ស៊ិន យូបីន ថាអត់ទាន់ប្រទះឈុតក្ដៅសាច់

2015-02-24 16:58:06
ចំនួនមតិ 0 | ចំនួនចែករំលែក 0

ចន្លោះមិនឃើញ

បន្ទាប់ពីជាប់ជយលាភីលេខ១ ក្នុងកម្មវិធី Freshie Girls & Boys ឆ្នាំ ២០១៣ និងចាប់អាជីពសម្ដែងភាពយន្តនាដើមឆ្នាំ ២០១៥នេះ តារាសម្ដែងវ័យក្មេង ស៊ិន យូបីន ប្រាប់ថា មកទល់នឹងពេលនេះ មិនទាន់ប្រទះឈុតស្នេហារោលរាលណាមួយនៅឡើយទេ។

យូប៊ីន ថ្លែងដូច្នេះ បន្ទាប់ពីកន្លងមក នាងធ្លាប់បានព្រលយថា នាងបានត្រៀមរួចស្រេចហើយ ចំពោះឈុតសម្ដែងទាំងឡាយ ព្រោះជ្រុលជាមានឈ្មោះជាតារាសម្ដែងទៅហើយ ត្រូវសម្ដែងឲ្យដល់ ទោះឈុតអ្វីក៏ដោយ ក្នុងនោះមានទាំងឈុតថើបមាត់គ្នាជាដើម។ ប៉ុន្តែឆ្លងកាត់ការសម្ដែងចំនួនពីររឿងកន្លងមកនេះ គឺនាងប្រាប់ថា ជួបតែឈុតធម្មតាៗប៉ុណ្ណោះ។

"មានត្រឹមឱបប៉ះដៃប៉ះជើងអីប៉ុណ្ណឹង អត់ដែលជួបឈុតស្នេហា អីអីចឹងផង"។ ទោះយ៉ាងនេះក្ដី តួឯកស្រីក្នុងរឿង "និស្ស័យស្នេហ៍ខ្ញុំ" រូបនេះ ក៏ប្រាប់ឲ្យដឹងទៀតថា នាងមិនទន្ទឹងឈុតសម្ដែងទាំងនោះឡើយ បើទោះនាងដឹងមុនហើយថា ជីវិតជាតារាសម្ដែងលែងអី នឹងជួបប្រទះ។

"ឲ្យទន្ទឹង មានអីត្រូវទន្ទឹងបង...តែបើទៅមុខទៀតមានឈុតអីចឹង...ដូចខ្ញុំធ្លាប់ប្រាប់បងហើយថា ត្រូវតែដាក់ចិត្តសម្ដែង ប៉ុន្តែត្រូវប្រាកដដែរថា គឺត្រឹមលក្ខខណ្ឌទទួលយកបានប៉ុណ្ណោះ បើហួសហេតុពេក គឺ...អត់ទេ!”។

ស៊ីន យូប៊ីន ជាអតីតជយលាភីលេខ១ ក្នុងកម្មវិធី Freshie Girls & Boys ជំនាន់ទី១២។ ដែលបន្ទាប់ពីជយលាភីនោះ តារាស្រីវ័យ ១៩ឆ្នាំរូបនេះ ទទួលការងារច្រើនតែលើស្ប៉តពាណិជ្ជកម្មក្នុងនោះមានដូចជា ស្ប៉តភេស្ជជៈប៉ូវកំលាំង M150 ស្ប៉តស្រាបៀ Angkor Beer និងស្ប៉តពាណិជ្ជកម្មទឹកអនាម័យស្ត្រី PH Care ជាដើម។

រហូតមកដល់ដើមឆ្នាំ ២០១៥នេះ ទើបនិស្សិតឆ្នាំទី៣ ផ្នែកអ្នកឌីហ្សាញជាន់ខ្ពស់នៅសាកលវិទ្យាល័យស៊ីតិចរូបនេះ ចាប់ផ្ដើមការងារសម្ដែង។ ភាពយន្តបើកទំព័រសម្ដែងរបស់ យូប៊ីន គឺរឿង "និស្ស័យស្នេហ៍ខ្ញុំ" ជាប្រភេទរឿងភាគ ដែលទើបចាក់បញ្ចាំងចប់នៅលើកញ្ចក់ទូរទស្សន៍ MyTV ថ្មីៗ។ រឿងទី២របស់នាង គឺរឿង "អូនជាការចងចាំបង" ឬ "You Are My Memory”។

យូប៊ីន ប្រាប់ថា នាងអាចនឹងមានចេញស្នាដៃបន្តបន្ទាប់ទៀត ខណៈបច្ចុប្បន្នមានផលិតកម្មមួយចំនួនបានទាក់ទាញនាងហើយ ដោយកំពុងស្ថិតក្នុងការចរចា៕

អត្ថបទ៖ ទារិកា