណ៍ទេ ព្រោះថាប្រហែលអតិថិជនមិនទាន់ទុកចិត្តលើសុវត្ថិភាពពេលកម្សាន្តវា។ ប៉ុន្តែមកដល់ឥឡូវនេះ Flyboard កំពុងក្រសោបបានភាពពេញនិយមទាំងភ្ញៀវបរទេសនិងពលរដ្ឋខ្មែរ។

រាល់ការកម្សាន្តរបស់អតិថិជន ក្រុមការងារនឹងបង្ហាត់បង្រៀន១០នាទីមុនសិន មុននឹងអនុញ្ញាតឲ្យបញ្ជាម៉ាស៊ីនោះដោយខ្លួនឯង។ «Flyboard គឺស្រួលរៀនណាស់។ ភាគច្រើនអតិថិជនរៀនតែ៥នាទី គឺអាចប្រើម៉ាស៊ីនបានដោយខ្លួនឯងហើយ។ បើនិយាយពីក្រោយពីសំកាំងខ្លួនរួច ពួកគាត់ប្រាប់ថា សប្បាយស្ទើរនឹកស្មានមិនដល់»។ លោក Florain រៀបរាប់ពីសេវាកម្សាន្តថ្មីនេះ។